نوڤيلا نيران الحب(مكتملة)

الفصل الرابع

-يوسف عشان خاطري سيبه.
بصوت عالي=ادخلي جوا، ادخلي

"الكل اتجمع علي صوتنا وعرفوا يخلصوا خالد من يوسف، جدي شاور لندي عشان تاخدني بس مرضتش، خوفت يحصل حاجة وأكون أنا السبب."
"عمي قرب من يوسف وكان هيضربه بس أنا وقفت قصاده "

-عمي، لأ، الموضوع مش كدة، يوسف مش غلطان، هو كان بيدافع عن حقه فيا بس.
=جدي، خلي حد ياخد الواد ده من قصادي أحسن والله هرتكب جريمة دلوقت.

جدي صوته علي وكان هيتعصب من أسلوب يوسف، هو شبهه آه بس مش بيحبه يعلي صوته في حضرته"

-علي فوق إنتِ ويوسف يا سارة.

"مسكته من ايده ودي كانت أول مرة أمسك أنا ايده، خدته وطلعنا فوق وجبت الشاش والقطن عشان أعقم ايده."

-بتوجعك ؟
شاور علي قلبه= هنا اللي بيوجعني، يعني لو كنتِ وافقتي عليا من زمان، كان ده كله حصل ؟
-مش ذنبي يا يوسف، مش انا اللي قولت له يحبني !.
بص ليا بغضب-انا أقصد يعني.....
=متجبيش سيرته أحسن يا سارة، لأن غضب الدنيا فيا دلوقت ومش عاوز أخرجه فيكِ.
-انا مقصدش حاجة يا يوسف وكلامه ولا يفرق معايا.
=طب ليه ميفرقش معاكِ ؟
-يعني مش عارف ؟!
=يمكن عارف بس عاوز أسمعها.
بطلع لساني- وأنا مش هقولها.
=والله ما عارف أنا بحبك علي إيه !
-ها، ليه يا بابا ده انا قمر، ولا تحب أوافق علي اللي تحت ده.
مسك ايدي وشدها لدرجة كنت حاسة هتنخلع في ايده.
-اه، ايدي يا يوسف.
=مش قولت سيرته متجيش علي لسانك، إنتِ مصممة تخرجيني ليه عن شعوري.
-ايدي بتوجعني، سيبها.
ساب ايدي-لو فضلت بالأسلوب الهمجي بتاعك ده، إنسي إني اتجوزك فاهم.

"سيبته ونزلت ولاقيت الكل تحت إلا خالد، ندي قامت ليا وقالت إن جدي قاله ملكش مكان هنا وبعت معاه سواق يوصله لمحطة القطر، فرحت إن إحنا خلصنا من مشكلة من مشاكلنا، ويبقي فاضل المشكلة الأكبر، يوسف !"

-اعملوا حسابكم كتب كتاب يوسف وضي يوم الخميس مع خطوبة ندي وحازم.
=بس أنا مش موافقة يا جدي.

"الكل بص بإستغراب إلا البيه كان قاعد وكله برود تقريباً فاهم إن رفضي ملوش لزوم وإني كدة كدة له."

جدي ابتسم-مش موافقة ليه يا ضي.
=ده واحد همجي يا جدي، بيتفنن في تعذيبي، ويتمتع بخوفي، وما بيصدق يجرحني بكلمة، شخص زي ده أرتبط به ازاي !
بنفس البرود اللي موجود فيه داء وعادة-بس بحبك.

"قلبي المهزأ دق وكان هيحن بس ايدي سكتته، لسة بتوجعني، المفتري كان هيقطعها"

=وأنا مش عاوزاك سهلة أهي.
وقف قصادي وحط ايده في جيب بنطلونه-وانا عاوزك سهلة أهي.
-إنت إيه يا أخي، فاكر إن كل حاجة بتعوزها لازم يتقالك حاضر ونعم عليها !

"التفت لجدي وقولت له إني مش موافقة."

جدي ضحك لأنه عارف إن كل ده من ورا قلبي-خلاص يا سارة، نكلم بشمهندس خالد، وهو ما هيصدق الرجل.