لا يناسبني

مطار

2020/6/22

الله سبحانة وتعالى يختارلنا  شغلات احنا مو حابيها بحياتنا.. بس اكيد حتكون خير.. لان الرب مستحيل يأذي عبادة ويخليهم بألم وكل شي ينطي النا هو خير وراحة بالنهاية
بس احنا نظل نتذمر ونعيش بحالة من الخيبة، الوجع والالم بس لان ما تحقق مرادنا بالشي الي احنا نريدة

جان تفكير هديل هيج..
الله ينطينا شي ويأخذة منا لان يريد يراوينا اشياء حلوة ثانية  احنا ممتوقعيها
اما سيف فكان تفكير مختصر بس بتملكة للشي الي يريدة ويحبة

يا ترى هالثنائي رح يوصل للي يهوو ؟؟

هديل: حمد لله على السلامة

استقبلتة بأبتسامة من جانت بصالة الانتظار واكفة منتظرتة

عصام: الله يسلمج
شكرا لان اجيتي واستقبلتيني.. تعبتج

هديل: والله كلت ما الك غيري هنا
فقررت انو اجي استقبلكم لان مو حابة تتبهذلون وية السواق الي برة ومتندلون الطرق

ضحكت وهو هم ضحك وجاوب بتكبر

عصام: شكرا عيني..  ازعجناج

هديل: ولو.. خالد وين؟

عصام: جنطتة بيها غراض هواية ولازم يدفع غرامة لان وزن

هديل: اوك..

عصام: تعالي خلي نكعد هنا ننتظرة

هديل: لا امشي نروح للسيارة هنا باردة شوية
من نوصل اتصل بي خلي يجينا

عصام: اوك لعد  امشي

راحو كعدو بالسيارة منتظرين
اتصل خالد على عصام وحدد مكانة علمود يجي

عصام: حيموتني هالولد

هديل: الي يشوفكم يكول انت الجبير مو هو

عصام: مرات صدك احس نفسي اني الجبير مو هو

هديل: اي... سولفلي وين حاب تروح اول شي ببغداد؟؟

عصام: والله اهم شي عندي حاليا اوكف يم دجلة واشم هواهة
كلش مشتاقلها... ممكن نروح سوة

هديل: اوك.. شوكت ما تحب نروح 

عصام: اجازتي بس سبوعين وتخلص ..... اريد افتر العراق كلة

باوعتلة شوية وراها كالت

هديل: ما يعجبك تبقى بالعراق؟

زفر نفس والتفت

عصام: بصراحة.. كلش يعجبني..
بس حياتي صارت هناك.. صح ما عندي احد  وما عندي اصدقاء بس تعودت على العيشة هناك
فمو حاب اعوف المكان الي نشأت بي
وهم شغلي مو مال اعوفة

هديل: زين اذا حبيت العيشة هنا وصار عندك اصدقاء واجتك فرصة عمل هم احسن من دبي.. تبقى

عصام: يرادلها تفكير هوواية هاي

هديل: الله كريم.. بلكت تدبر

باوعلها صفح وضحك

عصام: شنو ترديني ابقى؟

هديل: اي ليش لا... حرامات العراق يخسر شخص مثلك وهم حياتك اغلبها هنا
هناك ما عندك اصدقاء ولا عندك اهل
اقلها من تحتاج شي تلكي فزعة

عصام: ماشي.. ححاول اغلس

هديل: على شنو تغلس؟

عصام:لا هيج.. ولا يهمج

شافهم خالد من بعيد رفع ايدة وسلم فتحتلة الصندوك حتى يحط غراضة

عصام: لا جيب طاري الرجعة للعراق كدامة.. هذا ميصدك يريد يبقى

هديل: تمام

صعد خالد ورة وسلم

خالد: هلاوووو شونج هدولة..

هديل: يا هلا يا هلا... حمد لله على السلامة
شونك؟

خالد: بخير والحمد لله

هديل: الجهال شونهم.. ؟

خالد: تمام...يسلمون عليج خاصة اياد كال من توصل خلي تخابرني كامرة

هديل: اووك يدلل استاذ اياد

عصام: خالد وين رح نروح؟؟

خالد: بكيفك.. تحب نروح فندق لو نروح لبيت جدنا من هسة؟!

عصام: لا الفندق.. نذب غراضنا هناك ونرتاح وراها نروح

هديل: ماكو هيج حجي.. تجون يمي بالبيت
بيتنا جبير وبي غرف هواية وكبار
وماما اكلها طيب وعادل ومصطفى هناك هم علمود تتسامرون سوة بليل وطلعون هم

عصام: لا لا هديل منكدر عفية 
بدون ازعاج منريد نضوج احد

هديل: ماكو اعتراض.. ممنوع.. نروح للبيت وهاهية
خلونا اقلها نظل سوة وتتعرفون على ناس هنا مو تكضوها بالفندق واني هم اريدك تساعدني بالشغل اريد استشيرك بكم شغلة

خالد: لا تحاول تتناقش وية مرة ترة تغلبك اول وتالي
فأقبل وظل ساكت

تأفئف وسكت

عصام: صاااار

اخذتهم للبيت ورحبو بيهم ترحب تام وتغدو سوة وحضرولهم غرفة جبيرة يرتاحون بيها
اكفة هديل على السنك تغسل مواعين جان يجي عادل يوكف بصفها

عادل: بربج الي يشوفج كل يوم جايبة رياجيل لبيتنا شيكولون علينا العالم

حجة وضحك وهية هم ضحكت

هديل: يي مو زين دا اجيبهم للبيت ما اوديهم بغير مكان المفروض  تحمد ربك

ضحكو وجان ينزل عصام

2020/6/25

وعد اليوم بليل انززلكم بارت  هذا تصبيرة بس 🌹😘❤️