#غائم_جزئي ⛅
الكاتبه همس القوارير 🌸🌸
البارت الاول
من بين ضلمتي واحكام قدري المفروضه تظهر فراشتي تظهر لتمدني بنور الحياة بأجنحتها الملونه وملمسها الناعم وبطاقتها الايجابيه تمدني بالحب بالرغم من ان حياتي اشبه بجو طبيعتنا ومناخنا غائم جزئي بالرغم من غيومه الكثيفه الا انه هناك بصيص أمل وتظهر شمس حياتنا بين الحين والاخر
اني مريم مواليدي 99 تشوفوني بعدني صغيره بس حياتي كبرتني وشوفتني من الحزن قاطات وكبرت قبل اواني ووقتي وتعلمت من الدنيا الي ما گدرت تعلمه ألي بيوم بس صبرت واحتسبت امري عند ربي وكان الله خير معين
عايشه ويه امي
امي قبل لا تتزوج ابويه كانت متزوجه ومخلفه 3 اثنين بنات وولد وتوفى زوجها بحادث
بعدها تزوجت ابويه وخلفتني وهمين توفى ابويه تكول امي جان مريض ومات
بعد وفاة ابويه تزوجت ابن عمها لان جان يحبها من الاول وهمين خلفت ولد واحد حيل نحب بعض من جنا صغار وجنا گلب واحد گعدتنا وسوالفنا وضحكنا ولعبنا كله سوى بس من كبرنا كلشي تغير حتى النفسيات تغيرت ولا من جنا صغار جنا روح وحده عجيبه هالانسان شلون يتحمل يكون قاسي وهمين أمي ما اعرف ليش احسها تكرهني او ما اكدر اكول تكرهني يمكن تفرق بيني وبين اخواني بكلشي بالاسلوب وبمشترى الحاجات وحتى بالسوالف جنت دائماً اشوفها تحجي وياهم وتضحك وياهم ومن اجي احجي وياها او اضحك الگه منها شعور عدم رغبه بيه او عدم استمرار كلامها وياي تريد تسكت بسرعه او ما اعرف شلون اوصفلكم احسها تتجنب الحجي وياي لاسباب اجهلها اني همين مثلكم اسكت اخذت ابسط شعور عندي وهو ان اسكت على كلشي مو ضعف مني لا بالعكس اني قويه بس احتراماً الهم لان هم اكبر مني
اخواني الي ابوهم متوفي هند وألاء وحسام هم يحبوني بس يستعملون نفس اسلوب أمي بالتعامل وياي اخواني من امي بين فتره وفتره يرحون لبيت جدهم ومن يرجعون يجون محملين الوان واشكال ملابس وحلويات واحذيه وشكالات وكلشي حلو جانو حيل يحبوهم لان من ريحة ابنهم الميت
جنت اباوع عليهم واتحسر واسال نفسي لعد واني وين اهل ابويه ليش محد يسأل عني وليش اني هيج حالي زين هم يسالون عليه لو يردوني او لا دائماً هذا السؤال ابالي ودائماً احتار بجوابه ومن اسأل امي
مريم
ماما ليش اخواني يرحون لبيت جدهم واني لا بيت جدي وينهم يسألون عليه لو لا وين اخوان بابا وخواته جدي او بيبي ليش اني ما عندي احد
امي
لان هم عدهم بيت جد وانتي معندج كافي تسالين هيج اسئله
مريم
وليش ما عندي بيت جد ليش ميسئلون عليه وياخذوني يمهم اغير جو ويشترولي ويحبوني واحبهم ليش بابا ما عنده اهل اهله وينهم شنو مگطوع من شجره لو شنو وين اكو واحد ما عنده اهل
