عسكري على البال "حُماتي"

تعب

#عسكري_على_البال "حُـماتي"
الحلقه :الاولى
بقلم:فاطمه سالم الورفلي
...........
......
امي مدتلي ربطه معدنوس:هاك وازي المعدنوس كويس ره اليوم خالاتك بيجو

اني :اوووف يمااا هدي الربطه التالته

امي :وكان هدا شنو... يا نويرتي على روحي لي كنت كيف طقاشه ....وندير ونحط ونطيب وقايمه بي عيله وسبعه ولاد....تي ديري ديري يا عار اندادك بصغارهم وفاتحين حياش

اني بهزوه :اني بنفتح محل مانبيش حوش يما بالله خليني ترا على قد ما ندير عندك فالصو

امي :وهدا الحق... غر افتحي افتحي اغنيه لي فاطمه احمد وفكيني من نشافك ترا

اني قرنت حواجبي ونفضت ايدي من المعدنوس ومسحتها في قفطاني...

امي تشبح فيا من تحت لتحت حدفتلي المنشف طايرتلها: تي هاك منشف امسحي فيه بلا زطن

اني خديت المنشف بعصبيه ومسحت فيه بي غل غلي بننفجر... من الصبح ملاحظات ونفخ...وخديت التليفون وفتحت على اغنيه "نسقيـك يا نوار "

امي ادندن مع الاغنيه:نسقيك يانوار
صوب الغلا صافي وفي لقدار
نسقيك يانوار نروي جناناتك زهى لنظار
نسقيك من الوجدان نهر الغلا يروي الي عطشان
والقلب في حبك يفيض حنان والعقل في صوبك عشق مشوار
نبيك زهو ايامي في غيتك يكبر ربيع احلامي
ونسقي زهورك وين تبقى ضامي ولاعاد من طول الرجا تحتار
نسقيك ود الروح يفتح ربيعك بالعبير ايفوح ولك خاطري بشوق المحبة ايبوح بك هايمة تغني بطرب لوتارا

اني قعدت نشبح لي ماما كيف منسجمه وتقرض في المعدنوس...تأفأفت وقلت في خاطري....الحمدالله اخيرا ح تسكت وتفكني من محاضراتها... قعدت نوازي في المعدنوس بسرعه... نبي نكمل باش ندوش لان ريحتي معدنوس صافي.. وبنغير حوايجي قبل ما يجو الفيـلق عاد بيبدو في التشقليع وتدليع...الصببر وخلاص...

امي شبحتلي يقرنه حاجب :اللطف اللطف تقول يجرو وراك .... اسرااء تي ديري كويس وبالشوي

اني شبحتلها بعصبيه...وواسيت تقعميزتي وقعدت على ركبه ونص نوازي بسرعه ونشنتل...

امي :الفجي وخلاص

......
ماحبيتش نرد علي امي... كملت لي في ايدي فيسع ونضت...

امي :تي وين مسقده وين ؟...مزال يا حنه في ربطه تحت الطاوله خودي وازيها عن ترمض

اني عقدت حواجبي وقعدت نلاطع بيديا:وووك يما انتي طلباتك ما تحزش وعارفه بنات خواتك وحتى خواتك يقعمزن كيف البيات ويروحن و ولا كأنهن و ولا وحده تقول حتى بلكدب نعاونك وهدا كوم ولما يروحن نبدا اني ميعاد في كل للمة... ويبدن عاد حي شفتيها ؛ حي كان ريتي شن لابسه وحي ....وحي عاد هدا وين يزهالهن الجو و....

امي قرنت حواجبها ورفعت ايدها فيها الموس وقطعت على كلامي وقالت :باااهي خلاص بري ديري لي بديريه وريحيني يابنت....