part1 الساعه 2الليل الحوش كله فاقو على الخبر الكل يدور اللي يلبس واللي يولع في سيارته وللي يبكي خبط على باب الدار بقوة فتح الباب عين مفتوحه وعين مسكرة:شن فيه الباب قريب تجيبه عل راسك محسن:تي الدنيا غابرة وانت في سابع نومه فارس:وشن صاير يعني حناي ومسيبها وضعها تمام التمام شن فيه محسن:عمك عامر توفى فارس:نعم خيرك هبلت محسن:زي مانقولك دار حادث توا في طريق الشط وتوفى في مكانه فارس تلفت حدفله المفتاح:ولع سيارتي اني نازل وراك عبد الله يبكي في ممر المستشفى:ااه ياخوي ياكبيرنا مالحقنا نشبعو من شوفتك بعد هالسنين اااه يارب ارحمه فارس طلع من الثلاجه:البقاء لله وانتصبت الخيمة لعزا عامر الاخ الكبير..... تعالو نعرفكم عالعيله flash back عيلة الجارح متكونة من 3رجاله وبنت بوهم مات من 15سنه وخلى كل الرزق والاملاك في يد ولده الكبير بما انه اكثر واحد مسؤول بين صغاره ووصاه يدير باله من كل شي ليوم يكبرو خوته ويبدو ناس مسؤوله ويقسم عليهم الورث بالشرع والقانون فيروز الام مرا مسيطرة شخصيه قوية وصارمة عرفت تقود حوشها وحياتها بعد موت راجلها تحب ولادها كلهم وقدرت تحتويهم وكانت واثقه في قرار راجلها وربتهم عااساس يحترمو خوهم الكبير ويقدروه وانه هوا بعد بوهم المسؤول عالعيله عامر الاخ الكبير شخصيه قويه مكرس كل حياته للخدمة واهتمام بعيلته ورزق بوه عبدالله الاخ الثاني بعد عامر اصغر منه ب5سنين كان كل همه الطلوع والمشاوير وتغيير جوه بس يحب الفلوس ويبي كل شي تحت رجله كبر وهوا حاقد على خوه لانه وقف عليه الصرف وخيره ياالشغل في شركات العيله يا يدبر من وين يصرف عصام الاخير في الشباب هدا مايحبش الا نفسه وديما يبي كل شي ليه بروحه مستعد عاخاطر مصلحته يدير اي شي وطبعا يبي كل الاملاك والرزق ليه يخدم في الشركات بس اكثر من مرة يصير اختلاس وعامر يلم وراه لحد مايوم قله شد حوشك ومعاش تشتغل وهنا كبرو عبد الله وعصام بحقدهم وكرهم لخوهم عامر اللي كانت فكرتهم عليه انه يبي كل الفلوس ليه بروحه حورية الاخت الصغيرة تربت عالدلع واللي تطلبه يكون قدامها متعلقه بعامر هلبا وديما واقفه معاه بس من يوم سيبها وسيب البلاد هيا قررت تسيب الحوش اللي كرهاته بعد خوها تزوجت من اول شخص طلبها وبعدت على عيلتها عامر مكرس حياته كلها للخدمة وكل ماامه تقوله تزوج يرفض بحجه انه مايقدرش يوفق بين عيلتين وشغل قررت فيروز تزوج عبدالله وعصام لعل وعسى يعقلو ويشدو مع خوهم ولو جزء من الحمل الكبير دارتلهم عرس كبير وخدتلهم بناويت خوها الزوز سعاد لعبد الله ومنيه لعصام عامر فرحلهم وقاملهم القدر وعطا لكل واحد فيهم 5الاف هديه عرس غير المصاريف واثاث الحوش كل واحد فيهم دار عيله وصغار بس ماتغيرتش فيهم ولا حاجه مزالو عانفس الطبع والتصرفات راقدين شاربين واكلين وعامر يصرف والكارثه في كل اجتماع هما على رأسه 🤦♀️ جي يوم انقلبت فيه العيلة كلها عصام سبب في خسارة كبيرة للشركه لدرجه انه عامر خسر هلبا تعاركو الخوت في بعضهم ولامو عامر عاكل شي وكل واحد طلع الحقد اللي في قلبه عبدالله:هدا غير بوي مخليله الرزق في رقبته اهو هده علي راسه عامر:شن علاقتي انا هدي بيعه من داخل الشركة عصام:تي تحشم على عمرك ياراجل بيعه شنو عامر:توا شن تبو عصام:تسيب كل شي وتشد حوشك انا وعبدالله نكفو ونوفو عامر:تسمعي فيهم يما فيروز:وانتم من امتا تخدمو من طول عمره عامر شاد كل شي عبدالله:اهو خسرنا نص املاكنا بسببه اسمعني هما كلمتين تسيب كل شي وتقلب علينا وجهك عامر:هدا اخر كلام عصام:ايه عامر:تمام ياخوتي ياعزوتي عبدالله:اييي عاد فيروز:ماتنسوش هدا الحوش شاريه خوكم ولولاه كنا توا في الشارع عبدالله:شن بيجمل علينا عامر:لا نجمل ولا شي انا خديته لامي واختي ومن اليوم مخليها ارتعو فيها ياولاد الجارح فيروز:ولدي عامر:سامحيني يمي انا بلاد هدي مانقعدش فيها اهو صغارك جنبك وانا مش قاطعك وقت تبيني تلقيني وفعلا بعد اسبوع صفا كل حساباته في الشركات وسافر لي لندن ومن يومها فيروز حالها ادهور بعد ماصغارها تفرقو وبنتها تزوجت قعدت وحيدة عبدالله وعصام يشوفوها مرتين في