رحت اشتري دجاجة مشوية انا واگف چان يجي رجال شايب مبين عليه فقير ومحتار سأل ابو المطعم بيش الدجاجة؟
گاله ٦ آلاف دينار ..
الحجي طلع من المطعم وگعد يسحب بفلوسه وشوية ورجع لأبو المطعم گله زين ما عندك دجاجه زغيرة او تالفه وتنقصلي من سعرها ابو المطعم طلع تليفونه وگام يحچي بالتليفون وفرحان ويضحك...
الحجي خطيه من شاف نفسه ابو المطعم مامهتمله استحى وراح وگف على صفحه ينتظر ابو المطعم يكمل تليفونه وانا مصدوم ليش هيچ يتعامل وي الفقير وضنيت السوء بيه وبيني وبين نفسي گلت أنه ادفع للحجي فلوس الدجاجه ولا هيچ ينذل هذا الفقير وانتظر ابو المطعم يكمل تليفونه
كمل ابو المطعم تليفونه وهو فرحان چان يروح گبل يجهز دجاجه مع الخبز والمقبلات واجه صاح الحجي كله تعال حجي تعال الظاهر انت وجهك وجه خير عليه هسه خابروني زوجتي جابت توأم وهاي الدجاجه مني الك هديه بهاي المناسبه....
أخذها الحجي وگام يدعيله دعاوي خير ورزق وراح ومن بعد ما أشتريت وخلصت گتله يابه مبروك عليك ويتربون بعزك
چان يضحك ابو المطعم وگلي لا يمعود ماكو هيچ حچي انا كذبت كذبه بيضه وان شاء الله الله ميحاسبني عليها
گتله شلون بشنو چذبت..
گلي هذا الرجال اعرفه وهو صدگ محتاج وفقير وحالته تعبانه وعندة ٣ بنات وزوجته وبناته يساعدنه بحياكة ليفة الحمام وهو يفتر يبيعهن بس مايقبلون واحد يتصدق عليهم
ولا هو يأخذ صدقه وانا سويت هذا الفيلم گدامه حتى انطيه الدجاجه هديه مو صدقه وانا حبيت انطيه الدجاجه مجانيه بس بدون ما احسسه انو هو إنسان فقير وانا اتصدق عليه
#الصراحه الموقف صدمني ودمعت عيوني وحاولت اتمالك نفسي وگتله لعد ابريني الذمه لأن ضنيت بيك سوء من شفتك تجاهلت الحجي...
أجبروا خواطر الفقراء فلها منزله عظيمه عند الله سبحانه وتعالى
وما اقبح الغني عندما يتسلى بدموع الفقراء سيكون عذابه عند الله عسير
اللَّهُـــم اكتب لنـا في هذا اليـوم مـن الخـير مـا تقسـمـه لخلقك
وأكفنـا شـر مـا يكـــون قـبل أن يكـون ...
تحياتي اخوكم 🌹احمد ❤️
