وجودك جنة حياة

part 10

لا اله الا انت سبحانك اني كنت من الظالمين

__________________________

#بتمنى في يوم الصفاح ايدك تقالد ايد ابوي يشهد على بيت الحلال زولي السمح سندي واخوي❤..

__________________________

#بعد كدة حنكمل بلسان نازلي ..

بعد خلصنا ولبست الاسبورت لي إيفا ،،شلت شنطتي وطلعنا من الغرفة ،،،بقيت ماشة في ممرات المستشفى وانا شايلة إيفا ،،،، لغاية ما طلعنا من المستشفى لقيت فهد واقف بعيد شوية ،،،اول ما شافني جانا ،،،شال مني إيفا لانو شنطتي كل شوية كانت بتقع مني ،،،مشيت بوراهم لغاية ما وصلنا السيارة ،،،ركبها بي ورا وانا ركبت معاها ،،اما هو ركب قدام في مكانو ،رقدت إيفا في رجولي وانا بمشي يدي في شعرها لغاية ما حسيت بيها نامت ،،رجعت راسي لي ورا وتكلتو على الكرسي،،،سألني فهد

فهد:الدكتور قال ليك شنو ؟؟

رفعت راسي وعدلت قعدتي :الصباح كانت بطنها واجعاها ،وانا اديتها دواء وعلى معدة فاضية ،،ف دة كان سبب الاستفراغ اما انو اغمي عليها ف كان بسبب انو ما اكلت حاجة

فهد :اهاا ،بس غلطتي ما كان تخليها تمشي المدرسة طالما بطنها واجعاها من الصباح

نازلي :كان عندها امتحان ،قلت ليها بعد تمتحني تتصل علي بس نست

بعد كدة تاني ما أتكلم معاي ،،وانا سكت ورجعت لي قعدتي ورجعت راسي لي ورا وبقت اعاين في الشباك ،،،

نازلي :فهد ممكن توقف هنا دقايق بس

لف علي وقال :مالك في حاجة

قلت ليهو :بس عايزة اجيب الادوية دي

فك حزام السيارة ومدة يدو :جيبي انا البجيبهم

قلت ليهو:ما مشك...

وقبل ما اكمل كلامي قال لي :جيبي قلت ليك ،،،اديتو الوصفة بدون ما اتكلم ،،اما هو طلع من السيارة على طول بعد ما اديتا ليهو ،،،عاينت ليهو من الشباك وهو داخل على الصيدلية ،،،بعد كم دقيقة كدة جا طالع منها وفي يدو كيس الادوية ،،،فتح باب السيارة ولف علي ومدة يدو ناولني الكيس ،،،عايزة اقول ليهو شكرا وفي نفس الوقت خايفة يفشلني بس عيب علي كان انو ما اقول ليهو ..

شكرا ،،قلتها بعد تفكير وتفكير ،،،بس هو المرة دي قال لي العفو وابتسم ولف وبقا سايق ،،بعد شوية ضربت لي انجيلا الفلبينية الي بتشتغل معاي ،،بتسألني لي اتأخرنا ،،قلت ليها الحصل بإختصار وبعدها قفلت منها

اخدنا ربع ساعة عشان نوصل طبعا بعد ما وصفتا ليهو ،،،نزلت من السيارة وهو كمان نزل جاني بورا ودخل جوا السيارة شال إيفا وطلع وقفل باب السيارة ،،،مشيت قدامو وفتحت باب البيت بالمفتاح العندي ،،،اول ما دخلنا جات انجيلا طالعة من المطبخ ،،،دخلنا غرفة إيفا ،جا فهد ورقدها في سريرها ،،بعدها طلعنا من الغرفة بعد ما قفلتها عليها ،،،، نزلنا تحت و وقفنا في الهول

قلت ليهو :اتفضل اجيب ليك حاجة تشربها

قال لي :لا لا مافي داعي ،مفروض امشي اتأخرتا

قلت ليهو :طيب اجيب ليك موية

قال لي :طيب ممكن

مشيت وندهت على انجيلا انو تجيب موية وهو قعد في الكنبة ،،،بعد جابت الموية وشرب قام وقال لي :يلا مع السلامة و ..وإيفا اااا اسمها صح ؟؟

ابتسمت ليهو وقلت :اي إيفا

قال لي:ما تشوف شر ،،

قلت ليهو : تسلم وشكرا واسفة برضو الليلة تعبت معاي

قال لي :العفو ما عملت حاجة ،مع السلامة ،ولف على جهة الباب وطلع ،،، اما انا ف قعدت في الكنبة وانا تعبانة ،،كنت متغاظة منو عامل نفسو الطيب والشريف ،،اخخخخ بتين بس تجي اللحظة التدخل فيها السجن واشوفك بتتعذب ،،،،من التعب نمت في مكاني وانا ما حاسة ..

.

.

.

صحيت على صوت انجيلا وهي بتقول لي انو انوم في غرفتي ،،،صراحة لو ما صحتني كان رقبتي اتكسرت لانو كانت واجعاني شديد ،،،قمت من مكاني وانا بتثائب وطلعتا فوق على غرفتي ،،،دخلتا الحمام وبدلت ملابسي ولبست لي بجامة واتوضيت وطلعت صليت وبعدها على طول اترميت في السرير ...

يتبع ..