يــــومــــيــــات جــــارات💍🌸|🇲🇦

الحلقة21: المسامحة

🌸💍يوميــــــات جــــــارات🌸💍
🏢العمارة رقم 6🏢🌷الجزء الأول🌷
الحلقة21: #المسامحة
📖💜الجزء 1📖💜
فواحد الليلة و كلشي فالعمارة كان ناعس الا مينة اللي مجاهاش نعاس...
عبدالله: نعسي ياتا هنينا من الصباح كاتقلبي بحال الى كايقليوك
مينة ضارت لعندو: ماعرت مالي ا مولاي عبلا مجانيش
عبلا حل المجر: هاكي شربي هادي مغاتفيقي حتى نفيقك
مينة: ارا ياودي راه ضرني راسي
شربات مينة حبة المنوم و غطساااات فنوم عميق....
🌸فدار سكينة🌸
سكينة: ماما شفتي انا و هشام كانبغيو بعضنا كون ما ديك مينة تدخلات بيناتنا
طامو: اييه ابنتي مكانش عليا نسمع عليها شعالة العوافي تفو الله يخليها سلعة
معاد خرج من لبيت: راه ديما كنقوليكم ديك مينة ماتسوا ماتصلاح متبقاوش تجيو جيهتها
حميد اللي كان كايفطر: شكون هاد مينة؟؟
سكينة: صاحبتي ياحسرة و ولادها درتهم بحال...
طامو قاطعاتها: نتي اللي نية من ليوم متبقايش تقابليلها ولادها خليها تحصل فيهم هيا تخويهم ونتي قابلي و فلخر تجي تقول عليك دايعة لهلا يحييها
انوار: واش ا ماما حتى انا مخصنيش نزل نلعب مع مروان
طامو:لا متبقاش تهبط عندها راها مسمومة و نخافو عليك منها
انوار: واخا ماما
سكينة: هاني نزل نمشي نشري شي سخرة
نزلات سوكا من الدروج و تلاقات مع مينة...
مينة: اهلاااا عروستنا
سكينة: ام اش كاين؟؟
مينة: عااافاك اختي سكينة شدي عندك لولاد حتى نخمل الدار راهم مخلاونيش
سكينة: اممم مامساالياش
مينة: واخا قوليها ل لالة طامو غاتكون جالسة فالدار
سكينة: لا ماما غاتمشي مع الروفيكس يشريو الخاتم
مينة: اوا معاد راه كيعجبوه الدراري يلعب معاهم
سكينة: غي هني راسك حنا ليوما كلنا مامساليينش الى مخفاش كنوجدو للعرس ههه
مشات سوكا و خلات مينة طالع ليها الدم..
مينة: شوفاوا شوف تحل ليها لفم
🌸فدار اكرام🌸
اكرام حطات لفطور و جلسات...
عمران: حبيبة مالك ساهية؟؟
اكرام: كانفكر فبنادم سبحان الله مكيعرفش بللي الله كاين وبلي غايتحاسب
عمران: علاياش كتهضري؟؟(كاياكل)
اكرام: شوف دابا مينة جارتنا كانت صااحبة سكينة و مسكينة ديما مقابلة لها وليداتها فلخر غدراتها شوية منتاحرات بسبابها
عمران: الله يهدي ماخلق لكن شوفي راه الصحبة مهمة و مخصكيش تعاشري اشخاص ممزيانينش
اكرام: اه انا غانعرض عليها حتى توب حيث ممزيانش لواحد يشعل لعافية و يفرق بين الناس
عمران: اه احبيبة الحمدلله دابا انا غانمشي للخدمة اوكي تهلاي فراسك
اكرام: تهلا حبيبي
مشات اكرام كتجمع لبيت شوية سمعات الدقان دق دق سررررررر
اكرام: شكون؟؟
مينة: هادي انا
اكرام حلات لباب: مينة
مينة: مالك ماغاتدخلينيش؟
اكرام: سمحي ليا مغندخلش النمامين و اللي كيشعلو العافية
مينة: وااه
🌸💍يوميــــــات جــــــارات🌸💍
🏢العمارة رقم 6🏢🌷الجزء الأول🌷
الحلقة21: #المسامحة
📖💜الجزء 2📖💜
اكرام: اه البيت اسرار و بحالك مكيدخلوهمش الناس دابا سيري لدارك و صلحي نفسك الله يهديك
سدات اكرام لباب و خلات مينة مصدومة...