الاسبوع فاتو سنين وسنين وسنين وكانو صغارهم يهتمو بجداهم ديما ويحبوها بس هيا قلبها معلق في ولدها اللي بدت علاقتهم مربوطه باتصال هاتفي وبس لحد يوم طاحت من طولها طلع من غرفه العمليات:انقلو المريض للعنايه ممرضه جت تجري:دكتور والدك وعمك تحت وطالبيك فارس:شن فيه نزل يجري عصام:الحقنا حناك طاحت علينا فارس:شن صارلها عبدالله:مانعرفوش خش شوفها توا تعالو نحكيلكم على صغارهم عيلة عبدالله ولده الكبير فارس عمره 32سنه دكتور جراحة عامه شاب طول بعرض نقشه عالاسمراني عصبي وديما في حاله و حياته الخاصه بعيد على مشاكل بوه وعمامه فدوى عمرها18سنه بنت هاديه هلبا ونادرا وين تقعمز مع العيله وتشارك في احاديثهم يالاهيه في قرايتها او مع جداها فادي عمره10لسانه ملوي على رقبته والمصدر الاول في نقل الاخبار في الحوش عيلة عصام ولده الكبير هيثم عمره27سنه متزوج وماعنداش صغار نسخه من بوه في كل تصرفاته سمر عمرها23سنه متخرجه من اعلام وتشتغل في اذاعه هدي عاطيين فيها كلمة لفارس اللي يطيق العما ومايطيقهاش بينما هوا بالنسبه ليها فارس احلامها 😍🤭 محسن عمره20سنه اهتمامه الاول والاخير هاتفه ومواقع التواصل الاجتماعي يحب الكل ومايحقد على حد ساكن مع جداه وديما معاها اما عيلة حوريه ولدها الكبير مروان عمره 29سنه محامي مقيم في لندن بنتها نهال عمرها24سنه دكتورة اسنان فارس طلع:حناي جتها جلطة عالدماغ بس خفيفه عصام:لاحول ولا قوة الا بالله فارس:تبي عمي عامر عبدالله:ايح حتا بعد هالسنين مانساتاش فارس تعصب:تي خيرك انت فيه ام تنسا ولدها عبدالله:تكلم كويس واحترم روحك فارس:تفضلو روحو قعدتكم مامنها فايدة وحطو في حسابكم عمي رح نكلمه ونطلب منه يجي لامه مرات مايلحقش يشوفها عصام بحده:اي طبعا كلموه كان رضا يجي يشوف امه سنين مسيبها فارس مشي وخلاهم:ناس مرضى 🙄 اتصل باخته:اميرتي فدوى:كيف حال حناي فارس:الحمد لله ادعيلها بس ونبي منك خدمة فدوى:حاضر شنو هيا فارس:خودي هاتف حناك وشوفيلي رقم عمك عامر ابعتيهولي توا فدوى:حاضر دقايق ووصله الرقم طول طلبه جاه صوت: hallo فارس:مرحبا عامر:كيف اخدمك فارس:هل المتحدث عامر الجارح عامر:نعم من انت فارس:انا فارس ابن اخيك عبدالله عامر:ماذا تريد فارس:عمي لو سمحت انا طالبك نبي نقولك شي مهم عامر:تفضل واختصر فارس:حناي في العنايه عامر:كيف شن صارلها امي فارس:جتها جلطه وطالباتك طول الوقت تنادي فيك تعالا وشوفها امك تعبانه عامر:درتوها ياولاد الجارح فارس:نعم عامر:تمام جاي وسكر عليه فارس:شن هالتصرفات البايخه شكله زي خوته واضرب رجع لخدمته فاتو يومين فيروز مزالت في العنايه تعبانه فارس طول الوقت معاها اما ولادها يجو الصبح ربع ساعه ويمشو الساعه 7 المغرب مجتمعين الكل عاطاولة العشا عصام:شن وضع حناك فارس:بدت تتحسن عبدالله:كويس رن الجرس محسن:منو زعما فدوى:خلي نشوف وطلعت بعد لحظات خش راجل لابس بدله رسمية رمادية نظارات طبيه شعره مغطيه الشيب ونظرته الواثقه والحادة عامر:مساء الخير عبدالله وقف:انت شن جاي دير هنا عامر حط يديه في جيوبه:بتلزني من ملكي ياولد امي عصام:جاي بتذل خوتك عامر:جاي بنشوف امي من فيكم فارس وقف:اهوا عامر:ممكن تاخدني للمستشفى اللي فيها امي فارس:اكيد تفضل هي وطلعو مع بعض خش لامه:تاج راسي فيروز فتحت عيونها:سندي عامر باس راسها ويديها ورجليها:لا ياقوية مانبيكش هكا انتي واعدتني تقعدي واقفه فيروز:ارجع انت ولم العيلة عامر:حضر بس تطلعي من هنا انا نرجع فيروز:ربي يرضا عليك وليدي عامر:ويخليك ليا اطمن عاحالها واتجه لفندق بات فيه الساعه1جاه اتصال خلاه يطلع بسرعه وللاسف في الطريق دار حادث شنيع وتوفى دارو العزا والكل زعلو لانه بعد السنين هدي كلها رجع وتوفا في بلاده في خيمه الرجاله عبدالله يهمس:تعرف احسن شي عصام:انه عاش حياته بدون زواج عبدالله ضحك:ولله الحمد فاتو يومين الصبح عصام:امتا بتطلع فارس:ممكن الاسبوع الجاي عصام:كويس سمعو صوت كعب دليل انه القادم مرا قامو الكل روسهم يستنو في الشخصيه منو و......يتبع رايكم في البدايه.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
