||مامن دليل||

part 14

انت راجع من شغلك متأخر ، راجع تعبان جدا من يوم مرهق ، مجرد ما تدخل البيت تروح على سريرك وترمي جسمك لانك محتاج تنام من كتر تعب اليوم ..
بعد ساعة او اتنين تفوق من نومك وأنت في حالة غريبة؟! انت مش قادر تحرك جسمك! جسمك كله كأنه مشلول ! بتحاول تحرك ايدك لكن مش عارف ، بتحاول تقوم تقعد على السرير برضه مش قادر ! هنا بتصيبك حالة من الفزع! تحس انك مش عارف تاخد نفسك لانك حاسس ان في حاجة تقيلة جدا على صدرك بتمنعك انك تاخد نفسك !.. مش كده بس انت قررت انك تفتح عينك ، مجرد ما تفتح عينك تلاقي كائن مخيف طابق على صدرك وايده الاتنين على رقبتك ! الكائن بيخنق فيك!.. بتحاول انك تقول اي ايه من القرآن او حتى تقول يارب لكن مش عارف كأنك أصبت بالخرس!... بعد دقيقة اخيرا قدرت تقول ( يارب ) مجرد ما تقولها تصحى من الحالة اللي كنت فيها؟! لو قريت المشهد ده وقولت انه حصل معاك فاحب اقولك ان الحالة دي اسمها شلل النوم أو الجاثوم؟!...

يعني ايه جاثوم؟!

الجاثوم او شلل النوم هو انك تكون فاقد القدرة على تحريك جسمك بالرغم من وعيك التام باللي بيحصل حواليك ، وده بيحصل لما تدخل في مرحلة النوم أو في حالة الاستيقاظ أثناء حركة العين السريعة ( REM ) وده بيحصل لمنع الشخص الحالم انه يمثل ما يحلم به في الحقيقة!..

بيحصل الجاثوم لما بتدخل في النوم او لما بتصحى ، واثناء النوم بيمر جسم الإنسان بمرحلتين ، مرحلة النوم غير الحالم ومرحلة النوم الحالم، وبتحصل مرحلة النوم الغير حالم الاول وبعدها ينتقل الجسم لمرحلة النوم الحالم...

في مرحلة النوم الحالم بيحصل ارتخاء في جميع عضلات الجسم ، في دراسة بتقول ان شلل النوم بيكون مرتبط بالنوم على الضهر و الوجه الى اعلى ، ف هنا بتقتنع ان في مخلوق يجثم على صدرك..

‏الشلل التام بيحصل في العضلات في أول لحظات الاستغراق في النوم أو الاستيقاظ منه ، بيمنع الشخص من الحركة و الكلام ، هنا الشخص بيصاب بنوع من الهلوسة البصرية أو السمعية ، ف هيشوف او هيسمع حاجات مش موجودة في الحقيقة، وده بيضاعف من الشعور بالخوف والتوتر ، شلل النوم نادر الحدوث في البعض ويصاب به الإنسان  مرة واحدة خلال حياته ، أو بيتكرر في الليلة الواحدة اكتر من مرة!... 

بعد اكتشاف مراحل النوم المختلفة ، ومعرفة جميع التغيرات اللي بتحصل في كل مرحلة ، تركزت مرحلة النوم الحالم اللي بتبدأ بعد 90 دقيقة من بداية النوم ، في الثلث الأخير من ساعات النوم قبل وقت الاستيقاظ بوقت بسيط ، بتتميز المرحلة دي بارتخاء كامل لعضلات الجسم ، ما عدا عضلة الحجاب الحاجز وعضلات العين الخارجية، في اللحظة دي بيتم فيها تسلسل الأحلام الواضحة ..
بيتم خروج الانسان من مرحلة النوم الحالم إلى مرحلة النوم الغير حالم وبعدها مرحلة الاستيقاظ والوعي باللي بيحصل حواليه ، صعب في المرحلة دي التخلص من خاصية ارتخاء العضلات الكامل اللي بتميز النوم الحالم، فده بيؤدي الى الشعور بالتوتر والرعب الشديد ، نتيجة لرؤية الأطياف المزعجة، والاحساس بالعجز والاختناق وعدم القدرة على الكلام والحركة! بتستمر نوبة شلل النوم ما بين ثوان قليلة إلى عدة دقائق وتنتهي بعودة القدرة على الحركة والكلام ، بعدها الشخص بيصحى وهو في حالة من الرعب والتوتر بتوصل للبكاء! لانه بيحس انه كان في حالة احتضار خروج الروح!.. ( شلل النوم هي مرحلة من الاحتضار لكن اضربه في 100 مرة؟! يعني الشخص اللي بيحتضر بيحس بنفس احساس الجاثوم او شلل النوم ولكن بشكل أشد! )..