هذيانٌ بين جمرٍ وجليد ..(ارملة اخي المجنونة)

45//

السلام عليكم
رواية هذيان بين جمر وجليد ..
الفصل اربعة واربعين
نورا ناصر

مَتعوبَينْ
گأدَتنهَ آلسَوألف وَآلصَور و الليل للمچفينَ ..
تَعبَنهّ مٓن ألَسفر وألشوگ ضَليَنه بتوآلي ألعَمُر مَشمُورَينْ ...

موج ..

الشيخ دياخذ فرح من إيدها ويوديها للسيارة وهيه كل ملامحها مبينه موجوعة من قبضته ..

اجه شرار لزمني من زندي وعصره حيل
وكال يله انتي امشي همين ..

احمد ضربه على صدره وكاله وخررر ايدك عنها ..
شرار بيده اللخ ديضرب احمد والشيخ صاح عليه ..

دااسحب ايدي منه واباوعله بعصبية
_ لا اني ولا اختي نروح وياكم اختي طلكتوها واني مجرد تمثيلية خطوبتنا بعد شنوو ما إلكم شي يمنا .

اجاني صوت الشيخ بحدة : وين دليلج على انو انه طلكتها جيبي يله ؟

باوعتله ونصيت : انته يا شيخ كتلها بعظمة لسانك راح اطلكج

رد : وليش تضخمين الامور وتسويني مطلكها!!!

رفعت راسي باوعتله : الي ديصير بينا بسببكم ظلم ظلم ..

كال بصوت عالي : والي سويتوا انتوووا هذااا عااار عااار علينا وعليكم ..

رد احمد : شيخ انت ليش مادتفهم ترا احنه تهددنا وانتوا ولا واحد كدر يحمينا .. انتوا اصلا مموجودين ..

كال اله : احمد الي هسه جاي اشوفه كبال عيني شنو ؟ هروب منه احنه لوو هرووب من الي مهددينك ؟ زين هاي المدة كلها ليش ماحاولتوا تتواصلون ويانه ليش؟؟
ماجنه الك سيف ودركة وكت العوز ماجنه عزوتك احنه ؟ تاخذهم وتشرد بيهم من ورانه وين الاصول؟

كتله واني مدنكة شيخ انته تعرف خطوبتنه جانت تمثيلية للستر ومثل ما تدخلت وخلصتني من اوس هسه اني اريدك تخلي اخوك يطلكني واني ماروح وياكم .....

كال ليش ماتروحين بوويه انتي على ذمته لوو مو على ذمته ؟؟

رد عليه احمد بصياح : ماتروووح شيخ ماتروح ولا وحدة من خواتي يرحن خواتي يبقن وياي .. كافي ظلم انتوااا شنووو خلوا الله بين عيوونكم

ظل احمد يصيح والشيخ سحب فرح من ايدها واني شرار سحبني ووتوجهوا بينا للسيارة واحمد هرج الدنيا بالصياح ..

بقى صياح احمد بأذني وفرح كدام عيني تنسحل وخايفة عليها الظلام يأذونها خااايفة ...

أنين ..

جنت واكفة يم باب السيارة وميتة خوف ولازمة بيدي دانيال منعس ويباوع وبس يون يريد يبجي ...

رجليه ترجف وتضرب ببعضها ، وكلبي دكاته الف وانفاسي لاهثة ، والوم بنفسي كله مني اني هيج سوويت كله مني دموعي مابطلت خوف وندم .