قهوة الشتاء☕🤎.. بقلمي/ "رودي الليثي"

الحب💕

_يعني إيه حب.......؟
_هو أنا لما أحب واحد من وراء أهلي كدا حلال ولا حرام......؟
_هو حب السوشيال بيبقي حقيقي.....؟
_امتي أعرف إنه بيتسلي......؟
_ايه هو الحب الحلال......؟

السلام عليكم💛
حبايبي وحشتوني جامد اوي❤
هنتكلم النهاردة في موضوع غايه في الأهمية وخاصة للبنات القمرات.. بس أعملوا حسابكم الموضوع مطول جداً عشان هنتناقش ف كذا حاجة حول الموضوع دا..

**********************

_في البدايه خالص محتاجين نعرف احنا ليه بنلجأ للحب أو بمعني أوضح نرتبط..؟

(خلوا بالكم انا مش بقول إعجاب عشان تفرق.)

_عشان ساعات كتير جدا بنبقي محتاجين لحد يفهمنا ويحتوينا ويدينا الامان..

هل لفظ انا مرتبطة او انا مرتبط دا صحيح دينياً..؟
(لا) لان ف الاسلام مفيش حاجة تربط الرجل بالمرأة غير لفظين هما(متزوجة او مخطوبه)غير كدا لا مفيش حاجة ف الاسلام إسمها مرتبطة..

يعني ايه حب..؟
حب يعني أمان ..يعني ملجأ.. يعني احتواء.. يعني أخاف ربنا في اللي بحبها ..يعني أخاف عليها من نفسي قبل الغريب..يعني أكون ليها الصديق والأخ والأب والحبيب ومخزن للأسرار والمشكلات💛

حب السوشيال:-
بصوا يا حبايبي ...موضوع حب السوشيال دا 99% بيبقي مش حقيقي ودا مجرد تسليه منه وخلاص بييجي وقت عليه ويزهق ويشوف غيرها وهكذا ..و 1%الباقي هو اللي بينجح..
طب لو جينا فكرنا بالعقل شويه هنلاقي إن إزاي يعني واحد يقول لواحدة بحبك وشاريكي وكلام كدا وهو عمره م شافها قبل كدا ..ياجماعه الصورة والصوت مش كفايه ..انه يشوف صورتك أو يسمع صوتك دا مش كفايه عشان يحكم ع شخصيتك..اللي بيحب بجد لازم يتعامل معاها عشان يعرف علي الأقل تنفع يكمل معاها حياته ولا لا...

الحب من ورا الاهل عموما:-
لما نكلم حد متربطناش بيه اي علاقه سواء من قريب أو من بعيد ونتكلم فون ونحب ف بعض واحتمال نتقابل ف مكان عام واحتمال كمان نكون بعتناله صورنا وكل الكلام الجميل دا..
ينفع نتكلم مع ولد غريب ف شات...؟ طب بلاش كل دا ... ينفع اروح اتسحب واكلم واحد  في التليفون وابقي مرتبكة جدا وموطيه صوتي لحد يسمعني كأني بسرق..؟
ينفع اهز ثقه بابا الكبيرة اوي فيا يبنات ..؟

(الشات يبنات بين ولد وبنت يعتبر خلوووه عشان مش بيبقي في كنترول واحتمال يبقي في تجاوزات حتي لو كان الكلام بمنتهي الاحترام)

يااا تري الكلام اللي انا قولته فوق دا ينفع يتعمل.....؟

برافو عليكي..لا طبعا..!

_بس بيتعمل يحببتي والحكايه دي منتشرة بينا جدا الا من رحم ربي..

طب نعملل ايييي!!!!!؟

هقولك...
المفروض ان لو في اي كلام مع شاب وهو بيحبك ومفهمك إنه هيتقدملك تقوليله إن مش هينفع نتكلم لأن دي تعتبر خلوه بين شاب وبنت ..وإن كمان باب بيتنا مفتوح ف اي وقت ييجي يطلبك رسمي وكفاية ذنوب ومعصيه لربنا..لو قالك أصل الجيش ..أصل لسة مكونتش نفسي...إلخ
قوليله هستناك بس من غير م نتواصل زي الأول..
لو لقيتيه اتحدي الواقع وجيه اتقدملك يبقي دا الحب الحقيقي❤

اما بقا لو مشي وموراكيش وشه تاني يبقي دا كان بيتسلي وانتي كنتي نذوه ف حياتة وخلاص هيبتدي يدور ع غيرك..

لو عرفتي إنه كان بيتسلي وأنتي لسه بتحبيه يبقي تمسحي كل حاجة متعلقه بيه حتي لو غيرتي رقمك وفيسك وكل حاجة متعلقة بيه وبلوك طبعا (بصوت رضوي الشربيني😂😂) وانتي تدريجيا هتنسيه لأنه ميستاهلش حبك وهتلاقي اللي يعوضك بس انتي ارجعي لربنا❤

*الحب الحلال يجميله..💛
ودا بقا أجمل حب ف الدنيا😍
قبل م أتكلم هقولكم قصه قصيرة كدا كنت قريتها ف روايه قبل كدا..
********************
كان في واحد بيحكي لصاحبه مشكله بينه وبين مراته ف قاله انا مبقتش طايقها معرفش لي وكل شويه خناق خناق مع اني كنت بعشقها قبل الجواز..
فصاحبه قال:هسألك سؤال وتجاوب بصراحة..
قاله: اتفضل..
قال صاحبه: هو انت قولتلها بحبك قبل الجواز..
قاله:ياااااه دانا مكنتش بمشي غير واحنا ماسكين ايدين بعض وياما قولتلها كلام رومانسي ف الخطوبه..
صاحبه قاله:مشكلتك يا صاحبي انك مستنتش اذان المغرب وشربت مياه سخنه من الحنفيه عشان كنت عطشان اوي ..يعني ضيعت المياه الساقعه وثواب الصيام وشربت مياه سخنه ف الخفاء..
قاله:تقصد ايه بالكلام دا
صاحبه قاله:اقصد انك مستنتش فترة الخطوبة اللي هي تعتبر صيام ليك وليها وفطرت ف النص بكلمة ولمسه ايد تبل بيها ريقك ف بالتالي بعد الجواز حصل مشاكل لان انتوا خلاص شبعتوا من كل الكلام الرومانسي مبقاش ليه اي طعم ..لو كنت استنيت كنت حسيت بحلاوة كلمة بحبك بعد كتب الكتاب وهي حلالك قدام ربنا لاكن انت استعجلت ..كان لازم تستني آذان المغرب.
******************
الحب الحلال ليه طعم تاني خالص مش زي كل اللي بنشوفه ونسمعه..
الحب الحلال ربنا بيعطيه لناس معينه فقط مش كل الناس.
الفكرة من القصه دي إن نصبر لحد كتب الكتاب وبعدين نقول كل الكلام الحلو اللي جوانا قدام ربنا والناس بدون خوف من أي حاجة وساعتها هيكون ليه طعم تاني اجمل بكتير💛

((وما الحب إلا ان تخاف الله في من تحب!!💕))

بقلمي رودي الليثي💕
مواناا💛
ميريدا💋

يا رب اكون قدرت افيدكم واوصلكم فكرتي💛.."
يا ريت تدعموني بفوت وكومينت جميل شبهكم تشجعوني بيه💖..

إن شاء الله اللي جاي أجمل وأجمل بس ادعموني عشان أقدر اكمل💛

                           بحبكم💕💋