نوڤيلا نيران الحب(مكتملة)

الفصل التاسع

          "عند ندي"

"كلمة قادرة تشل حركتك وتخلي قلبك يخرج من مكانه، إحساس الكلمة حلو بس لو قالها واحنا سوا بنتعشي علي الشموع أو وهو باصص في عيني وبيقولي الفستان ده حلو عليكي متلبسيهوش تاني لأني بغير، أو الحياة وقفت والقدر رضي علينا وقال هسيبهم يعيشوا الحب، كنت هحس بطعمها أكتر، بس دلوقت قالها وهو بيصرخ وقالها بغضب مش بحنية !".

مسكني من دراعي-ايوة بحبك بس الحب ده لازم أدفنه جوايا لأنه مينفعش، مينفعش أحب أخت اللي قتل أختي، مينفعش أحبك بس بحبك، علي أد كرهي لأخوكِ بحبك، ولو تعرفي أد إيه بكرهه، هتعرفي أد إيه بحبك.
صوته هدي وحسيته بيبكي-بس يا خسارة، لازم الحب ده يندفن هنا في قلبي، لأنك آخر واحدة هفكر فيها.
=أنا…..
-إنتِ تنسي كل الكلام ده، وافتكري إني هنتقم منكم وبس واللي هيساعدني في ده جوازي منك.
قرب مني- اهلاً بيكِ في جحيمي، ندي سليمان نصران أخت يوسف نصران.
" وسابني وخرج ، عرفت إن حياتي هتاخد مجري تاني وإني هتعب علي ما أغير تفكيره من ناحية أخويا وعيلتي."

_____
            "عند سارة، صباحاً"

بكسل=صباح الخير.
-صباح الحب، ايه يا حلو، صاحي من بدري ليه ؟.
اتعدلت=وانت صاحي من بدري ليه ؟!، أظن هتقولي رايح الشغل !.
-اممم، صراحة اه، جدي طلبني وقالي فيه حاجة مهمة ولازم اروح الشركة بس مش هتأخر، وإنتِ يلا قومي البسي عشان نروح الڤيلا.
=طب ليه ؟!، ما أستناك هنا ونفضل قاعدين هنا، الفندق حلو أوي.
قرب مني ومسح علي وشي-معلش يا حبيبي هبقي مطمن عليكِ وإنتِ في الڤيلا، هنا مهما كان عدد الحرس هكون قلقان برضه، يلا عشان منتأخرش واوعدك هفسحك وأعملك اللي إنتِ عاوزاه.

"ابتسمت له وقومت لبست، وصلني الڤيلا ومشي، دخلت الڤيلا لاقيت ماما ومرات عمي بس، ولما سألتهم عن بابا وعمي قالوا ليا في الشركة، استغربت لأن بقالهم حوالي سنتين مش بيروحوا الشركة وكل شغلهم من البيت، طلعت أوضتي وافتكرت اللي حصل امبارح في الفرح."

          "عودة لأمس"

-ايه يا جماعة هتبدأوا من غيري ولا إيه.
كلنا في صدمة واحدة-خالد !!
قام له حازم وحضنه= أحب اعرفكم، خالد إبن خالي.

اتصدمنا كلنا بس كدة الأمور وضحت، حازم وخالد
اتفقوا سوا علي الانتقام من يوسف عشان ياسمين، والأهم إن خالد اختار شركتنا بالذات عشان يشاركها ويبقي قريب منا، وعشان كدة كان عاوز يتجوزني عشان الانتقام من يوسف يبقي في أخته وحبيبته.
بعد ما فوقت شوية من صدمتي، وقفت قصاد المأذون وقولت له مفيش كتب كتاب، مكنتش هسمح إنهم يضحوا بندي وأسكت !

-ضي، ابعدي، خلي المأذون يشوف شغله.
قربت من جدي=ماسكين إيه علينا يا جدي عشان نسلم ليهم ندي كدة ؟!، دول ممكن يدبحوها واحنا مش حاسين.

شوفت ندي بتعيط، خوفت عليها اكتر وبصيت ليوسف عشان يقول حاجة، لاقيته هو وخالد في حرب عيون والشر طالع من عين كل واحد فيهم، غصب عني عيوني جات في عيون خالد، لاقيته بيبص ليا بجرأة، خلت يوسف عاوز يقتله ومسكوا في خناق بعض، وقتها سمعتوا بيقوله إنت خدت مني واحدة وأنا هاخد منك اتنين !