جذبني فمك البني

مشهد

جذبني فمك البني

مشهد مستقبلي من القصة

في ساعات الصباح الاولى استيقظت مبكرة على صوت رنين الجرس ، نهضت من الفراش  متململة يعني اليوم اجازتي وهم ما ارتاح ، كافي الرعب اللي اكلته ذيج الايام ،  لبست الروب فوك ملابسي جنت لابسه لبس خفيف مال نوم ، طلعت للهول مشيت للمدخل الخاص بالشقة ، باوعت من العيون السحريه اللي بالباب هذا ابو عبد البواب شجابه من الصبح ، رجعت لفيت شال على راسي وفتحت الباب..

سيلين : ها عمو صباح الخير، تره مو وكت الايجار بعدنه بنص الشهر والمولد دفعته ..

ابو عبد : لا بنيتي يا ايجار يامولد ، نزلي شوفي سيارتج شمكتوب عليها..

جاوبته بخوف وتردد..

سيلين : سيارتي شبيها ؟؟

ابو عبد : مكتوب عليها علامات اكس بصبغ سبري لونه احمر ومكتوب ثار بلون اسود ...

سيلين : عمو شفتو الكامرات اكيد تبين منو...

ابو عبد : بلي اكيد شفناهن اني وابني ، شخص لابس اسود ومغطي راسه بكلو البلوز ومنزله على وجها يعني مامبين،، ورسم على السيارة بالسبري بعدين كعد على البنيد شرب جكارة وشمرها بالكاع داسها وراح..

سيلين : عمو هذا واحد مشتبه لتخلي ابالك.

ابو عبد : شلون مشتبه ياعمي وهاي شغله صعبه وانتي بنيه وحدج لا اب لا اخ يسندج وخاف ذوله ولد حرام و يأذوج..

سيلين : عمو لتخاف ماكو شي الله موجود..

ابو عبد : تنزلين تشوفيها لو ابني يغسلها..

سيلين : لا لتغسلوها اريد اصورها كلشي يصير..

راح عمو سديت الباب وركضت للغرفه اغير ملابسي ودكات كلبي تقره الف من الرعب والخوف ، كوه تمالكت نفسي كدامه وبينت ماكو شي لان اذا حس بخطر يطلعني من مكاني ، ولازم ادور من جديد على شقه واني هنا مرتاحه الجيران زينين ...

كملت لبس وطلعت عفت الباب مردود كلت هسه اصعد ما اتأخر واني باب العمارة يعني اذا دخل واحد اكيد اشوفه..

نزلت ولكيت جارنه ابو قيس وكم ولد واكفين يم السيارة وعمو ابو عبد ، باوعت السياره كلها علامات اكس ، ومكتوب ثار ، ماكو غيره هو انت اللي ابالي ..

سيلين : عمو غسلوها وادفعلك ويه الايجار..

ابوعبد : زين عمي زين..

صعدت اركض دخلت للشقه ، سديت الباب برجلي ، التوتر العايشته والرعب مينوصف، وصلت لغرفه النوم حتى اغير ملابسي بملابس بيت ، ما احس اله انشاليت وانضربت بمكان على راسي فقدني الوعي..ومنا بدت الست ايام وسبع ليالي...

______________

قريبا