البنات اللي رايحة الجامعة نخلي بالنا من شوية الحاجات دول:
-الصُحبة:
متصاحبيش أي حد وخلاص المفروض بتقعدي فترة طويلة بتتعاملي بسطحية شوية ؛علشان لقدر الله لو حاجة حصلت من حد من اللي عرفتيهم متتصدميش فيهم وترجعي تندمي إنك قربتي من الأول؛ لإن مش أي حد تديه أسرارك وتتعاملي بعفوية معاه،كمان البنات اللي هتسكن عافري لحد ما تلاقي سكن فيه بنات يعرفوا ربنا لإن والله العظيم والله صُحبتك يا إما هتعلي معاهم وتتغيري للأحسن!
يا إما هتفضلي تتنازلي معاهم عن حاجات في دينك لحد ماتفقدي نفسك وترجعي تندمي!
واتحكالي بلاوي لناس حصل كدا معاهم،من الحاجات دي بنات بسبب أصحابهم اتعرفوا على شباب وكلموهم!
خلوا بالكم كويس الله يرضى عنكم..
-جروب الدفعة:
تابعي من بعيد لبعيد لا لايك ولا كومنت، سيبك من اللي بيحصل والإختلاط دا كله وحافظي على نفسك..
وكذلك الإختلاط في الواقع خلي بالك وبلاش جو هاخد محاضرات من فلان ،البنات كتير دوري هتلاقي، صحيح في بنات خبيثة شوية بس لو أخدتي بالأسباب وحاولتي وسألتي كتير ربنا هييسرلك صدقيني.
بعدين احضري ودوني بنفسك دا هيفيدك ويساعدك أكتر.
-الإختلاط:
ابعدي عنه لإنه مُحرم شرًعا إلا في حالة الضرورة القسوة ووقتها بتتعاملي بحدود بردو ،زي ماقولنا سواء هنا أو في الواقع نفسه..
مفيش حاجة اسمها زمايلي الولاد أحسن من البنات!
لا.. لو دورتي هتلاقي وجربي بس المهم نبعد عن الشباب نهائي..
بلاش ضحك وهزار مع دكاترة بحجة إنه دكتور!
في الأول وفي الآخر هو مش محرمك أساسًا!
بلاش تضيفي دكاترة رجالة هنا.
بلاش تضيفي دكاترة رجالة هنا.
بلاش تضيفي دكاترة رجالة هنا.
كررتها ٣ مرات بلاش ،دا غريب عنك حتى لو مش بتكلميه بلاش بلاش بلاش!
بيحصل بلاوي وأكيد عارفين دا يعني ..واتحكالي حاجات تخص الحوار دا بردو مش بقول حاجة من عندي يعني:"
-غض البصر:
صاحبتك اللي تقعد تقولك الشاب الفلاني دا معرفش ايه وعينه لونها ايه قوليلها احترمي نفسك في بنت مُسلمة تقول كدا!
غضي بصرك زي ما نفسك هما يغضوا بصرهم عنك.
امشي شوفي الطريق بس قدامك وسيبك من أي حاجة تانية..
والله في بنات من كتر مابيغضوا بصرهم اللهم بارك لو سألتي واحدة منهم هل شوفتي البنت الفلانية عاملة ايه في نفسها؟
هتقولك مشفتش حاجة أنا مركزة في طريقي بس!
ليه منبقاش كلنا كدا!
بردو غضي بصرك عن أخواتك البنات اللي لبسهم مش شرعي عشان عينك متاخدش ع الأمر دا ويبقى معتاد عليكي ومع الوقت تحسيه عادي"))!
وطول ما أنتِ ماشية وعينك جات ع أي بنت كدا غصب عنك ادعيلها بالهداية متستحقريش حد لمجرد إنك مختمرة أو منتقبة..
-لبسك:
اللي عاوزة تختمر تاخد الخطوة واللي عاوزة تنتقب تاخد الخطوة ،أفضل خطوتين ليكي وعلشان تحافظي على نفسك شوية من الفتن اللي موجودة دي..
لبسك يكون فضفاض خمارك طويل وساترك ،سيبك من الموضة خالص.
بلاش ميك اب ولو خفيف مفيش حاجة اسمها ميك اب خفيف أساسًا كلها حجج فارغة،كل أسبوع اعملي ماسك لنفسك واهتمي ببشرتك هتبقي منورة بفضل الله ومتنسيش تاخدي نوايا هنا وتحتسبي الأجر.
