الحلقة 14 #احببت_طباخة
وقفنا عند شهد كانت داخلة المطعم و هي داخلة المطبخ اندهشت لما شافت الشيف طارق رجع
و سمعته بيتخانق مع حمزة مدير المطعم
حمزة :طارق اهدي بقا مالك في ايه
طارق :ازاي اهدي وانا راجع من الإجازة بتاعتي و الاقي عيلة صغيرة اتعينت شيف أساسي مكاني و قال ايه اشتغل المساعد بتاعها
حمزة :العيلة الصغيرة دي اللي بتتريق عليها كبرت المطعم اللي مكنش فيه غير 4 او 6 زبائن كل يوم بيجو العيلة دي من اول شهر أثبتت كفاءتها المطعم بقا زحمة بالذات الشيفت بتاعها بعد ما قولت اني هقفله هي اللي خلته احسن مطعم في إسكندرية كلها العيلة اللي مش عاجباك يا طارق أثبتت كفاءتها احسن منك و من اي شيف اشتغل هنا
طارق :ياااه كل ده للدرجة دي يا حمزة اغيب شهر ارجع الاقيها اخدت مكاني خالص
حمزة :انا كرمتك و قولت اخليك تاخد الاحطياتي او مساعد لشهد وانت مش راضي
طارق بيضحك : انا علي اخر الزمن اكون احطياتي او مساعد شيف
انا سايبهالك خالص و ماشي
طارق و هو ماشي شاف شهد
بصلها بقرف و خرج
و دخلت المطبخ شافت حمزة
شهد :مستر حمزة انا ممكن اسيب الشغل او ارجع مشاهدة شيف لو هو أتضايق
حمزة قاطعها :ايه اللي بتقوليه ده يا شهد لا طبعا سيبك من طارق ده المهم انا عايزك في موضوع مهم جدا
شهد :خير يا مستر حمزة
حمزة :المطعم بقاله 3 سنين مفتوح و احنا كل سنة بنحتفل بمرور سنة علي المطعم من يوم افتتاحه
شهد :مبروك يا مستر حمزة دي حاجة كويسة
حمزة :بصي اليوم ده هيكون يوم إجازتك مش هتتشغلي
شهد :تمام حضرتك
حمزة :بصي يا شهد
و خرج فلوس من جيبه
ده مرتبك انتي كنتي هتاخدي نصهم زي ما طارق كان بياخد لكن انا زودت الضعف عشان انتي اثبتي كفاءتك فعلا و ده بجد مش كلام و خلاص
شهد :بس ده كتير اوي حضرتك
حمزة :مش كتير طبعا عليكي يا شيف شهد مع انك صغيرة علي كلمة شيف بس تستاهليها ولله
شهد :ربنا يخليك بجد حضرتك ده من زوقك ولله انا متشكرة جدا
في الوقت ده حمزة طلع كارت من محفظته
حمزة :نيجي بقا الموضوع الأهم
ده كارت ل بيوتي سنتر صاحبته تكون عمتي انتي هتروحي هناك و هتديهم الكارت ده و انا كلمت عمتي عشان تعرفك هتروحي و هما هيشوفو شغلهم و تختاري فستان حلو و تعملي ميكب و كل حاجة هناك هيعملوهالك
شهد :بس ده ليه
حمزة :بصراحة كل الزباين اللي في المطعم نفسهم يشوفو الشيف العظيمة دي اللي عملت الاكل الروعة وانا قررت افاجهم و طبعا لازم تكوني متألقة مع انك ارق وانتي كدا ولله لكن عايزك تكوني احلي واحدة في الحفلة
شهد :تمام حضرتك هي هتكون امتي بالظبط
حمزة: بكرة و طبعا تروحي البيوتي سنتر من العصر عشان الحفلة هتكون بالليل
و عشان تلحقي تعملي شعرك و تختاري التسريحة المناسبة و اللوك المناسب و كل ده عليا متقلقيش لان ده مجرد 1 % من اللي انتي عملتيه معانا
شهد بسعادة :انا متشكرة اوي لحضرتك بجد
حمزة :متشكرة ايه يا شهد انتي اختي الصغيرة مع ان اختي متدلعة جدا لكن انتي اعتمدتي علي نفسك و اشتغلتي
المهم انا هسيبك تشوفي شغلك و تعملي الاصناف
شهد :مستر حمزة انا عايزة اغير أصناف في المنيو انهاردة ممكن
حمزة :براحتك اللي تشوفيه
انا خارج دلوقتي عشان اظبط التجهيزات لبكرة
_________
زياد كان بياكل في المطعم
حمزة شافو و راح عنده
حمزة :اهلا بصديق المطعم
زياد ضحك :اهلا يا استاذ حمزة ازيك
