إسكريبتات وقصص قصيرة

اسكريبت رقم 7

- يلا يا فرح بقي هنتأخر ع خطوبه ابن خالتك

• ماما انا تعبانه النهارده اعتذري بالنيابه عني

- يلا يا فرح بلاش دلع .. انتي عايزه تصغريني قدام خالتك!

• اصغرك اي يا ماما بس انا بقولك تعبانه

- خُديلك مسكن ويلا تعالي

وهو المسكن هيداوي جرح قلبي! .. كلهم مبسوطين" وفرحانين بخطوبته وانا قاعده هنا قلبي بينكوي بس هو مش ذنبه هو ميعرفش اصلاً اني بحبه انا الي غبيه ..يا رب قويني لما اشوفه ايده ف ايدها بعد لما يلبسوا الدبل .. بس! بس انا الي كان المفروض اكون مكانها .. انا احق منها بيه.. انا الي عشت سنين بيكفيني نظره عينيه انا الي كنت بعشق التراب الي بيمشي عليه .. ف الاخر  نورهان دي الي لسه عارفاه من اربع شهور تاخده مني "

______________

- متركزيش عليهم يا فرح .. اهدي

اتكلمت ودموعي بتغلبني• شايفه اخوكي يا الاء .. شايفه اخوكي والي بيعمله فيا

- اهدي وامسحي دموعك علشان محدش يلاحظ .. وبعدين انتي زعلانه ليه دلوقت ما انا ياما قولتلك اعترفيله بمشاعرك انتي الي غبيه وكنتي بتتراجعي

• كنت غبيه فعلاً .. انا متوقعتش ان ده يحصل يا الاء متوقعتش

- طب اهدي يا فرح علشان خاطري .. اهدي .. بلاش تعملي ف نفسك كده

• بصي يا الاء بيلبسوا الدبل .. شايفه فرحته شايفه ابتسامته الي ماليه وشه

- تعالي يا فرح اروحك يا حبيبتي .. تعالي

• لأ سيبيني خليني .. خلي قلبي يتوجع اكتر .. انا تعبانه اوي يا الاء تعبانه او..

مكملتش كلامها وكانت واقعه ع الارض

- فرح يا فرح الحقوني يا جماعه .. الحقي يا ماما الحق يا عبد الرحمن

__________

صحيت ع دوشه حواليا واول ما فتحت عنيا شوفته كان قاعد ع كرسي جمب سريري وملامحه باين عليها القلق

_ فرح انتي كويسه

دورت وشي الناحيه التانيه ودموعي بتنزل وهو فضل قاعد تقريبا ربع ساعه وبعدين سمعت قفله الباب

- مالها  فرح يا عبدالرحمن بنتي مالها

_ فرح يا خالتي عندها صدمه عصبيه

- يا مصيبتي ... صدمه عصبيه من اي يا عبد الرحمن

_ مش عارف يا خالتي .. مش عارف

- مش عارف ازاي يا عبد الرحمن هو انت مش دكتور

_ يا خالتي الصدمه العصبيه بتبقي ناتجه عن ضغوطات نفسيه كتير وحقيقي انا مش عارف اي الي وصلها انو يجيلها صدمه عصبيه