" الثامن من يناير "
ممكن اقول انه دة اسعد اسبوع مر علي في حياتي، امين دة احن زول ممكن يلاقيني❤️، بجد م حصل عرفت زول بفهمني بكل تقلباتي وبكل حالاتي بحبني❤️، الاسبوع دة اكتشفت وش تاني ليهو، وش المُحب العاشق ❤️😂، م بخليني اتعب نهائي، قال لي الدكتور مانع الارهاق قلت ليه اي مانع الارهاق لكن م معناها انه اشل حركتي بالصورة دي🙂...، حتى الاكل بعملو هو وربي يدو طامعهه شديد ع قول تيم 😂😂..، في الاسبوع دة وكل يوم بكرر وبقول : انا صاحبك قبل م اكون راجلك وطبعا احم حبيبك🌚❤️، يعني م حيجي يوم وأزعلك فيه او اشوف دمعتك تنزل بسببي فيه، مستعد اعوض عيونك ديل عن الحزن العاشتو عمرها كلو ❤️..، بس انتي خليك معاي وانا متمسك بيك مهما حصل ❤️..،انا كاتم شعوري دة لي ٤ سنة وماف زول شغال بي وسافهنني، كنت مستعد للحظة دي معاك عشان اعوضك عن كل كسرة خاطر واجبرها ليك❤️، انا ليك ومنك وفيك ❤️، دُمتي لي ي غدير ❤️..بكره مسافرين، قال ماشين السويد،وقال الاسبوع دة كان عشان انا ارتاح والملم روحي حتى اسافر،م عارف انه انا كان بإمكاني اسافر من يوم العرس عادي م انا بركب طيارة وح اكون قاعده فيها م حايمة من حتة لحتة، الليلة مشينا للدكتور عبد الرحيم وعمل لي فحوصات وهكذاا لزوم اجرائات قبل السفر، بالليل امين شايفني بكتب في الدفتر، قال لي ممممم اني احترق من الشمار 🌚..، الدفتر دة شنو؟، قلت ليه زي يوميات، قال لي وعندك طولة بال عشان تكتبي يوميات؟!، قلت ليه بحب افضفض للدفتر دة، م بنتقد اي شي بعملو، م بشاكلني،م بزعل مني، م بزهج مني ولو قعدت اكتب مية سنة لقدام، قال لي بقيتي تحبي الدفاتر وم بتحبيني انا😔..، قلت ليه اي بحبو اكتر منك الدفتر دة كان حصل ليه حاجة انا ح اموت والله، قال لي مهم للدرجة دي؟!، قلت ليه فيهو اسراري، قال لي م بيناتنا اسرار، قلت ليه لا دي حجات بيني وبين غدير، قال لي ممكن الاقي غدير التانيهه؟!،قلت ليه مشغوله حاليا بتحب في امين التاني 😂..
" الرابع عشر من يناير "
اليوم التاني الساعه ١٠ مساء، وصلنا ستوكهولم، مع انه كانت رحله ١٣ ساعه لكن م حسيت بأي شي لانه امين معاي ❤️❤️، اجواء المدينهه حلوة وبارده، امين شافني بردانه قال لي تعالي ادفيك قلت ليه اهجد اهجد وبطل قله ادبك دي 😂😂😂💔،لاقانا صحبو وودانا البيت وقال ح يجينا تاني، اليوم الاول ارتحنا، اليوم التاني صحينا واتجهزنا عشان ماشين مع صحبو يفسحناا، بجد كانت حاجه خرافيه واخرف كمان😂❤️❤️، جينا ماشين جمب بحيرة كده حسيت بشويه ضيق وهو لاحظ لي، قال لي غدير انتي كويسة؟، قلت ليه كويسة كويسة،كملنا مشي و٥ دقايق بالظبط حسيت رئتي ديل اتكمشو والاكسجين م واصلها بالمره، بقيت م قادره اتنفس وامين بعاين ومخلوع وم عارف يعمل شنو وانا من الضيق لمن قعدت في الارض💔..، شالني ووداني العربيه وكان بقول لي غدير خليك معاي...صحيت لقيت روحي في المستشفى وموصله بكميه اجهزه ومركبين قناع اكسجين، امين كان قاعد في الكنبه الجمبي ونايم وواضح عليه انه مرهق، حسيت بوجع شديد في صدري ومفاصلي برضو، بقيت بفتش عن الزر البنادي الممرضه، جات وكانت بتتكلم لغه غريبة قلت ليها I can't understand you ، امين ع الصوت دة صحى وكان مخلوع بقى يقول لي غدير غدير انتي كويسة؟