#ليتني_استطيع_فعلها
/// زينب ماجد ////
الحلقة_26
ديار:- دخلت، جانوا ابوية و عمامي كاعدين ويا امي، وكفت، كالو :- هاي اجت شيريها و القرار الج
كلت الهم -شنو ؟
اسماعيل:- واحد صاحبي طالب مني بنية للزواج لو توافقين و تجين وياي لو اخذ اسامة منكم بالغصب و ما تشوفونه بعد، والقرار الج و هاي اني كاعد احجي وياكم بالهداوة ولهسه ما مستخدم غير اساليب وياكم ، شكلتي ؟
ميعاد :- اني موافقة
ديار :- شنو موافقة ماما ؟ الرجال اكبر مني ب٣٥ سنة
ميعاد:- بس عنده خير من الله و الرجال ما يعيبه الا جيبه، و ابوج يريد يستفاد مهما كان بيناتنا يبقى هو ابوج من دمج و لحمج و انتم هم لازم تعينينه
اسماعيل:- اي هذا الحجي، قابل اني اكره اريد اعوض الماضي و اعالجها ما اريدها تبقى هيج
ميعاد:- بس بشرط
اسماعيل:- شنو هو الشرط ؟
-تنطيني اسمه و اروح اسأل عليه بنفسي، اذا ارهابي و من جماعتك ذوله ما انطي بتي
اسماعيل:- لا مدير عام يابه يا ارهابي
ميعاد:- عاد انت شريف روما خلك ارهابي و هالصرت ضابط
-مو جنه نحجي عدل ؟!
ميعاد:- اي نرجع لموضوع بتي كلت الك شرط اسأل عليه ياله، هيج و على معرفتك ما اقبل
اسماعيل :- اذا على هاي سهلة
ديار:- لا سهلة ولا صعبة ماما لو ما تعرفين انت
ميعاد:-ما الج علاقة بتي عيب هالسوالف تناقشين بيها فوتي جوا
عفتهم و رحت لغرفتي طالعة روحي منهم، و هم بقو يحجون بالصالة
عماد:- والله اخر وكت البنية و امها يوكفن و وحدة تتشرط و وحدة تتنعوص، اسماعيل شبيك خربت كوم و حط اضهورهن علوة و نصه و اكسرهن
ميعاد:- ردج عيني ابو علوة ونصة هاي مشاكل عائلية ما الك دخل بيها
اسماعيل؛-ميخالف عماد ميخالف الدنيا اطورت بعد الكتل و الضرب ما يفيد، موافق ميعاد بالليل ادزلج عنوانه و صورته و اسألي عنه و اني متأكد راح يعجبج
ميعاد:- نشوف، يلا من رخصتكم تعبانة و اريد ارتاح تعرفون عندي ولد مريض و شغل
كاموا عمامي ما قابلين بس ابوي كلش فرح برأي امي، سدت الباب ، اني طلعت الها من الغرفة فايرة
:- انت شلون هيج توافقين بسرعة ؟
-لأني مو مثلج الطم بسرعة
-وشلون متريديني الطم و انت وافقتي على زواجي تدرين بيه شايب بالستين عمره لو لا ؟
-كلت الج تزوجيه ؟ اجا و عقد عليج و جبرتج