👨👧👦 أم لمدة أسبوع👩👦👦
الحلقة4
بعد ما خلصوا أكل وشالوا الأطباق وصلوا بدأوا يذاكروا
سيف بضيق:يا بابا أنا مش عارف أذاكر لوحدي
آدم بتعب:ليه مش أنت اخدت الكلام ده في المدرسة
سيف بضيق: ما أنا بخده في المدرسة ولما باجي ماما بتذاكروا معايا
سيف بلؤم: وماما مشيت وأنت بقيت بدالها وأكيد مش هتعرف تذاكر لي علشان كدا قولتلي أذاكر لوحدي صح
سيف بتمثيل البكاء:يعني الله يرحم مستقبلي خلاااااااص😩 فينك يا ماما من ساعة ما مشيتي وأنا متبهدل 😩
آدم بضيق: إنت ليه مصرّ تحسسني إنها كانت سوبر ومان وإن إللي هي كانت بتعمله أنا معرفش أعمله
سيف بلؤم: لو تعرف تعمل إللي ماما كانت بتعمله صحيح يلا ذاكر لي وأثبت لي كلامك
آدم بذهول: ده إيه البجاحة دي هو إحنا ما كناش أطفال ولا إيه ولا كنا أطفال محترمين وانتو إللي جيل ما يعلم بيه إلا المولى
سيف بضحك: لا انتو إللي كنتو محترمين وإحنا جيل ما يعلم بينا إلا المولى 😂😂
آدم وضربه على راسه بخفة: لسانك أطول منك ولما تيجي أمك هتخانق معاها تاني بسببك علشان قلة أدبك دي
سيف بضحك: هو أنت فاكر أني أقدر أعمل كدا في وجود ماما دي كانت تعلقني 😂😂
آدم بضيق وسخرية: أنا قلت كدا برضه هي مشيت وأنت أخلاقك باظت
سيف بتمثيل الجدية والدفاع : علشان تعرف بس الست دي كانت م مشية البيت زي الساعة مش زيك يا أستاذ
آدم مسك المقشة وجري ورا سيف: هي حصلت تقول على أمك الست دي وتقولي يا أستاذ ده إيه التربية دي
سيف بيجري حوالين الترابيزة وبضحك: خلاص خلاص هحترم نفسي بس شيل المقشة ما يبقاش قلبك أسود أوماااال
آدم بضيق ولسه بيجري وراه: بقى أنا قلبي أسود يا قليل الأدب طب مش هسيبك غير لما تضرب
سيف بضحك وصوت عالي وهو بيجري: يااااااااا نووووووور إلحقيني بابا عايز يضربني ياااااااا نووووووور
نور بتعب وذهول: إيه ده في إيه أسيبكم شوية اجي ألاقيكم بتجروا ورا بعض بالمقشات
سيف بذهول: يا نور هو إللي ماسك مقشة أنا مش ماسك حاجة
آدم وبيجري وراه: هو أنت كمان عايز تمسك يا سلام ع الخلفة إللي تفرح خد هنا يالا
سيف بضحك: خلاص حقك عليا بقى هحترم نفسي بعد كدا
نور بهدوء: خلاص يا بابا سيبه بقى وهو قال إنه مش هيعمل كدا تاني
آدم بعند زي الاطفال: يتأسف حالا
نور بهدوء: أعتذر لبابا يا سيف
سيف بضحك: بس كدا أنا آسف واحدة كمان أنا آسف
نور بابتسامة: خلاص يا سيف
سيف بضحك: والله أبدا أنا آسف آسف آسف
آدم بهدوء: خلاص سامحتك يلا علشان تذاكر
سيف بلؤم: أما زهقتك وخليتك تمشي تدور عليها ما ابقاش أنا سيف😂😂
نور بضحك مكتوم: طب اتلم ليسمعك ويضربك بالمقشة
سيف بتمثيل أنه غلبان: لااااا وعلى إيه الطيب أحسن أنا هروح أجيب كتبي
وراح سيف جاب كتبه علشان آدم يذاكر له ونور كانت قاعدة بتكتب الواجب وبعد ساعة
سيف بتفكير: بابا هي إيه الكلمة دي
آدم بتفكير: مش عارف
سيف بضحك: نعم مش عارف يعني إيه كلمة قوس قزح بالإنجليزي
آدم ببرود: اه عادي فيها إيه هو لازم كل حاجة ابقى عارفها
سيف بضحك: إيه ما اخدتهاش في المدرسة ولا إيه 😂😂😂
آدم وضربه بخفة: ما اخدتهاش يا لماضة
آدم بضيق: وبعدين انتو مناهجكم معرفش عاملة كدا ليه العربي والدين اتغيروا وعايزين حد يشرحهم مابقوش مفهومين كدا زي الأول والانجليزي إللي الكتاب كان بيبقى كله صور بقى كله كلمات أول مرة أشوفها أنا أعرف جيبين لكم المناهج دي منين
سيف بضحك هستيري: لما أنت بتقول كدا أنا أعمل إيه 😂😂😂😂😂
آدم بتعب: تذاكر يا ابني وأمرك لله
سيف بغلاسة: طب يعني إيه قوس قزح بالانجليزي
آدم بزهق: يا حبيبي قلت لك معرفش وبعدين أنا ما كنتش بحب الانجليزي
سيف بتمثيل: لا لا لا
آدم بزهق: فيه إيه يا واد
سيف بتمثيل أكبر: في إن ماما دي ما فيش منها اتنين على الأقل كانت بتعرف تتصرف لما ما تبقاش في كلمة عارفاها زي كدا
آدم بتعب: بتتصرف تعمل إيه يا لمض
سيف ببراءة: بتطلع التليفون وتترجم الكلمة إنت فاكر إنها تليفونها ده بتقعد تلعب عليه لا لا لا دي بترجم لي كلمات وبتحسب عليه حاجات وبتجيب لي برامج تعليمية عليه
آدم بزهق: هترجمها لك يارب نخلص بقى
نور بتعب وشايلة عمر: يا بابا عمر صحي وقاعد يعيط وأنا مش عارفة أكتب الواجب من الصداع بتاعه
آدم بتعب وخده منها : يا أهلا أنت صحيت
عمر: واااااااااااااااااااااء
آدم بضيق: بس مش ناقص صداعك ده تعالى اعملك الرضعة واغسل المواعين
سيف بزعل: طب وأنا
آدم بزهق: خد التليفون أهو ترجم إللي أنت عايزه وسبني في حالي بقى كفاية عليا أخوك
سيف بفرح وخد التليفون: هات هات
آدم بتحذير: ترجم هاااه مش تلعب
سيف بابتسامة عريضة: حاضر 😁
