نوڤيلا نيران الحب(مكتملة)

الفصل الأول

- إيه يا چو، روق كدة.

=ما انا رايق أهو يا ستي.

-لا، ما هو واضح، مش عارفة زعلان ليه، ما عادي يعني هي أول بنت تدخل حياتك وتسيبك.

بص ليا بغضب وعينه بقت حمرا وعروق ايده ظهرت، وده معناه إني غلطت في الكلام.

-قصدي يعني، مش أول بنت تسيبوا بعض.

=أيوة كدة اتعدلي، انا محدش يسبني، أنا متسابش.

-يوسف، طب استني بس.

نزل وهو زعلان، بس يستاهل، كل مرة بيعلق بنات الناس بيه ويسيبهم، كأنه بينتقم منهم أو بمعني تاني بيتسلي بيهم، فرحانة فيه أوي إن دي أول بنت تسيبه.

-ندي، يا ندي.

=نعم يا ستي.

-شوفتي اللي حصل مع اخوكي، البنت اللي كانت علي علاقة بيه سابته، شمتانة فيه أوي.

=طيب.

-ايه ده في إيه، مالك يا نودي.

=حازم يا سارة مش بيرد عليا.

-…….

=مش بتردي عليا ليه ؟

-مستنياكِ تحكي الحكاية كلها وبعدين أتكلم.

=امبارح كنا بنتكلم وقولت له يجي يتقدم ورد زي العادة، إنه لسة مخلص جامعة ومش لاقي شغل وازاي هيجي يتقدم، قولتله إني مش هرد عليك تاني ولا هكلمك لانه بيخلق حجج وأعذار من الهوا ، كنت وقتها غضبانة ومش عارفه الكلام ده طلع مني إزاي، فزعل ومش بيرد عليا من امبارح.

-احسن والله.

=سارة إنتي بتقولي إيه ؟!

-إيه، مستغربة ليه ؟، إنتي عارفة من الأول العلاقة دي أنا مش مرتاحة ليها لأنها من ورا أهلك وحرام قبل ما يكون خيانة لثقة عمي اللي وضعها فيكي.

=سارة، أنا بحبه.

-مش مبرر خالص علي فكرة، ياما ناس بتحب بس حبها في قلبها مش بتغلط تحت إسم الحب، علاقتكم وعلاقة أي حد زيكم بتدنس الحب، ربنا محرمش الحب بالعكس النبي كان بيحب زوجاته حب كبير، بس حرم التصرفات اللي بتعملوها تحت المسمي ده، ومن أول كلامكم قولت ليكِ عاوزاك يجي يتقدم بس مسمعتيش كلامي وأهو سابك.

=حازم مش يوسف يا سارة، مش زيه هيسيبك ويروح لغيرك كل يوم.

-……………

=سارة أنا آسفه مش قصدي والله.

-وبتعتذري ليه يا ندي، عندك حق، حازم مش يوسف، بس أنا كمان مش إنتي، أنا مستغربة إنك بتقارني بين علاقة مستمرة بقالها سنتين في الضلمة وعلاقة ما بدأتش أصلا، عمر ما كان فيه أنا ويوسف يا ندي، أنا حبي في قلبي وهو معتبرنا اخوات، يبقي فيه فرق السما والارض ما بينكم وبينا.