مذكرات ويوميات يمنية ⛅

قصة حقيقية عن عمو كورونا

هلوو .. يللا نبدأ

هذه القصة حقيقية حصلت في احد بنوك الكريمي ..

وتم تصويرها بأحد كاميرات المراقبة ..

كان العم (الشيبة ، الشيخ ، العجوز) يحاول يدخل والحارس حق البنك مانع له والسبب؟؟

صح 😽
.. العم ماكان لابس الكمامة .. جلس الشيبة هذا يتراشى (يطلب ، يحاول مع) الحارس انو يدخل ويقول له :
والله والله ياولدي ادخل اصرف الفلوس من الحوالة واخرج ساع الطير (سعم يقصد بسرعة)

والحارس يقول له :
ياعم يمين ان لا يطردوني ابسر (شوف) كاميرات المراقبة لا يدروا بي (يعرفوا عني) لا يطير الراس (ينطرد من الوظيفة) ..

والشيبة مصمم يدخل بسرعة ويخرج ..

والحارس يحاول يفهمه انو عشانه وعشان حياته ..

فجأة يخرج شيبة ثاني من البنك .. ويشوفهم ، يقوم يجي لا عند الشيبة اللي مع الحارس ويخلع كمامته ويعطيه اياها😂😂😂

ويقول :
هااه ياخي شل تيه (خذ هذه) وادخل سهل ..

والشيبة الاول يحضنه ويشكره ويقل له :
تسلم تسلم ياخي .. هاه شل الميه ريال تيه (خذ هذه المائة ريال) قيمة الكمامة ..

وهنا الطامة الكبرى ..

يقل الشيبة الثاني :
سهل سهل ياخي هي اصلا مش حقي .. هو انا كنت قبل عشر دقايق مثلك حانب مودف (ذي مدري كيف اشرحها يعني مزنوق في ورطة مشكلة كذا يعني) .. جاء واحد الله يفتح عليه ادالي (جاب لي) الكمامة اللي في يدك وقلي ادخل بها .. وانا اوذاني بين اديها لك .. (يعني الان انا اعطيها لك)😂😂😂

واحدة من طرفات كورونا عندنا ..
😂😂😂😂😂😂😂😂😂😂

الله يستر علينا بس😄😄

كومنتااات💕
مواقف حصلت لكم مشابهة💘