حمزة :انا تمام
صحيح هتحضر حفلة بكرة
زياد :حفلة ايه
حمزة :انت طبعا نفسك تشوف الشيف اللي بيعمل الاكل
زياد :ياريت بجد هموت و اشوفه
حمزة :بكرة الاحتفال السنوي للمطعم و كمان الحفلة هنشكر فيها الشيف
زياد :الحفلة هتكون امتي
حمزة :الساعة 7
زياد :تمام هاجي ان شاء الله و بالمرة اشوف الشيف اللي انت مخبيه
______________
عند ناصر ابن صاحب القناة كان قاعد في الفيلا بتاعته في الجنينة و بيفكر في رانيا و ان هي دايما بتتجاهله
و هو سرحان رحمة مامته قعدت معاه
رحمة :ايه يا ناصر مالك سرحان في ايه
ناصر :ها. .. لا مفيش يا ماما
رحمة :هي حلوة
ناصر :هي مين
رحمة :اللي واخدة عقلك يا حبيبي
ناصر ضحك :عرفتي ازاي
رحمة :هو ايه اللي عرفتي ازاي ده انا امك يعني اكتر حد بيحس بيك
ناصر :بس هي مش بتحبني ولا مدياني فرصة
رحمة :يمكن في حد في حياتها
ناصر :لا معتقدش هي بتركز في شغلها جدا و مش مرتبطة
رحمة :يمكن بتحب حد
ناصر :تفتكري
رحمة :ممكن ليه لا
_____________
اما شهد كانت في الوقت ده خلصت شيفت و في طريقها للبيت
____________
زياد روح البيت شاف ريماس قاعدة بتتفرج علي tv و متضايقة زياد قعد جمبها
زياد :حبيبتي عاملة ايه
ريماس :زهقانة
زياد :و اللي يخرجك
ريماس :ياريت أخرج
زياد :طب بصي قومي دلوقتي حضري فستان حلو كدا و جهزي نفسك الساعة 7 هنخرج و هوديكي المطعم اللي بتحبي اكله و كمان في حفلة هناك
ريماس بسعادة :ياريت بجد ولا بتهزر
زياد :انا عمري هزرت معاكي
ريماس :كتيييير ما بعدش يا جيمي
زياد بيضحك :لا بجد ولله يلا اطلعي نامي عشان نروح الحفلة بكرة
ريماس باسته و طلعت اوضتها
______
ميار اتصلت عليه في الوقت ده
زياد :ايه يا ميار
ميار :كويس انك فاكرني
زياد :معلش ولله مشغول
ميار :طيب انا بكرة رايحة اعمل شوبينج تعالي معايا
زياد :مش هينفع ولله مش فاضي
ميار بعصبية:هو كل حاجة مش فاضي مش فاضي
انا زهقت بقا
زياد :غصب عني اعملك ايه يعني
ميار:لا متعملش حاجة
زياد :ماشي اقفلي دلوقتي عشان عايز انام
سلام
________
نوال سمعتها و راحت عندها
نوال :مالك يا قلبي
ميار :زياد مش بيكلمني خالص و بقوله أخرج معايا بكرة مش فاضي
نوال :ميار انا حاسة ان زياد في حد في حياته
ميار:لا طبعا يا مامي زياد مستحيل يكون في حد في حياته ده مش بيفضي اصلا و كمان انا عارفة لو في حد في حياته كان خطبها
نوال :شوفي يا قلبي الراجل ميتغيرش الا لو لاقي البديل او حد في حياته
ميار :يا مامي ده في حالة انه كان بيحبني و مهتم و فجأة اتغير لكن زياد كدا من الأول اصلا
عن أذنك طالعة اوضتي
__________
إبراهيم و شيماء كانو واقفين في البلكونة بيتكلمو
إبراهيم :بس انتي وحشتيني جدا
شيماء :وانت كمان يا قلبي
عارف يا هيما انا مش مصدقة بجد حاسة اني بحلم ولله مبسوطة اوي بجد بوجودك معايا
إبراهيم :اوعدك اني هخليكي فرحانة دايما
___________
شهد كانت سهرانة بتتفرج علي tv مع مامتها و باباها
دخلت اوضتها و جابت فلوس و طلعت
شهد :بابا حضرتك انا قبضت اول مرتب و ده نصه و زيهم هيكونو عندك كل شهر عشان المصاريف و كدا
باباها :ايه اللي بتقوليه ده يا شهد دي فلوسك يا بنتي خليهم معاكي و متشيليش هم حاجة خليهم ليكي انتي
شهد :بس يا بابا انا
مامتها قاطعتها:خلاص يا شهد مفيش حاجة دول ليكي انتي مش لينا
______
