نوفيلا{جنون الحب} للكاتبه:حبيبه محمد.{مكتمله}.

الفصل الخامس 🖤

نوفيلا .
جنون الحب.
(محمد،حبيبه) .
الحلقه الخامسه.
**************************************
الذكريات اللي بتضرب البال فجأه كده فتخليك تضحك من غير ما تحس ،الذكريات اللي تكون ليك من اقرب الناس على قلبك هيا في حد ذاتها كنز عظيم لازم تقدره .

مركز وصابب كل تركيزه فوق الاب توب اللي فوق رجله ابتسم وهو بيقلب في صور حبيبه القديمه ضحك وهو بيفتكر لما كانت اول ما تصحى من النوم تصور نفسها وهيا منعكشه وتقوله "يا صباح الرعب " ضحك بينه وبين نفسه وهو بيعمل زوم فوق وش حبيبه ووشها اللي ظاهر عليه آثار التعب .

بص لتاريخ الصوره وافتكر أن دي الصوره أيام امتحانات الثانويه العامه بتاعتها وقد اي نفسيتها الفتره دي كانت تحت الصفر هز رأسه وهو بيفتكر كل يوم لما كانت بتيجي تعيط ليه وتقوله أنها قد اي خايفه وهو كان يطمنها بجمله واحده" واللهي لو هتعيدي السنه يحبيبه كده كده محدش هياخدك غيري في الأخر وانا موافق معنديش اي مانع".

نقل من صوره لتانيه والمره دي كانت صوره ليهم في خطوبتهم يااااه،لسه فاكر لحد دلوقت كل تفصيله كانت في خطوبتهم ،تكشيره بسيطه ظهرت فوق معالمه وده لما افتكر لما باباها رفضه في الاول وقاله معنديش بنات للجواز لكن هو كان رده "لا عندك حبيبه جوا اهو ادخل اناديها".

ضحك وهو بيفتكر ملامح والد حبيبه اللي اتشنجت بعد ما قاله كده ووالدتها اللي انفجرت في الضحك وهيا بتقول "كنا عاوزين واحد يعقل بنتنا قامت هيا مجنناه معاها ".

ولتاني مره يعمل زوم فوق ملامح حبيبه اللي كانت أجمل ما تكون السعاده الي كانت مجملاها اكتر من الميكب فستانها اللي اختارت أنه يكون زي فستان سندريلا بنفس لونه واختارت أنه يعمل معاها متشينج اليوم ده وصممت أنه يلبس قميص نفس لون فستانها .

بص للجو اللي كان بسيط والمكان اللي كان ابسط هو كان لسه يدوب على قده وهيا كانت عارفه كده وحاسه بيه وحاسه بتوتره وحاسه أنه خايف يطلع صغير في عينيها واتفاجئ اليوم ده لما لقاها بتقوله" تيجي نعمل الخطوبه في بيتك مامتك هتفرح اوي على فكره" .

كبرت في عينيه لدرجه انه كان عاوز في اللحظه دي يخبيها عن عيون العالم كله يفتكر يومها قالها اي "اوعدك هعملك فرح تحلفي بيه طول حياتك" وكان ردها ساعتها "انا فرحي أن أكون معاك يمحمد غير كده ميهمنيش".

مين اللي قال إنها مجنونه!؟.
حبيبه اعقل بنت قابلها في حياته ،هيا عباره عن كوكتيل صعب انك تفهمه مليون شخصيه في واحده بس وكل شخصيه من دول بتظهر في الوقت المحدد اللي هو بيكون عاوزه .

قلب وهنا جات صوره تانيه وهو حاضن فيها حبيبه بسمه غريبه اتسللت واترسمت فوق ثغره وهو بيعمل زوم على حبيبه اللي كانت بتعيط ولما سألها بتعيطي لي قالتله"تخيل تفضل طول سنين عمرك تجري في سبق عشان تفوز بجايزه وكل ما تتعب وتحاول تستسلم تلاقي شبح الجايزه بيقولك أنا هنا اهو ومحدش هياخدني غيرك ،اهو انا جريت في سبق طويل عشان افوز بيك وفوزت ومن حقي أن اعبر عن فوزي ده بأي طريقه تعجبني".