مينة: وايلي حتى اكرام اللي كانت ظريفة معايا مبغاتش تدخلني لدارها
مينة بقات تدور حدا الدار: اه امينة كنت عزييزة عندها ميمكنش تخلا عليا
طلعات مينة و دقات على امينة سررررر سرررررر
امينة حلات لباب..
مينة: حبيبة لاباس عليك؟
امينة: الحمد لله شكون جابك فهاد لوقت؟؟
مينة: ا ا جيت غير نخلي عندك لولاد بينما نخمل
امينة: اممم سمحي ليا عندي موعد مع محمد غانجيبو خاتم الخطبة
مينة: فرحت ليك معرفتيش قتارحي عليا راه الدراري هلكوني
امينة: ااام شوفي
مينة: شنو؟
امينة: واحد الخيرية فالدورة سيري حطيهم فيها مزيان تبارك الله(سدات الباب)
مينة زادت صدمتها...
مينة: مال هادو واش متافقين لالا غانمشي عند طامو هي غاتحن فيا عارفة بحق لولاد
سررررررر سرررررر طامو خرجات شمرات على ذراعيها...
طامو: اش كاين؟؟؟
مينة: لالة طامو الى جات على خاطرك تحضي ليا لولاد غي حتا نخمل
طامو: علاه شكون كان كايحضيهم ليك؟؟
مينة: سكينة مسكينة الله يسهل عليها
طامو: ايييه سكينة اللي عايرتيها لربيعة و ماخليتي ماقلتي عليها ياك؟
مينة: وا راه ربيعة هي اللييي...
شدات طامو مينة: اجي لهنا
مينة:واكواااااك اعباد الله وااااعتقوووو الررووووح
خرجات امينة و ولاد طامو فكوهم و نزلات مينة شعرها مشنتف...
مينة: اهي اهي اش هاد الجورة اش اهي اهي انا غانخلي لكم هاد لعمارة و نطج
دخلات مينة للدار لقاتها مقلوبة مروان طالع الماريو زكريا منزل التلفزة ياسين خوا الثلاجة و التوأم فلمراح مليوحين عامرين ب كاكا...
مينة: واكواك اولاد لحرام اش هاد الروينة
نزلات عليهم مينة بالعصا و الغوات حتى سمعها عبدالله من المحلبة...
عبدالله: احماد عافاك بقا هنا هاني جاي
جرا عبدالله لدار لقاها مرونة و مينة حالتها حالة المواعن خارجين الثلاجة خاوية فلرض الدراري يغوتو
شد عبدالله فراسو: اهياناري انا مخلي ليك هادشي
مشا عبدالله و مينة تابعاه تغوت و شد طاكسي وبقات تولول حدا الشانطي حتى تسطات و خرج ليها لعقل خلات العمارة و داعت مع الشوانط اللي شافها يهرب منها و هي تشير بالحجر مينة: وااااااههههههه ههههههه غاتقولو مسطية انا راني بعقليييي واخدة سيد الرجال غي صبرو حتى يجي اهي اهي مغايجييش راه هرب
دازت سكينة هي و هشام عليها معرفوهاش...
هشام: اجي ماشي ديك مينة هادي؟؟
سكينة تلفتات: اويلي لا هههه
كملات طريقها ملي وصلات سوكا للعمارة لقات الدراري كايبكيو دخلات لدار مينة للي محلولة:هشام اويلي اش هادا فين مينة و عبدالله؟؟
جرا هشام مشا للمحلبة سول حماد: مبانش ليك سي عبدالله؟
🌸💍يوميــــــات جــــــارات🌸💍
🏢العمارة رقم 6🏢🌷الجزء الأول🌷
الحلقة21: #المسامحة
📖💜الجزء 3📖💜
حماد: گاليا غايرجع ساعتاين دابا انا غانسد ليه هنا عندي ميدار
هشام رجع عند سوكا: قلتليك هاديك للي شفنا مسطية هي مينة
سكينة: اويلي شكون سطاها؟؟
هشام: الذنوب ديال عباد الله
امينة اللي صونا عليها محمد حدا الدار لابسة و مقادة باش يخرجو يجيبو لخاتم نزلات و دخلات عندو طموبيل...
