☀️🌪عاصفة شمس🌪☀️

🌞عاصفة شمس 🌞جزء 30

ركبوا اخوانا فطوموبيلاتهم و لوطو دعروة ههي لولة و شمس دارت ليه لوكاليزاسيو فgps
فلوطو دسعد
سعد : حنا غامتبعين شمس فهبالها كل مرة بلاصة جديدة
اسيل (شافت فيه):علاش مابغيتيش تجي
سعد : لا ماشي هادشي لي قصدت احياتي غير كل مرة مخرجة لينا شي بلاصة مكاتجيكش شخصيتها غريبة
اسيل: بحالاش
سعد : متسرعة شوية و عصبية بزااف
اسيل: سمع مزيان هاد لهدرة نورماال مغنهدرش معاك على شي بنت و نقوليك هاد لهدرة مي شمس حالة خاصة..شمس بنت قوية بزااف لواحد درجة متصورش غير باش تمشي بنت فداك لعمر و فداك لوقت لمدرسة داخلية فبلاد بعيدة و معندها تاحد واخا خالي معتز دوا مع معارفو تما ووصاهم عليها مي ماشي بحال الا كانت حدانا...وزيد عليها خالتي نجمة كانت قريبة لييها يعني مكنتش كتفرق عليها انا وصغيرة كنت كانغير من شمس على ماماها و علاقتهم... من بعد مشات تقطعت خبارها قلييل فين كانسمعو عليها شي حاجة غير راه نجحات و مكتبغيش تجي هنا لمغرب .. من بعد تاحد معرف مين جابت ديك لفلوس باش دارت دار ففرانسا و محل و موطورات و طوموبيلات
سعد: فلوس باها
اسيل : خالي عندو معارف فلبنك لي كاتعامل معاهم شمس..قالو ليه بلي لفلوس لي كاتسيفط ليها مجمدة ومكاتاخد منهم تا ريال
سعد : ومنين جابت لفلوس
اسيل: كاتبيع تصاميم لشركات كبرى و كاتبيع ليهم لحقوق ديالها هاكا باش قدرات تجمع لفلووس وباينة كانت كاتاخد فلووس نيت شوف غير موطورات تبارك الله لملاين كايديرو و هاد لوطو لي صايگ رياض ووحدة خرا فلگاراج..يعني تبارك الله عليها قادة براسها..شفتي فدار والعائلة كاملة كايديرو بهدرتها من كبير لصغير و كايحتارموها و مكايتعاملوش معاها كبنت لعشرينات بلعكس كايتعاملو معاها بحال ميما غالية ههه
سعد : وعلاش زعما
اسيل : ههه بلاتي نعاود ليك على واحد لبلان وقع مين جات من فرانسا
♠️فلاش بااك♠️
كانت يالاه رجعات شمس من فرنسا و يالاه كاتولف على لعائلة مشات لشركة باش تشوف باها تحت طلبو و اصرارو باش تشوف لخدمة كيف دايرا
دخلات لشركة و كانت فيها لفوضة و ناس شي داخل شي خارج فقسم موظفين و گاع لبنات دايرين زيف و محجبات مشات لعند سكريتيرة
شمس : سلام عليكم
سكريتيرة : bonjour mademoiselle
شمس : و عليكم سلام .. كاين سي معتز
سكريتيرة (محملتهاش ): tu as un rendez-vous avec monsieur moataz
شمس : لا معنديش ولكن تقدري تقولي ليه راه جيت
سكريتيرة: ton nom
شمس : شمس الليل العموري
سكريتيرة (سمعات سميتها وهي توقف ): mademoiselle chamss
je suis désolé attendez une minute s'il vous plaît

