وجودك جنة حياة

PART 18

لحظة امتلاكي لك وكأنها لحظة إمتلاك الحياة.🕊❤️

::::::::::::::::::::::::::::::::::::::::::::::::::::::::::::::::

جيت السودان هنا عشان افتشها ،، فتشت وسألت عنها كتييييير بس ما لقيتها في الفترة دي كان اتعرفت لي على مرة كانت طييبة شديييد كان عندها ولد واحد والي هو ابوهو لفهد ،،، قعدتني عندها بعد ما حكيت ليها قصتي  واهتمت بي زي كأني بتها ودخلتني الجامعة ،،،،لما جيت السودان كان عمري 16 سنة بس ،،،لغاية ما اتخرجت من الجامعة وكنان ابو فهد كان خلص الجامعة قبلي بسنتين ،،، عملنا مشروع وكان ناجح وشوية شوية الشركة بقت تكبر وبعدها  اتزوجنا انا وكنان ،،، وجبنا فهد ،، وحاولت تاني اني افتش على امك بس ما لقيتها 

قلت ليها :كانو في باريس الوقت داك و بيبنو في شركتهم 

فضلنا قاعدين كدة ،،انا في حضن خالتو هيلدا ،وفهد واقف ومدخل ايدو في جيبو ومنزل راسو 

قمت من حضن خالتو بسرعة وقلت ليهم :نسينا ايفا وتولين 

خالتو هيلدا :ايوة صح والله نسيناهم

فهد : حأمشي انا اجيبهم ،،، مشا وجا راجع وقال لينا :الملف وين نسيتو 

كنت شايلاهو في يدي:هاك ليهو ،،،،شالو ومشا طلع 

رجعتني تاني لحضنها وهي بتمشي بدها في شعري :والله لغاية هسة ما مصدقة 

قلت ليها :ولا انا 

خالتو هيلدا :حتجو وتقعدو معانا انتي وايفا 

قلت ليها :معليش يا خالتو بس هناك نحن مرتاحين والله

خالتو هيلدا:لا مافي كلام زي كدة حتجو وتقعدو معانا اساسا البيت فاضي مافيهو غيرنا انا وفهد وتولين

قلت ليها :والله يا خالتو نحن هناك مرتاحين بس بوعدك انو كل ويكند نجي عندكم 

خالتو هيلدا :طيب تمام طالما انتي مُصرة 

:::::::::::::::::::::::::::::::::::::::::::::::

رجعنا انا وايفا بعد ما قعدنا معاهم شوية وتحت اصرار خالتو هيلدا على اننا نقعد معاهم.....

رقدت في السرير بتعب وانا بفكر..

هه شوف الدنيا دي ضيقة كيف ،،، معقول هسة خالتو هيلدا تطلع خالتي واخت امي ولا فهد ولد خالتي ،،،اتزكرت لما كنا بنختار صالة عرض الازياء انا وفهد وكيف كان بعاين لي ،،ابتسمت بدون ما احس ،،، بقيت بفكر فيهو لغاية ما فوقتا على نفسي ،،،، دة شنو يا نازلي طلعي الافكار دي من راسك ما تنسي انو قتل اهلك ،،،،بس معقول يكون كان عارف انو انا بت خالتو وقتلهم ،،،، طيب انا انا كدة حأاذي ولد خالتي .....

وكالعادة نمت بدون ما احس ..

:::::::::::::::::::::::::::::::::::::::::::

الصباح ..مشيت الشركة حقتي وقعدت اشتغل في الملفات وبشيك على الفاكسات البتجيني ،،، تلفوني اتصل شلتو لقيتو د.وائل 

انا :الو 

د.وائل :الو، اهلين

انا:يا هلا ،كيفك د.وائل 

د.وائل :الحمدالله كيفك انتي وكيف ايفا

انا :بخير الحمدالله نحن 

اتكلم معاي كتييير وبعدها قفلنا من بعض 

و واصلتا شغلي ،،،لغاية ما باب المكتب دق 

انا :اتفضل 

دخلو فارس و فهد ،،،،ابتسمت وقمت مشيت ليهم وسلمت عليهم و بعدها قعدنا كلنا 

فارس :قالو لي طلع فهد ولد خالتك يا نازلي 

ضحكت وقلت ليهو :اتخيل بس!!

فارس :والله ان ما صدقت كلو كلو

قلت ليهو :ولا انا والله لغاية هسة ما مستوعبة الحصل 

اتكلمنا مع بعض ،،مرة في الشغل ،،،ومرة برة الشغل لغاية ما قالو انهم خلاص عايزين يمشو

قلت ليهم :صح قبل ما انسى عيد ميلاد ايفا بعد بكرة ياريت تجو في البيت

فهد:بجد !! العمر كلو ياارب ،حيبقى عمرها كم

قلت ليهو:حتبقى 10 سنين 

فارس :خلاص قداام طوالي بنجي يا زولة 

قلت ليهو :تشرفو ،،، بعد ودعوني وطلعو انا قعدت في المكتب شوية وبعدها طلعت بعدهم بساعتين ،، مشيت لمحلات عيد الميلاد واشتريت بوالين وزينة وشموع وحاجات كتييرة وبعدها مشيت لي محل الكييك وحجزت لي اتنين ،،بعدها رجعت البيت وخليت الحاجات في السيارة  عشان ايفا ما تشوفهم..

يتبع...