محمد: توحشتك
امينة: هه حتى انا ليوم اسعد نهار عندي
ديماراو حتى وصلو عنذ الذهايبي و دخلو بداو يشوفو لخواتم حتى دخلات عليهم واحد لبنت كاتفتن بالزين و الشعر كلشي بقا حال فمو...
امينة: جمع فمك ااا
محمد: ههه هادي محال واش من هنا
امينة: ونتا سوقك
لبنت لابسة جلابة فالكرونة بالطرز فالكحل و اشمنك يا حاجب اشمنك يا عينين شوية تبعها راجل...
محمد: فين شفت هاد السيد؟
امينة: وايلي هادا عبدالله راجل مينة
عبدالله شاف فيهم: اهلااااا امينة و محمد انا نيت ناوي نعرس معاكم
امينة تصدمات: وايلي كيفاش ناوي تدير التعدد هي مينة موافقة ههه؟؟
عبدالله شداتو التبوريشة: ماااااتبقااااايش تخرجي سميتها انا راني مسخوووط نهار تزوجت بيها تفووو
محمد: صافي و اش غادير؟؟
عبدالله: هاني غانتزوج بلالاها
امينة: واش غاتسكنها مع م... اح مع اللولا؟؟
عبدالله: لااا هاديك الموسخة غاتوصلها براتها اليوم مزال و الدار ديالي مغتبقاش فيها غانسيفطها للفيرما د باها
البنت: شكون هادي ا حبيبة؟
محمد شاف ف امينة: اييه دابا عجبني سي عبدالله اي اي كيدار تزوج مينة
عبدالله: سحرات ليا ا خويا محمد كاتوكلني تما فشراوطها دابا الحمدلله رجعات ليا البصيرة
البنت شافت ف عبدالله باستغراب...
عبدالله: والو ا حبيبة غي واحد لخدامة عندما رونات كاع الدار غانجري على باباها
البنت ابتاسمات: واخا احبيبة
خرجات امينة و محمد متعجبين و عيط عليهم عبدالله...
عبدالله: راني سيفط شي ناس يقادو الدار اللي رونات ديك البقرة انا دابا غاندوز عند لعدول الى بانت ليكم قولولها مانلقاهاش تدور تما محمد و امينة ملقاو ميقولو طلعو الطوموبيل و فالطريق...
امينة: حبيبي
محمد: وي
امينة: مينة مسكينة بقات فيا واخا كلشي كان السي عبدالله ديما مدلعاه ها مولاي ها الشريف ها سيدي مخلات موكلاتو غي باش يرضا نتوما الرجال خطار
محمد: ههه حبيبة راه ماشي الضربة الخرة اللي كتثقب الطبل لكن الضرباات ديال شحال غي حنا كنسبوها ديما ف اخر ضربة
امينة: واخا هكداك بقات فيا الى ساقت لخبار غاتحماق
محمد: شكون اقدر اقولها ليها
امينة: انا بعدا منقدرش
محمد: وصلنا حبيبة
امينة: شكرا زين ديالي
مينة رجعات من الزنقة و لقات الدار محلولة الدراري مكينينش و گلسات تغوت: فيييين ولاااااديييي فييييينن فين ولااادي سكينة هبطات: مينة
مينة: كاينين عندك ا سوكا ياك؟ ؟
سكينة: لاا هاكي هاد البرا
طلعات سكينة و حلات مينة الجوا...
عبدالله: انا استحملتك شحاال من عام هادي لكن صبري تقادا ماحيلتي لكمارتك و ريحتك و وسخك ماحيلتي للدار ديما مرونة ماحيلتي لماكلتك للي كتدير الكولسترول ماحلتي للولاد اللي غي كاتبزقيهم عليا ماخلتي للصداع ديما شارياه ليا مع الجيران عييييت ا عباد الله و حتى لولاد راهم غايبقاو عندي درت فيك خير فكيتهم منك دابا ابنت الناس جمعي شطايطك منلقاكش فالدار و طلاقك هاهو مع البرا
زربات مينة كترعد حلات البرا اللي فيها الطلاق لقاتو فعلا مطلقها...
