نضت قعدت نشوف للسقف ونفرج ونفكر فالحاضر التعيس والماضي الاليم والمستقبل المجهول خايفه هلبا من اللي جايني ساد اللي اني فيه توا !
انا فرح م ـواليد 2001 نقره مع امل وندى وصديقتنا وئام ح ـتتعرفوا عليها بعدين مواصفاتي طويله طولي تقريبا 180 او اقصر بشوي وبيضا وعيوني صغار وفمي عادي وشعري طويل لنهايه ظهري وناعم .. اني جيت بعد 2 اولاد وبنت بعدي 2 بنت وولد بابا متزوج مراء ثانيه وجايب منها 3 بنت وزوز اولاد طبعا حوشها تحتنا واحني فوقها مرت بوي عندها بنت من راجلها الاول اللي هو عمي الله يرحمه عمي توفى بسرطان اللهم عافينا وخلى بنت طبعا بابا تجوز مرت عمي غير باش يربي البنت وماضيعش وهكي بس توا نشوفلها كيف مدلعها اكثر منا كيف مدلع خوتي اللي من مرت عمي اكثر من خوتي اللي من امي كان مداير فارق كبير بيناتنا !
تقوى : فرررححح
فرح. : افففف نعممم
تقوى. : تعالي ضمي الكوجينه عليك اليوم
فرح. : غمضت عيونها ماه هي ديما عليا اصلا
تقوى. : به به من غير دوه زايده هي باااي بنمشي نقره عندي امتحان
فرح قعدت تشوفلها لين اختفت. : اففف يارب ساعدني ... وناضت لشغل الحوش
_______________________________
فـــي مـــكــان ثــانــي 💜☁️
كان الجو خياال كانت الدنيا كلها سحاب ونسمات الهواء بارده شفت بابا وماما كيف يهدرزوا ويضحكوا ابتسمت تمنيت اني وانس حبيبي مكانهم شفت خوتي الصغار كيف فرحانين تمنيت ان يكونوا صغارنا هكي تسطحت ع العشب وقعدت نتأمل فالغيوم بعدين غمضت عيوني ونتخايل في شكله في ملامحه الجديه ابتسمت زي المهبوله
بابا. : ماتقوليليش خيرك تبتسمي من بكري
وئام ناضت وتلفتت بعدين شافت لبوها : عليا اني 😳 ??
بابا. : في غيرك يتبسم يعني قولي قولي شن في 😉
وئام وجهها الوان : أئئء لالا مافي شي الجو بروحه والراحه النفسيه اللي فيه تخليك تبتسم
بابا شاف لماما وقعدوا يضحكوا
وئام. : خيييركم ☹️
بابا. : شي شي بري دوري واسمعي اغاني كان تبي
وئام بفرح : هييئ عاادي ؟😍
بابا بإبتسامه. : اي عادي
وئام : لبست سبيدروي ومشيت ...
انا وئام م ـواليد 2001 مواصفاتي قصيره وبشرتي حنطيه وعيوني سود وشعري لنهايه ضهري واسود عيوني واسعات شوي وطيبه هللبا وبطه 😐🦆 عموما اني نحب ولد عمتي وهو يحبني ع الاساس بس مرات نحس فيه مش مهتملي نحس فيه مدايرني گ تفويت وقت او لما يكسد يكلمني ديما ينصحوا فيا يقولولي فوتيه اختاري ولد خالتك احسن يحبك بس ولد خالتي مانبيهش ومانبيش حد غير انس وبس !
_______________________________
عــنــد امــل ونــدى 💜🦄
ندى. : خوك طرف ياحماره
امل. : عارفاته وخيي الغالي طرفوش طالع لاخته
ندى. : 😒 غير ماتصدقيش روحك بس
امل. : بري ملحي صدقت وفات
سند ينادي من وراء باب الدار. : احم املل تعاالي نبييكك
امل بعياط. : جااايه ... وناضت
ندى. : اففف محلاه
امل بصوت واطي : شن تبي
سند : أئئء كيف حالك 😅
امل : والله ؟؟. 🙂
سند : مالاخير صاحبتك عجبتني ونبيها
امل تضرب فيه : اس اس حشم حالك امشي
سند : تي خيرك به افتحيلها الموضوع توا
امل : اممم تمام بس بشرط
سند : شنو
امل : تجيبلي شكلاته ميلكا صندوق راه
سند : امم تمام هذا لو في حاله وافقت نجيبلك بس لو ماوافقتش مش جايب
امل بفرح وحضنت سند : تمام نحبك يا احسن اخ ليا
ندى من داخل : احم احم
امل تلفتتلها وضحكت : هي برا ياسند وموضوعك عليا وصندوق الميلكا عليك راه
سند : تم
امل : وعد .. ودارتله صبعها الصغير باش يوعدها
سند : اففف وعد .. وحط صبعه في صبعها
امل. : هي اقلب وجهك
سند. : حتني نحبها 🙂
امل. : خشت وقربعت الباب في وجها
سند. : سكرت في وجهي بنت الكلب 😳
انا سند مواليد 97 مواصفاتي طويل وابيض وعيوني زرق وشعري قهوي مدايره حلاقه الصايعين 😂 نحب نلبس ونتجكتر وديما نصور والنزل عالفيس 😎 عندي معجبين ومعجبات بس المعجبات اكثر من المعجبين 😐 المهم اني طحت طيحه شينه في ندى البنت اول ماشفتها شفت برائه العالم كله فيها وفي عيونها تهبل الفرخه من كثر قصرها لين نبين اني بوها 😂 هكي احسن اصلا 😌
سند : طلعت نجيب في شكلاته لــ امل لين فجأه لقيت ...!
يتبع ...!
دعمكم ضعيييف مش حالنزل باقي الحلقات لين نلقى دعم ع البارت هذا 💛💫
أنت تقرأ
روايـه حُلـم ( ليبيه واقعيه )
Romansa4 بنات عاشوا الحياه بحلوها ومُرها بأفراحها واحزانها ... الروايه ح ـتكون غامضه شوي وفي نفس الوقت مرحه ومؤثره .. نتمنى دعم 🖤💫 روِآﮯآتُ دُمِوِعَ ـ آلَقَمِر 💕☁️
