عودة الماضي

المعرفة

انا واقف مش قادر اتحرك من مكاني وكأن المروحه خلتني مجهد بشكل غريب! جسمي حرارته زادت وبقيت زي ال كان بيجري وغرقان في العرق!! واقف مكاني في وسط الشقه ونورها بيقل وكل لمبة بتنطفي لوحدها!! طبعا كل الشبابيك مقفولة مفيش نور الشمس ف الشقة..
فجاه صوت غريب من أوضة اهلي،الصوت زرع في الرعب وكأني سمعت صوت خارج من جهنم صوت صويت وعياط لطفل وسيدة.. الصوت بيزيد وخوفي بيزيد معاه! مره واحده حسيت بحركه غريبه في الشقه كلها، وانا كنت واقف مش قادر اقف على رجلي من الرعب لكن حاولت وجريت على أوضتي بسرعة وقفلت الباب؛ انا عارف أوضتي كويس لكن اللي دخلتها دي والنور قاطع.. كانت مستحيل تبقي أوضتي!! أوضتي المفروض فيها سرير ودولاب ،وكوميدينو صغير عشان مذاكرتي وكتبي.. انا دخلت الأوضة حسيت إن الأوضة فاضيه.. أو بمعنى أصح الأوضة مساحتها زادت أو يمكن الاثاث مكانه أتغير لإني فعلا اتخبطت في الكوميدينو وعليه كتبي بعد خمس دقايق مشي تقريبًا في الاوضه!! بحاول أشوف الشباك فين وأفتحه يدخلِّي نور عشان أعرف انا فين بالظبط! ماشي في الاوضة عمال اتخبط في حاجات، وشوية وأمشي على مياه والأرض فجأة تحتي تسخن جدا وأحاول أقف على حاجة عالية بعيد عن الحرارة! الرعب بيزيد في قلبي بسبب الاصوات اللي بتزيد كل شوية حواليا أصوات ناس بتصرخ وعياط اطفال وعياط مش كأنه لبشر دا يمكن لحيوانات أو أصوات غريبه  ومش مفهومة خالص!! وانا واقف عشان تعبت من المشي لأكتر من نص ساعة ماشي في أماكن مش قادر أفسر ماهيتها تمامًا وأماكن غريبه ومتناقض وجودها مع بعض! وكل دا ف أوضتي!! شفت شعله نار كبيرة من مكان بعيد يمكن على بعد نص كيلو.. الشعلة كانت ضخمة وكأنها ظهرت من العدم! وفي مبني ضخم وراها وأعلاه تمثال مش قادر أوصف ملامحهلكنه كبير وغريب!! جالي إحساس إني لازم أروح وأدخل المكان دا مش فاهم ليه، لكن كان جوايا حاجة مش فاهمها  بتدفعني للتوجه هناك! مشيت بسرعة أكبر للمكان وملامح التمثال بتبان قدامي، دا مش تمثال لبني آدم.. أنا كنت قرأت شوية عن الماسونية ورموزها، ومتأكد إن دا تمثال للشيطان اللي بيعبدوه!! لمجرد التفكير ف الأمر دا تعبت ودوخت وقعدت مكاني، معداش عليا دقايق وانا قاعد وبحاول أفكر في المكان ال انا فيه، وإزاي من أوضتي وصلت لهنا؛ نمت فجأة مكاني!
أصوات همس كتير حواليا وصوت تحركات بسيطة من مكان لمكان وراسي وجعاني جدا وعندي صداع غريب!! بدأت أفتح عيني وكأني كنت مغمي عليا بالظبط مش مركز أنا فين أو وصلت ع الكرسي دا ازاي..! فيه ضوء خفيف وكأنه لشموع، وأيدي في الكرسي مش قادر أحركها..دي مربوطة! اي دا انا مخطوف ولا ايه!؟ فجاه صوت غريب بينادي باسمي..! صوته دخل في قلبي الرعب صوت تخين وصعب وبدأ يعلي وصوت رجليه بتقرب وشكله رعبني اكتر!
ده مكانش بني ادم! ده شخص كبير ضخم له قرون كبيره شويه على راسه وشعره قصير، وعينيه حمراء قوي ومن النص سوداء تشبه عين القط! عنده ديل طول أسود! بدأ يتكلم معايا وقالي إنتو لازم تدفعوا التمن، انت ايه!؟ ومين؟ وعايز مني إيه أنا معملتش حاجة ومأذتش حد!! قال لا أذيت.. وعيلتك كلها أذتنا! إنتو قتلتوا حفيدي وإبنه! قلتله لا محصلش، إحنا معملناش حاجه،و مقتلناش حد وانا اصلا معرفش بتتكلم عن ايه!! قالي انت صادق.. لكن عيلتك اجرمت لازم تتعاقبوا وهبدأ بيك..!