مينة شدات شعرها: اهيااااناري اسيدي الشريف لمن خليتيني اهياناري الحبيب ديالي اهي اهي لا ولاد لا حبيب اهي اهي واتا رجع غانديرلك اللي بغيتي اهي اهي واكوااااك ا مولاي الشريف مينة جالسة فلرض حدا باب لعمارة كتغوت و خنونتها سايلة و هي جالسة حتى سمعات الغنا و الصلاة و السلام جايين جيهة لعمارة وقفات و دخلو بانو ليها سكان العمارة سكينة لابسة قفطان حمر كاتشطح هي و هشام اللي لابس كوستيم رمادي
مينة: هههه سوكا تزوجتي؟؟
متسوقوش ليها و دخلات امينة لابسة قفطان ليموني كاتشطح مع محمد اللي لابس دجين و تيشرت بيض و فيست كحلة
مينة: امينة حبيبة تزوجتي ههه فرحت ليك
🌸💍يوميــــــات جــــــارات🌸💍
🏢العمارة رقم 6🏢🌷الجزء الأول🌷
الحلقة21: #المسامحة
📖💜الجزء 4📖💜
متسوقوش ليها بقاو اشطحو و دخلات طامو لابسة قفطان ذهبي كاتشطح مع الروفيكس للي لابس قميجة بيضة و سروال قندريسي...
مينة حاولات تشد فطامو: لالة طامو تزوجتي باقي ههه
تا واحد متسوق ليها دخلو كلهم كلشي يشطح شوية بان ليها الضو فلباب بقات تحاول تشوف وبانت ليها بنت منورة لابسة كسوة لعروسة و حداها حداها....
مينة: ع ع مولاي الشرييف حبيبي مولاي الشريف ميمكنش حبيبي عبلاااااا حبيبيييييي عبلااااا لاااااا ماشي نتا لاااا
عبدالله فاق مخلوع: والله يخليييييها سلعة
مينة: اهي اهي عبلااا حبيبي
عبدالله: عرفتي بعداا اشمن فانيد عطيتك ا الحلوفة؟؟
مينة: حبيبي نتا حدايا اهي اهي حبيبييي
مينة عنقات عبدالله و هو كيتعجب...
عبدالله: راني عطيتك فانيد دلبنج مگرش فيك يالطيف
مينة: اهي اهي حبي اهي
عبدالله: اتي مالك واش حماقيتي؟؟
مينة: واحلمت بللي طلقتيني و تزوجتي عليا
عبدالله: ايوا ايوا كيدايرة هادي؟؟
مينة: كاتضرب فيه..
عبدالله: واتي زگاي مالني ضربني الله اللي مضروب مضروب هههه
مينة: واش كاتبغيني اهي اهي؟
عبدالله: اه لكن الى بدلتي راسك و قلتي عليك ناس العمارة
مينة: كانواعدك حبي غي اصبح الصباح غاندوز عندهم واحد واحد نطلب السماحة
عبدالله: هكدا نبغيك احبيبة
دوزو عبدالله ومينة ليلة العسل و نعسو...
☀️فالصباح بكري☀️
عبدالله فاق: اههاااااء مينة مينة فيينك
ناض عبدالله و لقا مينة كاتطيب اللوبيا بالكرعين...
عبدالله: اشكاتديري ياتا؟ ؟
مينة: ماااح كانطيب للجارات اللوبيا بالكرعين غانعرض عليهم ليوم و نطلب السماحة حبي الى خرجتي جيب ليا شي كاضوات نعطيهم لهم
عبدالله: اي شحال كتزياني ملي كتكوني ضريفة هههه
مينة: الله يتبثنا هههه عبدالله جلس حتى فطر و خرج يجيب لكاضويات و مينة ملهية مع اللوبيا و الدجاج حمراتو و شلايض و لمونادا و حطات كلشي بقات لها غي لوبيا مبغاتش تطيب حيث مدارتش كوكوط وجلسات تفكر فحلمتها اللي خلاتها تبدل طريقتها فالتفكير..
