غائم جزئي

البارت الخامس عشر

#غائم_جزئي ⛅

الكاتبه همس القوارير🌸🌸

البارت الخامس عشر

اعصار بيني وبين نفسي وبداخلي الف صوت وصوت ما اعرف قراري ولا اعرف شراح اسوي وشنو راح يكون مصيري وين راح توگف حياتي بيا محطه وبيا مطار احس روحي مثل الي طالع رحله يدور بيها حول العالم وما يعرف وين يتجه وين يروح مثل الغريب ومضيع الدرب ويسال بالرايح والجاي هيج اني روحي تايهه وتلوب

ام امير

شوفي مريم خليني احجي واكمل كلامي للاخير وبعدين اسمع رأيكم  اثنينكم  انتي مو صغيره وتفتهمين ودارسه وواعيه احنا كلنا نحبج ونريدج وبالنسبه ألي اليوم قبل باجر اريدج تصيرين جنتي هذا يوم المنى اني همين اريد افرح بأبني واريد اشوف اطفاله قبل ما اموت وتعرفين اني سكر وضغط اطمئنيت عند سمر لخالتها راح تداريها وتحسبها بنتها بقى عندي بس أمير اذا حابه تكونين زوجته على سنة الله ورسوله والله اخليج بعيوني واذا ما الج نفس بأبني وتگولين ما اريده راح تبقين معززه ومكرمه وهذا بيتج وماكو شي يتغير بمعاملتنا وياج بالعكس ما راح نجبرج على اي شي بس بحال ترفضين الموضوع لازم نفسخ العقد مالتكم وادور على مره لأمير وازوجه وانتي الرأي راجع ألج شنو تگولين

أمير

منو كالج هسه اني اريد اتزوج مو گتلج أجلي الموضوع يا يمه مو وكتها

أم امير

لشوكت أجل الموضوع واني اشوفك تكبر وتشيب لو من تصير شايب شنو انتضر گلي اشو العروس موجوده والبيت موجود واحنا وضعنا خير من الله ما محتاجين شنو ما يحقلي ازوج ابني وافرح بيه واشوف جهاله

امير

يمه مو وكتها رحمه لهلج

ام امير

والله اليوم ما اعوفكم اذا ما اعرف قراركم لان تعبت من هذا الوضع  كل واحد منكم على جهه لا انتم متزوجين ولا انتم مطلقين لازم تشوفولي حل
انت أمير احجي شنو رايك

أمير

والله يمه الرأي الاول والاخير لمريم شنو تكول يصير وهذا رايها واني ما اريد اغصبها على شي لان هذا زواج ما احب تعيش وياي على ابو مسوي عليها فضل او متكفل بعيشتها هي حالها من حال سمر اذا قبلت على الزواج خير على خير مراح الكه احسن منها واذا مقبلت همين تبقى عزيزه وغاليه كلشي يجي غصب الا الزواج ما ينغصب بكل الاحوال تبقى عزيزه ومكرمه وهذا بيتها

ام امير

عين العقل ابني واني هذا الي افكر بيه وحاسبه حسابه وانتي مريم شنو تگولين

مريم

والله انتم اهلي واعز من اهلي ومعزتكم بگلبي كبيره وفضلكم غاطيني من راسي لساسي بس ما أگدر انضر لامير غير اخ وصديق ما أگدر اتقبله كزوج احنا ربينا سوى وهو ربانا على ايده ما أگدر اشوفه غير اخوي يعني شلون اتقبله هذا اخوي