فجاه لقيت نفسي بترفع من على الارض بسرعه بالكرسي، وفي نار ظهرت من كل مكان حوالي والارض انشقت وخرج منها نار!! وزي ما يكون في ناس جوه النار دي بتتعذب وبتصرخ بصوت عالي ومؤذي وبيقولوا نزلوه وبينادوا باسمي وبيكرروا ده مجرم..! الجو حر جدا وانا مربوط في الكرسي مكاني لكن طاير ومره واحده الكرسي بيقع بيا في النار!! شوفت شخص انا عارفه وشوفتله صورة قبل كدا وانا بقع.. الشخص ده شبه جاري جدا، لكن جاري ده متوفي وصورته أنا شوفتها في بيته لما كنت عند صاحبي محمود حفيده!! غمضت عيني وانا بقع بسرعه رهيبه في النار و فجاه حسيت بالكرسي بيتكسر تحتي، وبفتح عيني مفيش نار ومفيش حد حواليا.. أنا في أوضتي!! وفعلا الكرسي مكسور تحتي وانا قاعد على الأرض، دا الكرسي ال بقعد عليه وقت المذاكرة!! الساعه تقريبا كانت واحدة الظهر سمعت صوت الباب بيتفتح.. دول والدتى وأختي سامع صوتهم..
طلعت بره أوضتي عشان أشوفهم مفيش حد في الشقه! روحت أتأكد من باب الشقة.. الباب مقفول زي ما هو أومال أنا سمعت ايه دلوقتي!! انا حاسس إن انا  هبطت من كثر التفكير وكنت تعبان تعبت أكثر ده غير إني مكلتش حاجه من ساعه ما صحيت قلت هاروح أكل لقمه وأرجع أنام تاني.. دخلت المطبخ في ريحه معفنه جدا في المطبخ وخاصًة الريحة طالعه من الثلاجه معرفش إزاي!؟ انا خايف جدا طبعا وبقرب من الثلاجه براحه وبفتحها.. لقيت فيها كلب إسود معفن محطوط في طبق كبير!! و اماكن كثير من جلده مسلوخه، وعينه نازل منها الدم وبؤه كمان!
ريحته معفنه جدا، ومفيش غيره في الثلاجه!! فين باقي الاكل!؟ الكلب ده ازاي في الثلاجه، وايه اللي عمل فيه!؟ كده حسيت بدوخه رهيبه بسبب ريحته القويه وكنت لسه هقع على الأرض لقيت الكلب فجأة نط عليا بسرعة من الثلاجه وحاول يعضني!! دمه عمال ينزل علي وشي وهدومي! افتكرت آيه الكرسي بسرعه وقراءتها، وانا باحاول أمنعه عني زائد شوية أدعية بقرأها كمان..
الكلب أختفي وأيدي كانت في الهوا وكأن مكانش فيه كلب بيحاول ياكلني حتي!! وقفت من على الارض  وباب التلاجه كان مقفول.. فتحته وأنا خايف،  الأكل عادي زي ما هو في الثلاجه مفيش أي ريحه في الثلاجه وحتى المطبخ مفيش فيه أي ريحه للعفن اللي كان خانقني من ثواني!! بس أخدت بالي لما دخلت الحمام عشان أغسل وشي وأفوق.. إن هدومي كان عليها دم ووشي كمان! أنا أكيد مخدتش بالي منهم في المطبخ عشان تركيزي كان في حاجه معينه وهي الكلب.. ببص في المراية وانا مش قادر أفسر شكلي الغريب والدم الغزير ال بيسيل من وشي لسه على هدومي!! وعيني المجهده جدا كأني منمتش بقالي أيام..! غسلت وشي وقلعت هدومي، حاولت أغسلها من الدم في الحمام ولما خلصت خرجت.. فرجعت على أوضتي عشان ألبس حاجه تانيه وأنام شوية من التعب.. كل هدومي اللي في الدولاب مليانة دم!! وريحة الهدوم مخلياني حتى مش قادر أسيب دولاب مفتوح!! قفلت الدولاب بسرعة وطلعت بره الأوضة.. قعدت على الكنبة شوية، وأنا مش قادر حتى أفتح عيني ونمت مكاني..
مصحيتش غير على صوت أمي وأختي بيصحوني وأنا نايم في أوضتي عشان اتغدا!!
الأوضة مفهاش أي ريحة غريبة.. لكن الكرسي الموجود مكسور ومرمي جنب الدولاب وأمي بتسألني بغضب عنه كسرته ازاي!؟