🌸فدار إكرام🌸
إكرام فاقت معطلة مهلوكة وراسها ضارها مشات للكوزينة دغيا دارت الفطور و رجعات للبيت...
إكرام:عمران فيق غا يمشي عليك الحال
عمران:صباح الخير زين ديالي
إكرام:ايوا دغيا نوض يااااله نوووض
عمران ناض:واش لباس؟؟
إكرام:علاش هاد السؤال
عمران:لا غير مولفتكش تفيقيني بهاد الطريقة
إكرام: صافي دير اللي بغيتي الفطور فوق الطبلة
عمران:واش ماغاتفطرش معايا
إكرام:لا ما بغيتش
عمران مشا طيب البيض مع الفرماج اللي كيعجبها وداه ليها للناموسية
عمران:حبي غزالي عمري شوفي شنو طيبت ليك
إكرام:شنو هدشي اففف حيد هادشي من قدامي اعمران ريحتو خيبة
عمران:واش من نيتك يا كيعجبك؟
اكرام سدات فمها و جرات دغيا للحمام كتقيا...
عمران:إكرام نتي بيخير حلي الباب
اكرام:صافي سير
عمران:غير حليي خلاص واش نمشي ونخليك هاكا
اكرام:انا بيخير اعمران غير سير راك تعطلتي على الخدمة
عمران:واخا ولكن ايلا حسيتي براسك ماشي هي هاديك تاصلي بيا
مشى وخلاها مزال فالحمام...
اكرام:افف اش كيوقع ليا علاش تعاملت معاه ب برود حماقيت انا
بقات كدور فالدار تا حسات بالدوخة وجلسات...
اكرام:ايي راسي امم اش هاد الريحة امم اللوبيا مينة اللي مطيباها اش غندير دابا خصني ناكولها اهئ اهئ بغيت اللوبيا لبسات حوايجها و خرجات تدق على مينة... دقدقدق
🌸💍يوميــــــات جــــــارات🌸💍
🏢العمارة رقم 6🏢🌷الجزء الأول🌷
الحلقة21: #المسامحة
📖💜الجزء 5📖💜
مينة حلات: اكرام حبيبة مرحبااا بيك
اكرام: لاباس عليك ا مينة؟
مينة: اه نتي للي بنتي ليا فشكل دخلي راه لقيتي عبدالله عاد خرج
اكرام دخلات و نيفها ماشي جيهة لكوزينة و مينة كتعجب...
مينة: مالك معجبتينيش واش مريضة؟ ؟
اكرام: والو ا زين غي شميت ريحة اللوبيا تشهيتها مقدرتش نقاوم و سمحيليا صدعتك
مينة: لاا حبيبة هذا وكان راني موجدة هادشي على قبلكم باش نعرض عليكم لغذا
اكرام: عااافاك اختي جيبي ليا شوية منقدرش نصبر
مينة كتعجب منها: واخا هاني دابا
مينة جابت تبصيل صغير دارت فيه شوي دلوبيا...
مينة: هاكي غي حتى تطيب و نزلها لكم
اكرام: اتي غير اراي اكرام
بدات تاكل بطريقة غريبة حتى جلسات مينة حداها و اكرام كملات الطبسيل وحطاتو...
مينة: هههه مالك لي شافك يقول كتوحمي
اكرام: ههه من فمك لسما راني فقت مهلوكة و تقيا و الدوخة معندي خاطر
مينة: اوا نوضي انا غانطفي لبوطة و نمشي معاك لطبيبة حدانا اكرام: لهلا يخطيك ا حبيبة
خلات مينة ولادها ل امينة و مشات مع اكرام لعند الطبيبة...بعدما فحصاتها الطبيبة خرجات تتسنا على برا...