، انا بتكلم بصعوبة قلت ليه اي كويسه كويسه،قال لي غدير انا كنت خايف كنت خايف اني اخسرك م بقدر اتحمل خسارتك دي 💔، قلت ليه امين م تقلق انا كويسة، قال لي غدير انتي ليك ٣ يوم نايمة، قلت ليه كيف ٣ يوم؟،قبل م يكمل كلامو جا الدكتور خاشي ومعاه صاحب امين، الدكتور بقى يتكلم كلام كتيير، بعداك جا صاحب امين قال انه انا حصل لي فشل تنفسي مفاجئ وفوق دة عندي تليف رئوي يعني معظم الرئة تلفت هسي، ومحتاجه زراعه رئتين في اسرع وقت، قلت ليه لا كيف يعني فشل تنفسي انا بتنفس اكسجين اصطناعي وببلع ادويتي وملتزمه بالتعليمات كلها كيف يجيني فشل تنفسي؟، ترجم للدكتور وقال لي قال انه م عارف السبب من شنو لكن الرئتين ديل م بتحملو اي شي وح تفضلي ع المراقبه السريرية لحد م نلقى المتبرع...الكلام كان موجع وصادم، لكن م بقدر الخوف والوجع الشفتو في عيون امين، انا مفروض اتقوى عشان هو يقوى، امين خايف شديد، م حصل شفتو بالصورة دي قبل كدة، بعد طلعو قعد يبكي، قلت ليه امين انا م قادره اتكلم عشان كده بطل بكى الله يخليك، وهو م راضي يسكت، قلت ليه امين وحات الخلقني كان م بطلت بكى الا افصل الأجهزة دي واقوم من هنا واموت!!، بعد قلت الكلمه دي سكت، قلت ليه م كنت عارفه اني معرسه شافع عوير زيك😂💔، قال لي الله يطوطحك انا خايف عليك، قلت ليه انا براي مطوطحة م محتاجه طوطحة زيادة ح تطلع روحي بعد دة 😂😂، قلت ليه م تكلم ناس البيت م عايزاهم يقلقو، قال لي حاضر، قلت ليه انا جيعانه جيب لي اكل، قال لي تصدقي وانا برضو؟، قلت ليه م انت شافع عوير لو كنت محلك كنت ح اكل عشان اقدر اقيف لكن التخلف الفيك دة...لو م اتقويت امين م حيقوى، امين ضعيف، انا سندو الوحيد في الدنيا دي 💔...،لو فقدني م حيحصل ليه خير، امين من غيري ولا شي...بعد اكلنا قلت ليه م تكلم زول من أهلنا م تخليهم يقلقو، قال لي م كلمت زول، قلت ليه ح يترعبو ع الفاضي اهو انا كويسة وشديدة، قال لي انتي منتهيه، م سامعه صوتك دة عامل كيف ولا التعب الفي عيونك دة، قلت ليه بس بعد دة سمحة صح؟😌، قال لي سماحة ؟،اي اي سمحة م بغالطك🌚💔،قلت ليه بتقدر يعني؟، عارفني بضبحك كان غالطتني في جمالي التبيعي 💅🏿💔، قال لي مممم مممممم هاك هاك اشربي العصير دة بلا تبيعي بلا تشتري هاك اشربي، بقى يحاول يضحك فيني وانا بتجاوب معاهو، كان م اتجاوبت ح يفقد الامل 💔..كان بتكلم مع دكتور عبدالرحيم، بعد خلص جاني وقال لي الدكتور قال ليك مُخيرة اذا عايزه تكملي العلاج هنا او في السودان، قلت ليه اكيد في السودان، قال لي غدير هنا الامكانيات كويسة والمستشفيات مُهيئة واكيد ح نلقى متبرع هنا بسرعة!، قلت ليه انا عايزه السودان، دايره اشوف اهلي، ع الاقل لو ح اموت اموت في بلدي واشوف اهلي مره اخيره واندفن هناك مش امش جُثة، امين انفعل وقال لي غدير مش قلت ليك سيرة الموت دي م اسمعها في لسانك؟!!!!!،قلت ليه في النهاية كلنا ح نموت وح نرجع لربنا...، م رد علي وطلع، انا بقيت ببكي في مكاني لاني فعلياً حاسه اني ح اموت قريب 💔..
