Kuch raatein apne sath sapne laati hai toh kuch yaadein, kabhi aasu ya kabhi hasi par har raat pehli raat se alag hoti hai. Kuch Khaas aur kuch bhot jyada khaas.
Aaj Navratri ki pehli raat hai aur hospital me pooja kar ke aane ke baad mai aaj yaha apne hostel ke room se niche function dekh rahi hu. Garba chal raha hai.
Par ab wo maza nahi aata. Bhala dekh ke koi kabhi enjoy karta hai kya? Nahi na, yahi Armaan ne kaha tha mujhe humari garbe ki raat me.
Gai thi mai papa se permission leke bua ke sath. Maa ne bua ki purani lehnga choli pehnai thi aur bua ne Apni necklace aur bindiya lagai thi. Choodiya bhi Maine ache se puri si pehni thi. Use impress jo karna tha.
Har baar aaine me nazar padte hi yahi khayal aa raha tha ki kya use achi lagegi meri bindiya aur choodiya? Kya wo dekhega mujhe waise hi jaise Dilwale me Ajay Devgan dekhta hai Raveena ko ya mohhabatein me Shah ruk dekh raha tha Aishwarya ko? Kya mai bhi uski nazro me utni hi sundar dikhugi?
Aur jawab mila mujhe. Uski nazar padi mujhpe aur jaise ruk hi gai. Wo aakhe shayad jhapkana hi bhool gaya tha. Rahul se chimti li tab jake usne ek second ke liye nazar hatai thi par phir nazar padi toh usne apni cute si dimple wali smile di aur phir se dekhta raha.
Mera dil uski nazro se hi zor zor se dhadakne laga. Mere liye toh baki sab jaise ruk sa gaya tha. Bachpana tha par usme bhar bhar ke deewangee thi. Humari aakhe humari dilo ki baate sari duniya se cheek cheek ke keh rahi thi.
"Chal Riddhima, bas khadi rehne aai hai kya tu, shuru kar garba.." preeta di mujhe sath le gai apne aur ek second ke liye mai ghabra gai.
Armaan ke samne kaise dance karti mai? Dil zor se waise hi dhadak raha tha aur agar kuch gadbad hoti toh kya sochta wo? Aise itne sare khayal mere man me chal rahe the aur wo, wo toh bas har jagah se dekh raha tha mujhe.
Jaise hi gaana bajna shuru hua, usne aur Rahul ne garba Khelna shuru kiya aur do minute ke andar wo mere side me tha jaha mai statue ban ke khadi thi.
"Bhala dekh ke koi kabhi enjoy karta hai kya? Nahi na" usne mere haath me dandiya di aur mujhe uske steps follow karne ko kaha.
Ek moment ne sab kuch badal gaya. Mai ek second pehle statue ban ke khadi thi aur dusre ki second mai uske sath garba Khel rahi thi.
Naa usne kisi aur ko dekha aur na Maine. Pata hi nahi chala ki kab hum dono apni duniya me itne magan ho gaye ki humne bakiyo ko break lete dekha hi nahi. Preeta di, Rahul, Raaj bhaiya sab paani pee rahe the aur hum dono, kya kahu,taad rahe the? Haa yahi sahi word hai.
"Armaan." Abhi ne aake jaise humara chota sa bubble break kar diya ho.
Armaan ne use apni kohni Mari aur ghusse se dekhne laga,"kya hai?"
"Preeta di bula rahi hai tum dono ko. Chalo.."
Bina kuch kahe ya puche hi usne meri dandiya pakdi aur le chala wo mujhe apne sath. Mai toh maano sudh budh hi kho baithi thi. Sari duniya meri nazro ke samne se gayab hoti lagi aur bas hum dono ho reh gaye.
"Tum dono thake nahi kya?" Rahul ne phir se humara bubble break kar diya.
Hum dono ne ek dusre ko dekha aur apne sir naa me hila diye kyuki ek bhi pal ke liye thake nahi the hum ek dusre ko dekhte hue.
"Aaj aap bhot sundar dikh rahi hai." Usne koshish ki thi ki koi aur naa sune. Par abhi aur Rahul toh hum dono ki hi baate sunne aaye ho jaise.
"Kya Riddhima roj sundar nahi lagti?" Abhi ne Armaan ko chedte hue pucha aur Rahul hasne laga.
"Haa bata Armaan, bata."
"Mera matlab tha ki roj se aur kahi jyada sundar." Armaan ne dono ko ghoor ke dekha aur phir se meri taraf dekha,"inn dono ki baat mat suniye aap. Mujhe pareshan karna acha lagta hai inhe."
"Tum dono ye aap aap se nikloge kabhi?" Rahul ne ghoor ke pucha aur Armaan ko zor se peeth pe mara.
Lagi nahi thi use pata tha mujhe par meri toh jaan hi nikal gai thi. Use takleef ho ye bardasht nahi tha mujhe. Aisa man toh kiya tha ki Rahul ko zor se ek chaped jad du par wo Armaan ka dost tha isliye kuch nahi kaha. Haa par ghoor ke dekh jarur rahi thi mai use.
"Riddhima.." preeta di aai,"teri bua dhund rahi hai tujhe. Jaa jaldi."
Maine Armaan ki aur dekh aur uska pura chehra utar gaya tha. Wo jaane nai dena chahta tha mujhe aur naa mai jana chahti thi.
Par waqt humare haath me nahi tha aur mujhe majboor hoke bua ke sath jana pada.
Par waqt aaj bhi kaha hai humare haath me. Us raat bhi humari baatein aur mulaqatein adhuri thi aur aaj bhi adhuri hai.
Uske baad jab tak hum sath the humne hat saal ek sath garba khela lekin jab se alag hue hai, maine garbe ko apne se dur kar diya waise hi jaise Armaan mujhse dur ho gaya.
Ab mujhe ye toh nahi pata hi kya wo din kabhi aaega jab Armaan mere paas hoga par mai itna jarur janti hu ki agar wo nahi hai toh uske sath bitaye kisi lamhe ko mai akele nahi jee sakti.
Kuch pal, kuch chize Armaan ki thi, hai aur hamesha rahegi.
Jaise tum aur mai..
Hai na Chanda?
आप पढ़ रहे हैं
ADHURI MOHHABAT- A TALE TO TELL TO MOON
Fanfictiontalking to the moon try to get to you in Hope's you're on the other side talking to me too or am I a fool who sits alone talking to the moon?