مينة: متخافيش ان شا الله تكوني حاملة
اكرام: امييين راني مخلوووعة شوفي يديا
مينة: لا انا حاسة بلي غانفرحو بيك هاد لمرة هههه
بعد شوية خرجات الطبيبة و بشراتهم بللي فعلا اكرام حاملة فرحات لها مينة و رجعاتها للدار ترتاح و هي طلعات عند سكينة سررررر دق دق
سكينة:شكووووون هانا جاية
مينة: حبيبة هادي انا
سكينة حلات لباب و تتطلع و تهبط فمينة:اش بغيتي ياك لباس صبحنا على الله
مينة: انا عارضة عليكم ليوم اجي نتي و ماماك راني بغيت نهضر معاكم
سكينة:فاش بالسلامة اااه ولا نسيت نسيتي مقلتيليها بلي كنت مصاحبة مع ادريس ولا شنو؟
مينة: الله يهديك غي اجي راني مطيبة الدجاج محمر على قبلك
سكينة:صافي الى لقضية فيها دجاج محمر صبري نفييق ماما و نلوح عليا شي حاجة و هانا جايا
مينة: اوا هكداك هه هاني غانقولها ل امينة
سكينة:واخا سيري هبطي دابا نجيو انا و ماما
دخلات سوكا لاحت عليها واحد لعباية و ضورات زيفها فييقات طامو لبسات ملحافتها و تمو هابطين عند مينة...
اما مينة دقات على امينة: سرررررر سررررر
امينة حلات: اهلا صافي قضيتو الغراض؟
مينة:زيدي جيبي معاك لولاد نتي معروضة لعندي لغذا
امينة: واش مطيبة لينا ههه؟؟
مينة: اناا عرفتك دايرة الريجيم طيبت ليك انواع د الشلايض راني فايقة من لفجر ههه
امينة: هيا دابا
لاحت امينة عليها بينوار و نزلات مع ولاد مينة لدارها دخلو لقاو الدار مبخرة...
جلسات مينة مع امينة و طامو و سكينة فالطبلة وحطات الماكلة و الدراري عزلات لهم فطبلة صغيرة...
مينة: سكينة
سكينة:نعام؟
🌸💍يوميــــــات جــــــارات🌸💍
🏢العمارة رقم 6🏢🌷الجزء الأول🌷
الحلقة21: #المسامحة
📖💜الجزء 6📖💜
مينة: نتي درتي فيا خير كبير اللي رديتو ليك بالخايب بغيتك تسمحي ليا و بالزربة راه موك بدات فالدجاجة يالاه دغيا سكينة:ماما زگاي حتى ندشنها انا بعدا و نتي حتى ندووق هاد لخير عاد نرض عليك ا مينة
مينة: يالاه زيدو بسم الله
امينة: و اكرام؟
سكينة تتخشي فوجها: ممممم بنيين بنييين
مينة معمرة فمها بالدجاج: راها عيانا خليتلها حقها من اللوبيا واحد شوية نديه ليها ها لوبيا بالكرعين راه زوين و سخون ليك
سكينة:اححح ممممم هادشي بنين الله يعطيك صحة
مينة: هي صافية لبن هههه؟
سكينة:اه مسامحاك تتعرفي تسلكي ليا الطريق ا الموصيبة
مينة: اوا شفتي بعدا..مرواااان واااا مروان
مروان: نعام ا ماما
مينة: هاك ا حبيبي دي هادا لطاطاك اكرام عنداك اتكب ليك
مروان: واخا اماما
دا مروان اللوبيا ل اكرام لي من قبيلة كتقيا فالدار و كلات منها عاد تكات..فاش رتاحت شوية قررات تبشر لبنات و مشات عندهوم...
دخلات اكرام على البنات و فرحاتهم بخبر حملها و هي متوترة..
سكينة:و الله حتى فرحت ليك ا حبيبة
اكرام متوترة: كيفاش نقولها لعمران ههه غايفرح بزااف
امينة: شفت فواحد لفيلم دارت المرا حفلة صغيرة بالليل و دارت ليه التيست فبواطة مزوقة و عطاتها ليه كاضو ههه
اكرام: فكرة زويييينة ا امينة شكرا ليكم بزاف غانمشي نبدا نوجد السهرة قبل مايجي عمران
مشات اكرام لدارها و لبنات كلشي فرحان حيث غايكون عندهم مولود جديد فالعمارة شوية مينة شداتها الدوخة..
سكينة: امينة شديها شديها
داو مينة لبيتها و تاصلو ب عبدالله اللي جا كايجري...