" الثامن عشر من يناير "
اقناع امين كان صعب جداً، كل يوم بحاول معاهو وهو برفض، كان قال لي كل مرة بخيرك في اي موضوع واي شي، لكن في صحتك انا الشي الشايفو صح ح يتعمل، غدير لو مشيتي السودان ح تموتي انتي فاهمه الحاجة دي؟!، قلت ليه الموت واحد سواء هنا او في السودان بس الاسباب بتختلف، قال لي م ممكن اخسر الناس البحبها واحد ورا التاني، خسرت اهلي كلهم دفعه واحدة واسي لو مشيتي السودان برضو ح اخسرك!، قلت ليه انا لو مُت هنا، ووديتني السودان، اهلي كانو ح يتمنو يقعدو معاي اكتر،كانو ح يتمنو يشوفوني مرة اخيره قبل م اموت، ح يقولو مشت زافينها وجات في جنازة!، صدقني وقتها م حتقدر تستحمل نظراتهم والحزن الكان فيهم، اي انا عارفة انه حالتي صعبة وتحنن واي شي، لكن انا دايرة اهلي يا امين، ح تحرمني من شوفتهم برضو؟، دة حُبك وريدتك لي؟، بتجبرني ع الحجات البتصعب علي؟!، لو بقت كدة..، طيب، اعمل العايزو، بس خلي في بالك انه انا بدل اموت مرتاحة مُت متألمه نفسيا ودة كان بسببك ...كلامي دة كان مؤلم نوعاً ما بالنسبة ليهو، لكن بعد دة اقتنع، وزعل، زعل شديد، لكن في النهاية اقتنع يعني 🙇🏽♀️💔..ياهو الليلة وصلنا السودان، امين كان حذر جدا في انه انا م اتعب نهائي، لدرجه انه كان مقعدني في كرسي متحرك والمتخلف قرب يلبسني كيس في راسي عشان م اتنفس عوادم السيارات🤦🏽♀️..، بعد وصلنا البيت قلت ليه دق ع اهلي، قال لي ارتاحي شوية بعدين بندق عليهم، قلت ليه يعني انا تعبت لمن ارتاح؟، امشي ارتاح انت انت التعبت..، دقيت على دانية ردت وسامعاها بتقول لعدنان عدناااااان الملح في جمب البوتوجاز كب شوية م تخرب لي الاكلة،بعد ردت قالت لي اي يغدير، قلت ليها طيب قولي لي حمدلله ع السلامه؟!، قالت لي ليه في شنو ؟،قلت ليها انا في السودان يا طيرة داقة ليك من رقمي السوداني، قالت لي كيف يعني؟، غدير انتو في السودان؟ اصلو م بصدق!!!، جيتو مالكم حاصلة ليكم حاجة؟، قلت ليها نحن كويسين بس جينا بدري، قالت لي طلقك؟، متتتت ضحكك قالت لي م تضحكي جادة معاك، قلت ليها يطلقو روحك طلقوني شنو انتي التانية، قالت لي غدير في شنو جايين بدري مالكم؟، قلت ليها بكره تعالي لي، قالت لي غدير في شنو م تخوفيني!، قلت ليها بحكي ليك بكره نحن يدوب جينا داخلين البيت، قالت لي طيب مع انه خايفة شديد، قلت ليها م تخافي كلو خير ❤️، قالت لي برضو م مطمنه، قلت ليها اقطعي وشك ماشة انوم انا...
يتبع....