برفانات بلاش في بدايل كتير ومش هيكون في أي حاجة بفضل الله:"
-المذاكرة:
لو أنتِ في كلية نظرية هتحتاجي تنمي شوية موضوع الحفظ عندك لإن هيبقى عندك نظري وشفوي وهتحفظي بزيادة حبتين،لو عملية كدا هتمتحني نظري وشفوي وعملي فـ نظمي حالك علشان تقدري تجمعي درجات كويسة في التلاتة وفرصتك هنا كويسة عن الكليات النظرية"))!
ابعدي عن أي حد محبط ومتصدقيش اللي يقولك الكلية الفلانية صعبة!
اللي بيحاول ويجتهد وينوي إنها لله عزوجل هيوصل..
أي حد محبط خدي جنب منه مهما كان مين،لقيتي صُحبة كويسة خير وبركة ،ملقتيش عادي بردو المهم مع الوقت هتتعودي وهتعرفي ناس جديدة بس زي ما قولنا مش أي حد نتعامل معاه بعفوية من البداية!
-القرءان:
يابنات لو بتحفظوا قرءان بالله متوقفوش لإن الدراسة مش عائق،بالعكس هيكون معاكِ وقت كبير أنا عن نفسي بحس الإنجاز أيام الدراسة بيكون أكتر من الأجازة!
كملي حفظك حتى لو نص صفحة في اليوم،حتى لو خمس آيات ياستي!
واللي ناوي يبدأ وكان مأجل يبدأ ويتكل على الله دي فرصة مش هتتعوض،ثم إننا مش ضامنين عمرنا..
واللي هيساعد هنا الصُحبة عشان كدا قولتلكم ابعدوا عن أي حد محبط من البداية واتشعلقوا في أي حد بينصحكم للأحسن وبيحب ليكم الخير.
-المواصلات:
لو أنتِ واحدة بتسافري يوميًا خلي وردك وأذكارك في الطريق ،هو الأفضل بعد الفجر بس بتكلم عن الناس اللي بتطلع بدري جدًا من البيت.
الصبح يبقى الورد والأذكار والمسبحة معاكِ أو على إيدك واشتغلي سبحي استغفري أذكري ربنا المهم متقعديش فاضية!
وأنتِ مروحة قولي أذكار المساء،ولو عندك كتب pdf استغلي الوقت واقرأي فيهم،ولو في محاضرة عاوزة تسمعيها ك شحن ليكي البسي الهاند فري واسمعي،أو اسمعي قرءان..
المهم متضيعيش الوقت دا استغليه كويس.
-الصلاة،ودي أهم حاجة!
متأخريش صلاتك مهما حصل ،الأماكن كتيرة جدًا صلي فيها ،وادي الناس اللي مكانتش تعرف إن الصلاة تجوز برا في أي مكان
_________
" الذين هم عن صلاتهم ساهون" 💔💔💔
__________
#منقوله 👇
في مرة في المترو واحد قابلني ملهوف بشكل غريب ومخضوض بيخبط على كتفي ولقيته بيقولى " بعد اذنك العشا اذنت ؟" مجاش في دماغي الصلاة وانه واخدها ميعاد زي معظم الناس بس الراجل طلع مكنش لسة صلى المغرب اول ما نزلنا لقيته بيجري وكان هيقع عشان يلحق يصلي المغرب في مسجد بعد المترو على طول في بصراحة حسيت بافورة كدة شوية ,,,في نفس اليوم انا كنت جمعت صلاة على صلاة بكل بساطة لانى كنت بلف في المواصلات وعادى ولا كانى عملت حاجة بس الموضوع اثر فيا بشكل تاني افتكرت الآية وهي بتقول فويل للمصلين اللذين هم عن صلاتهم ساهون وبدات ادرك ان فكرة جمع صلاة على صلاة في حياة الواحد بتتبرر بطريقة مستفزة وكانها مش ذنب عظيم . وان الاية بتقول بشكل صريح فويل! فبتالى الراجل من حقه يكون مخضوض على جمع صلاة بالمنظر ده .فين الاوفر في الموضوع !
#مقتبس
أنت تقرأ
🌸 السابقات الى الجنة 🌸..(الجزء 2)
De Todoومَا رضيـتُ من الأثْـوابِ عَاريَّها ، ولستُ ألبسُ شيـئاً يُلفـت النظَرَ إنّ العَفيْـفةَ لا تُبـدي مَفـاتنَـها ذاتَ الحيَاءِ تغضُّ الطرفَ والبصَرَ ❤️🤍🖤 ان ارتدائي لـ النقاب سيظل اعظم انتصاراتي😍💜 وقـل للنقاب أنـني أحـبـه وانـه لـقـلبي أعلي مـ...
