" هو انا ازاي وصلت للي بيحصل ده؟" زين سأل
" طيب هي حياتي باظت امتي؟
من 3 أيام لما ظهرت واحده كده محدش عارفلها اسم ولا دين ولا مِله بس كان واضح ان عندها فرط حركة؟
لا لا ده مش ذنب البت سعديه ، حرام أظلم البت المفجوعه دي. طيب ياربي جرا ايه، حصل ايه؟ ما انا كنت حلو وفي حالي خالص ماليش دعوه بحد.
رجعوني الكهف تاني ونبي هروح الكهف بتاعي ولن اتكلم ولن ابكي ولن اشكي بس رجعوني.
الايام دي غريبه خالص، مبقتش فاهم حاجه انا توهت. صحابي واخواتي من ام مختلفه اتلموا علي بعض وبيعملوا مصيبه من غيري، هما فاكرني عبيط ومش داري عن حاجه بس انا عارف انهم بيعملوا حاجه، ايه الحاجه دي بقي انا مش عارف.
يمكن انا عبيط فعلا ليه لا؟
حتي البت جيجي مطلعتش زي ما كنت فاكر، انا اتخدعت فيها اولاني ورجعت اتخدعت فيها تاني وهوب اتخدعت في الخدعه الاولي لانها مكانتش خدعه وياريت نوقف العداد علي كده عشان انا مبقاش فيا حيل اتخدع تاني.
والله البت جيجي دي غريبه، هبقي اعرضها علي دكتور نفساني يمكن نلاقيلها حل، قال ايه الهانم تعرفني من واحنا عيال صغيرين وكانت بتحبني من خامسه ابتدائي بس انا عمري ما خدت بالي منها وهي محاولتش تكلمني عشان يا حرام كانت خجوله وغير مرئيه، ده انتي صوتك يجيب برج خليفه كله يا جيجي!
وقال ايه بعدين هي اتنقلت لمدرسه تانيه بس عمرها ما نسيتني ولما انا اتشهرت هي عرفتني علي طول وبالمصادفه البحته وأعمال القدر الكونيه المقدره المكتوبه الوكاله جمعتنا احنا الاتنين وهي كان لازم تخفي حبها عني وتستني اللحظه المناسبه.
اللحظه المناسبه بقي بتعريف جيجي حديد هي لما اجي اربط رباط الكوتشي. يا فرحتي ياما.
بس برضو ذكيه يا جيجي وعرفتي تلعبيها صح ومكنتيش مندفعه، هي دي مراتي.
ياهه تخيل مثلا اكون شايفها لأول مره واجي اسلم عليها عادي الاقيها بتقولي يا اوستاز زين اني اعرفك من خامسه ابتدائي يا اوستاز زين اني اوحبك يا اوستاز، بصراحه لو ده حصل فهما احتمالين اتنين، يا اما ما هصدق نفسي واشقطها او الاحتمال التاني والأقرب للواقع اني هخاف واجيب هاري يتصرف معاها.
ياهه يا جيجي كل ده يجي منك انتي؟
اقطع شراييني لو مكانتش شايفالها كام فيلم رومانسي وحبت تقلدهم وكله جه علي نافوخي انا، ما تشوف افلام اكشن زي باقي خلق الله متقرفوناش في عيشتنا بقي.
ولا البت سعديه، مصيبه نازلالي مخصوص من السما، مصيبه رباني كده. هي اسمها الحقيقي ايميليا وبتقولنا نناديها ايميلي بس كلنا بنقولها يا سعديه، أصل فيها شبه من سعديه خالة امي وازيدك من البحر طحينه لما سألتها مين فنانك المفضل قالتلنا بهاء سلطان وخالة امي بتموت في بهاء سلطان وكل شويه تغني لجوزها قريب ولا بعيد ولااا حزين ولا سعيد ولااا.
أنت تقرأ
زِفاف مُرِيع
Comédieالعروس تخبئ خدعه كبيره. قرر صديقات العروس الإنتقام من أحد أصدقاء العريس فقط لأنه لم يتزوج بأي منهما و نهي ذلك التصادم بمن أفضل بينهما. ثم اتفق أصدقاء العريس علي أصدقاء العروس و العكس. ماذا يحدث عند اجتماع كل هذا في قاعه واحده؟ بالتأكيد سيحدث زفاف م...
