حقيقة موت زينب قدر يهزمني،شوفة الدكتور وهو بغطي وشها وهي خلاص فارقت الدنيا م قادرة تفارق بالي، آخر ايامها كانت سعيدة بيها جداً، زينب ماتت بسكتة دماغية،امها بقت وحيدة وبتها حنين ح تمش وين! 💔، لمن شفتها بالمنظر دة حسيت انه رئتي اتكرمشت للنهاية وفقدت قدرتي ع التنفس نهائي! 💔..، البتذكرو اني قعدت جمب الغرفه وبقيت ببكي ومخنوقه وبتشهق، بكيت لمن قصبتي الهوائيه وجعتني، تقريباً فقدت وعيي وانا بالصورة ديك،حسيت انه دة كان كلو حلم!،صحيت تاني وكنت م مرتاحة، امين قاعد بعاين لي، واهلي كلهم معاي، لمن صحيت كلهم انهالو علي انت كويسة حاسة بحاجة؟...، إلتفت على امين قلت ليهو زينب!...، قال لي إنا لله وإنا إليه راجعون 💔، دموعي خذلتني، حبيتها من كُل قلبي، كفاية خسارات، ليه الحياة بتاخد مننا الناس الكويسين أمثال زينب؟!، ليه الحياة م بتحب تعدل معانا؟!،امي،ابوي واخوي فقدتهم مرة واحدة،الزول الحبيتو من كل قلبي خذلني وكسرني، قربت اموت واكتل ولدي، وحالياً انا على بعد سنتيمترات من الموت! 💔...
" الثالث من مارس "
موت زينب أثر علي بشكل كبير، مع انه هي م قعدت معاي كتير لكن والله دخلت قلبي واتربعت فيهو 💔، امين كان ملاحظ للحاجة دي وبحاول يخفف علي بقدر العندو، جاب لي راوتر وايفاي عشان اقدر اخش اليوتيوب واحمل افلام وكدة عشان انسى الحصل، انا مقدرة البعملو معاي لكن لسة في حاجة فيني اتهزت!...في يوم كنت بحضر في فلم، جاني امين فرحان وحضني، انا اتخلعت طبعا،قلت ليه في شنو؟!، جا الدكتور داخل وراهو قال لي لقينا ليك رئتين!..لمن قال لي لقينا ليك رئتين حسيت اني ح اقوم ارقص ليهم، زي الشافع يوم العيد يكون متوقع يدوهو ٥ جنيه بس يدوه ٥٠٠ 😂💛، م كنت متوقعة انه حاجة زي دي تحصل!، الدكتور قال لي والله حصلت مُعجزة ، بت قدرك كدة كانت معانا في المستشفى واتوفت لكن الغريبة والمفاجأه انكم نفس زمرة الدم ونفس العمر وتطابق في اي شي!، يعني احتمال انه الجسم يرفض العضو الجديد دة مافي!..قلت ليهم دقيقة، البت ماتت متين ؟، قال لي قبل اسبوع كدة، قلت ليهو المريضة دي اسمها زينب صح؟، قال لي اي،عرفتي من وين؟، قلت ليهو انا م موافقه اني استقبل عضو منها!..امين قال لي غدير!، استهدي بالله!، الحاجة دي نحن من متين مستنينها؟؟، قلت ليهو امين م تناقشني ،الزولة دي كانت في يوم من الايام صحبتي، بكل سهولة انا اجي اخد رئتيها؟، م تناقشني الموضوع دة منتهي!..امين زعل، زعل، زعل زعَل شديد، ابى يتكلم معاي، اليطق!، يطرشق دة قراري وانا مقتنعه بيهو، اي زول بعرفو جا يحنسني وانا رافضة الموضوع تماماً، طنط جات وبكت لي وبقت تحنسني لمن زعلت ومشت، دان جات حنستني وزعلت ومشت، كلهم جو يحنسو وزعلو ومشو!،هل الحاجة دي صعب تتفهم؟، انا مستحيل اعمل حاجة زي دي في حياتي، كأني قتلتها!، م مستعدة اتحمل ذنب زي دة!...زي م قلت الناس كلها جات وبتحنس فيني، لكن الزول الوحيد الما إتوقعتو يجي هو فهد، الراجل دة انا نسيتو عديل!،الليلة جاني، لاحظ اني إتفاجأت بجيتو دي، قال لي أكيد م متوقعه إني اجيك صح؟