جذبني فمك البني

البارت الثاني

نثرت العمر بدروبك واكول تدووم.
ماظنيت عشكك عشك ليله ويوم..

.
.
.
اكذب اذا كلت ماخفت من كلام ايفين خفت ورجف كلبي ، فكرت وفكرت وفكرت لحد ما دخت وما وصلت لحل نمت وبراسي كتلة من الهموم ثاني يوم رحت للدوام وبراسي الف حسبة ، ادهم خلاني ادور حول نفسي بدائرة مغلقة شافتني نسرين حايره راحت جابت نسكافيه قدمتلي واحد وهيه اخذت واحد ، ارتشفت منه شويه وهي هم شربت باوعتلي من فوك الكوب..

سيلين : شبيج تزرزرين بعيونج..

نسرين : ما مرتاحتلج شنو ضامه احجي ..

سيلين : ما ضامه لتخافين...

نسرين : اكلج ليش احسج كتله غموض وتمشي بالكاع اعتبريني اختج واحجيلي فتحيلي كلبج..

رفعت تك حاجب وباوعتلها ، مجاوبتها...

نسرين : شهالنظرة هاي ؟

رفعتلها ايدي وهمست..

سيلين : تشوفين هاي ايدي واصابعي ..

نسرين : اي..

سيلين : ما اثق بيهن..

نسرين: مافهمت..

سيلين : لتفهمين احسن...

عفتها حايره بزمانها وكمت اكمل شغلي اجاني مسج على رقمي باوعت رقم غريب عكدت حاجبي فتحته مكتوب..

(كافي غرور الغيمة البيضة انجلت عن حياتج واجتي السوده بدالها راح موسم الحمامات هسه موسم الغربان ، وحظج السيء هو صديقج الوحيد ، تعرفين شغله جنت اعرف سوء صحبتج بس ماجان عندي القوة افاركج نصيحتي لتخسرين ناس ازيد )

يعني جان يعرف معقولة؟؟ زين ليش ماحجه واستمر ويايه رجفت ايدي لزمتها حيل ، تمتمت بكلمات مسموعه ..

لو بس اعرف ليش ترجفين ليش دثبتي، الهي راح افقد عقلي والله ماضل شي واتخبل...

منين سمع كلامي ويه نسرين منييييين معقوله هيج قريب عليه وينه رحت ادور مثل المخبلة امشي سريع باوعت بكل مكان ماموجود كمت امشي عكس ارجع ليورة واباوع ،انضربت بواحد سمعت صوت اغراض ارتطمت بالكاع من التفت المدير ، شهكت ولعنت حضي العاثر ، باوعلي بنظرة مليانه غضب ، نزلت للكاع حتى الم الاغراض الوكعتهن حجه بصوت حاد ...

_ عوفي كلشي من ايدج واخذي راتبج وطلعي ..

سيلين : استاذ اسفه مو قصدي والله..

_ ماعندي مكان لضعاف العقول والمهملين ساعه عايفه شغلج وتحجين ويه نفسج اضافه لهذا أدائج متراجع وتأخيرج عن الدوام كل يوم نص ساعه وتقديم حجج واهيه...

عافني وراح ضليت افر بأذني لزمت كلبي اريد اسيطر على نبضاته زادت حسيته يضرب بجدار صدري بقوة ويطلب من عقلي يهدأ من روعته ...