شمس (بقلة صبر ): واش كاين هو فلبيرو
سكريتيرة : وي
وهي تدخل شمس لبيرو لقاتو كايدوي فتيلي دار ليها اشارة بيدو باش تگلس
بعد دقائق سلم عليها
معتز : بنتي اش تشربي
شمس : لا والو شكرا بغيت نسولك
معتز : سولي ابنتي
شمس: علاش كلشي فشركة داير زيف زعما على موظفات
معتز : من شرووط انهم اكونو محجبات
شمس : امم مزيان
معتز : كيف جاتك شركتنا ان شاء الله غاتجي تخدمي معانا
شمس : شركة مزيانة عادي.. غير باش نجي نخدم معاكم امر مستبعد و بزااف
معتز : علاش بلاصة ماتمشي تقلبي على خدمة و تعذبي خدمة موجودة و اصلا من حقك دخلي هنا
شمس: شوف هاد لهدرة عييت مانقولها حقي و ديالي هو لي درتو انا بيدي عييت فيه تعذبت فيه سهرت عليه نتوما درتو هادشي مزيان ههادا فخر لعائلة لعموري مي باش نجي هنا صعييبة و بنسبة ليا من مستحيلات
معتز (تنهد):شفت فقصوحية راس و عناد حتى عييت تا شفت مي بحالك مشفتش
شمس : هادي سميتها حقيقة و ادلاء برأيي ووجهة نظري ماشي قصوحية راس كاين فرق ..لخدمة غادا مزيان
معتز : اه الحمد لله انا وعمك غاديين مزيان والحمد لله كاناخدو مشاريع مزيانة
شمس : بدوام ان شاء الله ..نخليك دابا خاصني نمشي
معتز : مرحبا بيك ابنتي فاي وقت
شمس (حركات راسها ): بسلامة
خرجات شمس و فطريق سمعات هدرة لي معجبتهاش
بنت 1: شوفي بنتو شنو لابسة و شعر معري و حنا فارضين عليا هاد لباس باش نخدمو
بنت 2: و الله الا عندك الحق هي معرية كثر ممغطية
بنت 1 : اوا راه داكشي علاش عز العرب گاع مكيشوف فيا و انا ديما حداه قول كاين مايشوف فدارهم
تلفتات شمس لمصدر صوت شافت فيهم مزيان و زادت فحالها
فليل كلشي مجموع فطابلة دلعشا كايتعشاو وكايتبادلو لحديث
امين : شمس قالي معتز بلي جيتي ليوم لشركة كيف جاتك
شمس (حطات معلقة): كاين نقص فيها
كلشي شاف فيها
معتز : بحالاش
شمس : اول حاجة كاينة فوضوية فشركة كلشي غادي جاي لهدرة بزااف بين موظفين و خصوصا نميمة لي مخصهاش تكون فوقت لخدمة
امين : هادي حاجة عادية
شمس (علات حاجبها ): شنو لعادي فهادشي بلاصة متكون خدمة و من بعد ميديرو بووز عاد يهضرو و خاص كل قسم يكون بوحدو
معتز : شنو اخر
شمس : ثانيا لغة بلاصة متبززو على موظفين ادويو بلفرونسي قولو ليهم ادويو بلغتهم الام لعربية باش كلشي يقدر اتفاهم و يتناقش فهمتو
عز : وي بصح
شمس : ثالث حاجة و لي مفهمتش مين جاتكم واهي لحجاب
اسيل(ضحكات و كملات عشاها )
معتز : بغينا شركة تكون فيها احترام
شمس(شافت فيه بشوفات مفهمهش): احترام ههه لا واش من نيتك
الحاجة : شمس حتارمي باباك
شمس : لحاجة الغالية انا محتارماه بطريقتي .. عمر حجاب كان معيار لاحترام ولا اخلاق ولا حتى عفة دلبنت ..يعني انا حيث مدايراش زيف غانولي قليل تربية...
معتز : حنا دخلنا غير لبنات لي مزيانين فخدمتهم و محتارمين ريوسهم
شمس : محتارمين ريوسهم ... الاحترام هو تدوي على ناس من مور ظهرهم اوا اسي معتز راه كايقولو شوف بنتو كيف دايرة و حنا فارضين علينا لحجاب يعني كاين لبنات لي دايرين زيف غير باش اخدمو عندكم
امين (شاف فخوه): يمكن عندها لحق حيث حنا كنا دايرينها من شروط
شمس: وعلاش هاد شرط ياك بغيتوها تكون كفء و كتخدم مزيان اش عندكم مديرو بشي زيف ولا غاتزوجوهم اسي معتز
حنان : شمس عرفي شكاتقولي
شمس : شوفو باش منبقاوش نافقو بعضياتنا انا مكانعرفش ندوي بحالكم و نزوق فلهدرة فالا بغيتوني تقبلوني كيف انا... سولتوني جاوبتكم بصراحة ..بصحتكم (ناضت من طلبة دلعشا و طلعات لبيتها)
عز : صراحة عندها لحق فحتى انا كانلاحظ بلي موظفات مواخدينش راحتهم
الحاجة (مع معتز ):بنتك رجعات قوية بزااف و قاصحة و لهدرة بلحساب شمس بشخصية مختالفة
ياقوت: ولكن راه كاتنفاعل دغيا وهادشي خايب ليها و عليها
الحاجة: خلوها على راحتها حنا بغينا نكسبو لبنت ماشي نفقدوها بغيتها تعيش متبقا ليا من حياتي معانا و قدامنا راها لقلب طيب و نتا معتز و امين شوفي حل لديك شركة فحنا معندناش لحق نفرضو شي حاجة على بنات ناس و حنا بناتنا مفارضينش عليهم شي حاجة
معتز : داكشي لي كاين اميمتي
امين: ان شاء الله الميمة
الحاجة : كملو عشاكم