عبدالله: اش كاين ياك لاباس..مينة؟؟
مينة: اه احبيبي الدار كاتدور بيا ا مولاي الشريف ااه ا راسي
سكينة: راني تاصلت بالطبيب البغاينوسي دابا يجي
امينة شادة ف مينة: متخافيش متكون غي المعدة عرفتي اش درتي للدجاج ههه
مينة : ااه كرشي مقلوبة اه عبلا حيد من حدايا اوووه ريحتك حيد مبغيتش نشوفك اح اح
امينة شافت ف سكينة: هههه وااقيلة واقيلة
مينة: لاااا االبنات شحال ولدت محسيتش هكدا عبلا حيد مبغيتش نشوفك
خرج عبدالله من البيت مستغرب حتى تيسمع السرسار سررررر سررررر
عبدالله حل: سلام اتفضل ادكتور
البغاينوسي: اش هاد لغيبة ا لالة طامو وشحاال مشفناك
طامو: راني اولدي كنت فلبلاد دابا جبناك لواحد السيدة سخفات لنا
دخل البغاينوسي بدا يفحص مينة و عبدالله كايطل من ثقبة لباب حيد الطبيب السماعات..
البغاينوسي:مبرووك الالة نتي حاملة دوزي عندي للعيادة ندير ليك راديو
امينة: مبروووووك ا زين نتي و اكرام فنهار واحد هههه
سكينة: مبروووك حبيبة مبروووك
مينة تتفتف: ش ش شوفو عبلا طللو عليه
طلو على عبدالله للي سخف بعدما سمع الخبر فيقوه و قنعوه يشد فراسو و مايحماقش مينة اللي توحمات على عبدالله مبقاتش حاملاه...
🌸فدار اكرام🌸
اكرام صاوبات طبلة دارت لها قلع شفاف بيه وريدات بالنقري و حطات فاز صغير فيه وردة كيسان و طباسل و شموع قادات طبلة رومنسية و عمرات البيت بالورد مشات لبسات كسيوة فالغوز و قادات شعرها طلقاتو و دارت ليه مقبط غوز فالجنب و ريحة و ماكياج خفيف و جلسات تسنا عمران...
عمران دخل:حبي هانا جيت فينك
دخل عمران لقى بواطة فوق الطبلة حلها لقى فيها صبيبطات صغيورين فالابيض بقى يشوف و لقى ورقة التحت حلها "بابا حبيبي تهلا فماما هي كتبغيك بزااااف سمح ليها على تعاملها ديال الصباح ولكن ماشي لخاطرها حيت غنعدبها شوية غير صبر عليها😊 كنبغيك بزااف قريب غادي تشوفني" بقى كيقرا و مصدوم شوية بانت ليه إكرام داخلة...
عمران: وواش هدشي اللي فراسي بصححح
إكرام حاطة يديها على كرشها:اه احبي غتولي اب ههه
عمران طلق ضحكة وهزها كيدور بيها:هاهاها الحمد لله غنولي اب الحمد لله
اكرام:ههه نزلني مبقيتش بوحدي ههه
عمران:صافي هانا هه سمحيلي بالفرحة ما حسيت هانتي اجي هنا تكايي ورتاحي
اكرام:راني حاملة ماشي مريضة
عمران:بلا نقاش نتي غاترتاحي ياله قوليلي شنو تشهيتي؟ اكرام:راني قاديت الطبلة
عمران:امم نو خصني نطيب ليك شيحاجة مشهياها اكرام:صراحة قبيلة كنت مشهية اللوبيا ومينة الله يكثر خيرها عطاتني شوية امم عرفتي تشهيت اللزانيا اللي كتصيب عمران:شنو لازانيا ايوا لا احبيبة خصك شي حاجة صحية اكرام:اهئ اهئ بغيت لازااانيااااا هي اللي تشهيت
عمران:شش صافي البكاية ديالي ههه بقاي هنا نصيبها ونجي
اكرام:عمران
عمران:نعام احبي اكرام:سمحلي على تصرفي ديال الصباح ماعاملتكش مزياش
عمران حط يديه على فمها:شش ماشي لخاطرك احبيبتي ياله رتاحي
تعشاو فجو رومنسي عبروا فيه على فرحتهم و واعدوا راسهم يربيو ولادهم تربية حسنة.
#نهاية_الحلقة
يتبع...