، قلت ليه طبعاا م اتوقعتك،قال لي طبيعي،انا م جاييك عشان اتونس معاك او كدة، انت عارفة انا جاي عشان شنو، قلت ليه بس م عايزة مناقشة في الموضوع دة، قال لي م على كيفك ي غدير، انتي م شايفه اهلك حالتهم كيف؟؟، م شايفة قلقهم عليك وخوفهم دة؟، قلت ليه فهد عليك الله...،قاطعني قال لي م كنت قايلك بالانانية دي والله، بقيت بعاين ليهو،قال لي يعني بجد م اتوقعتك تطلعي كدة، ياخ لو م عايزة تعيشي لروحك عيشي لراجلك ولولدك ديل!، امين لمن جا ووراني واقسم بالله ياغدير كان ببكي! ،وانت هنا مقوية راسك عشان البت كانت صحبتك! ،ياخ حرام...، قبل م يتم كلمتو دي جات ام زينب خاشة، سلمت علي وعلى فهد، فهد قال انا استأذن قالت ليهو خليك ي ولدي،قعد، قالت لي ي غدير ي بتي طبعا انت عارفه انك بمكانه زوبه الله يرحمها، زينب من زمان وصتني انها لمن تموت يتبرعو ليها بأعضائها، والليلة لاقاني راجلك ووراني الحاصل معاك، يابتي طالما ربنا كتب ليك عمر جديد انتي بترفضي ليه؟، زوبه لو كانت عارفة م كانت ح ترضى تشوفك بتموتي بالبطيء كدة، عيشي حياتك يابتي واستثمري باقي عمرك دة، م تكوني جاهلة وترفضي فرصة زي دي، انا امها بطلب منك تعملي الحاجة دي، عشان خاطر زينب ياغدير 💔..زينب وصت تتبرع بأعضائها في حال أنها ماتت، وماتت فعلاً، لكن أنا لو قبلت الحاجه دي تأنيب الضمير م حيفارقني، ام زينب كأنها فهمتني، قالت لي لو ضميرك م مرتاح للحاجة دي احب اوريك حاجة، زينب كانت حاسة انها ح تموت قريب ووصتني بأنه رئتيها ديل يكونو ليك إنتِ، زينب أهدتك حياتها ياغدير، ح ترفضيها؟!...فهد بعاين لي وهي بتعاين لي، فهد قال لي غدير استخدمي عقلك المرة دي، إنتِ زولة واعية وعاقله وعارفه أنه دة الصح، ودة الحيعالجك وحيخلي أهلك يفرحو بيك، ام زينب قالت لي دي كانت وصية المرحومة ياغدير، ويشهد الله معزتك عندي زي معزه زينب بتي 💔، قلت ليهم طيب، انا موافقة!..بعديين،امين جا وعامل فيها زعلان لسة، قمت مشيت قعدت جمبو ومسكت يديه، قلت ليه امين حبيبي الحِلو 🥺💛، قال لي مالك،قلت ليهو بقيت م بتحبني صح؟، قال لي اختصري، قلت ليهو بايخ وسخيف وانا غلطت لمن وافقت ع استقبال العضو زاتوو 🤦🏽♀️💔، بقى بعاين لي،قال لي وافقتي؟،قلت ليهو اااي وافقت وشكلي حغير رأيي،قام شالني ولف بي قلت ليهو حموت ي مجنون نزلني 😂😂، قال لي احسن خبر سمعتو في الفترةة دي، غدير يوسف انا بحبك شديد ي بت الناس بحبك شديد بحبك شاااااديييييييد وبقى يكورك قلت ليهو الجن اليركبك م تكورك! 😂😂😂😂،قال لي يزولة انت مرتي ودي طريقتي في التعبير عن مشاعري، قلت ليه مشاعرك دي خليها في البيت م تفضحنا مع الناس عليك الله 😂😂😂،حضني وقال لي م تتخيلي قدر شنو انا مبسوط ياغدير، الله يخليك لي ويحفظك ياخي بربييدكك ريده م ممكن تتصوريهاا ابدا! 💛..معقوله انا كُنت حارماه من فرحه زي دي؟، دة ياتو غباء دة، مخي كان وين الفترة الفاتت؟،ااااه، دة من اعراض المرض زاتو عدم القدره ع التفكير 🙂💔، الحصل تاني انه امين كلم اهلي وكلهم جوني واي واحد يبوس ويجضم ويحضن حسيتني ح انفجرر 🙂...، الدكتور جاني والعملية إتحددت بعد ٣ يوم، بعد ٣ يوم ح ابقى غدير الجديدة كُلياً 💛..
