نوڤيلا نيران الحب(مكتملة)

الأخير

-انا مش فاهم حاجة، ليه أنقذتني لما الحارس حاول يقتلني.
=لأنه تبع خالد.
بسخرية- وإنت تبع مين ؟
=تبع الحق، وعاوز اللي قتل أختي وعارف إنه مش إنت.
-وطالما واثق إنه مش أنا، عملت كل ده ليه ؟.
=أنا قولت عارف بس مش واثق، وعشان أتأكد محتاج دليل وده اللي جدك اتعهد ليا به.
بصدمة-جدي !.

"كنت مصدومة مش فاهمة حاجة، جدي يعرف كل حاجة بس مقالش !، وحازم عارف ببرائة يوسف ورغم كدة اتجوزني عشان ينتقم مني !، كنت حاسة دماغي هتنفجر، تماسكت وسألت حازم."
بحزن- يعني جدي كان عارف كل حاجة ووافق إنك تتجوزني وتنتقم مني ؟!
بإستغراب= وانا انتقمت أو عملت ليكِ حاجة ؟!.
"سكت لأنه فعلاً معملش حاجة ضايقتني".

-مش وقت العتاب ما بينكم، أنا عاوز أعرف مراتي فين ؟.
=مراتك في أمان، متقلقش.
-في أمان ازاي وهي معاه !.
=خالد مش هيأذيها لأنه بيحبها.
"يوسف اتعصب وكان هيمسك في خناق حازم لولا إني وقفت في النص"
-اهدي يا يوسف، مش قصدي، قصدي إنه بيحب ياسمين وفاكر إن سارة هي ياسمين.
يوسف مسك دماغه= أنا مش فاهم حاجة.
-انا هقولك كل حاجة……

"أنا وياسمين وبابا كنا عايشين في دبي بعد موت ماما، وخالد إبن خالنا من صغرنا بيحب ياسمين، بس ياسمين كانت بتعتبره أخوها زيي بالظبط، لما نجحت في ثانوية، قررت تنزل مصر عشان تدخل كلية هندسة هنا، وطبعاً لازم تقعد عند خالي، محدش فينا كان يتوقع إن حياتنا هتتغير بعد اليوم ده…"

_____
"عند سارة"

=كنت بحبها مش حب لا عشق، من صغرنا واضعها في مكانة كبيرة في قلبي، مكانش حلمي هندسة بس لما عرفت إنها عاوزاها قررت أدخلها أنا كمان، بس للأسف كليتها جات في القاهرة وأنا في عين شمس، مزعلتش لأني عارف إنها عايشة معانا في البيت وكدة كدة هقرب منها وهعترف ليها بمشاعري، واكيد هيجي يوم وتحبني ولو نص الحب اللي بحبه ليها.
"بص ليا بغصب وعيونه بقت شرار"

بغضب=بس هو خدها مني.
-هو مين ؟.
بسخرية= جوزك.
-ازاي ؟!
=جات في يوم وقالت ليا إنها بتحب، وكنت مستني تنطق إسمي بس قالتلي بحب زميل ليا إسمه يوسف ولأنها مش قريبة من أخوها حازم زي ما قريبة مني، شاركتني سرها.

من حبي فيها سكت وقولت عادي مجرد اعجاب وهيعدي ودي أول سنة في الكلية وهتنسي بعد كدة، بس لأ منسيتش، كل يوم كانت تحكي ليا عنه وعن حبها، وحتي بعد سنتين  لما هو اتجاوب معاها شهر حكت ليا برضه، بس فرحتها مدامتش لأنه ندم وقالها إن كل ده غلط وإنه بيحب بنت عمه.

قرب مني=تعرفي كان عندي فضول أعرف مين هي اللي خلته يسيب ياسمين ويعلن حبه ليها، ولما عرفتك قولت إنه مش غلطان وعنده حق، جمالك يعديها ألف مرة.

بغضب-متقربش مني أحسنلك.
بيبعد= بعدت أهو، اهدي كدة يا قطة، لأن بطريقتك دي بتشديني ليكِ اكتر.
-وعشان هي رفضتك بتعمل كل ده !
بصريخ= أنا مترفضش، هو السبب وهو اللي علقها به، وبعد كدة سابها.