إعتبروها إسكريبت

(١)

- حبيبي
- ايوه
- حبيبي
- ايوه ..
- حبيبي
بصلها : احنا هنلعب ماقولتلك ايوه
- ايوه كده رد عليا وانت باصصلي مش باصص للموبيل
- ياسلام وتفرق يعني ؟
- جدا .. لما اكلمك وانت جنبي وتبصلي ع طول دا يدل ع اهتمامك والeyes contact اللي هيحصل يتوفر علينا مجهود كبير من التعبير عن المشاعر ..
- ودا قريتيها فين ولا حد قالك ؟
- بوست عميق كده ع الفيسبوك عجبني هو انا مفهمتش كويس بس حساه فيه عمق ، فقولت اقولك تفهمه ويبقي كفايه واحد فيا فاهم..
- ماشاء الله عليكي يا حبيببتي ..
- مثقفه ولا مش مثقفه ها ..
- ام المثقافات والله ...
سكتوا ..
- حبيبي
بصلها : ايوه .. شوفتي بصيتلك ازاى علشان انا مهتم وعلشان ال eyes contact يتوفر علينا مجهود كبير من التعبير عن المشاعر ..
- حبيبي شاطر.. مش قولتلك انت هتلقطها وتفهم ودا كفايه ..
- طيب ايه فى حاجه ولا كنتي بتختبريني ؟
- كنت عاوزه اسألك سؤال وتجاوبني بصراحة
- ربنا يستر .. لاقيتي فى الموبيل حاجه لا الموبيل معاكي الباسورد ولا لاقيتي شعره ع القميص انا اساسا اقرع ولا لاقيتي واحده عملتلي رإيكت ع بوست ع الفيس عندي وغلاوتك معرفهاش ولا هعرفها وقوليلي مين واعملها بلوك حالا ...
- ايه الاعترافات دى كلها انت بتوفر عليا مجهود السؤال ماشاء الله .. إجاباتك واضحه وموجوده لبلوكاتها كمان ..
- ال eyes contact يا حبيببتي ..
- شوفت بقي السحر فيه بيقرر من غير اى مجهود .. بس مش سؤالي مش من دول بعيد ان انا هراجع موابيلك وهبص تاني ع قمصانك وبوستاتك وأى حد غير امك واخواتك وانا عمالك رإيكت لاف هياخد احلي بلوك فى الحياه حتي لو صحابك الرجاله ..
- يعني انا فكرتك ماشاء الله عليا .. المهم سؤالك ؟
- عارف احنا بقالنا اد ايه متجوزين ؟
- ايه دا عيد جوازنا انهارده ..؟
- لا ..
- يبقي بكره انا ..
- استني ولا بكره .. ايه دا معقول مش فاكره ؟
- هو احنا فى شهر ايه ولا انهارده يوم ايه ؟
- هتعملي فيها فاقد الذاكره وناقص تقولي وديني عند امي ..
- انتي مين ..عاوزه مني ايه ؟
- لا والله ..
- طبعا يا حبيببتي فاكر هو احنا يوم الاربع صح ؟
- ايوه ..
- واحنا واتجوزنا يوم الاتنين صح ؟
- ايوه بس انا بسالك امتي مش يوم ايه ؟
- لو اقولك انا فاكر يوم جوازنا علشان الحلاق كان أجازه وفتح مخصوص علشاني ودى ذكري معلقه معايا جدااا
- اكتر من جوازنا ..
- لا طبعا.. جوازنا دا حدث تاريخي .. حدث كان متوقف عليه علاقه بين عمارتين ..حدث لابد منه يحدث فى حياه بني ادم ..
- مالك بتقول كده وانت ندمان .. هل انت ندمان ؟
- لا طبعا يا حبيبتي .. وبعدين هيفيد ب ايه الندم بعد السنين دى كلها والعيليين إللى نايمين جوه دول ..
- عادي لو ندمان طلقني..
- لا اتجوز عليكي احسن احنا فى عيلتنا مبنطلقش ..
- انا عاوز تتجوز عليا يا ليليتك السوده .. لا طلقني
- ايه دا .. لا انتى قومي اغسليلك طبقين ، اقلبي اوضتك ، ارغي مع مامتك ولا اختك لان واضح ان الفراغ واصل معاكي لغايه المأذون ..
- يعني ايه..؟
- يعني انتى عاوزه ايه دلواقتي .. اتجوزنا من امتي من ٥ سنين .. خلاص
- لا ٦ .. شوفت انت مش مركز ازاى ..
- مش مهم السنين يا حبيببتي المهم اننا مع بعض ولا ايه
- ايوه ايوه اضحك عليا بكلمتين ..
- مش سالتي سؤالك وانا جاوبت خلاص بقي ..
- لا ما دا مكنش سؤالي اصلا ..
- بتتكلمي جد ..؟!
- ايوه ..دا كان سؤال تمهيدي ..
- انتى عارفه مشكلتكم ايه يا بنات حواء؟
- ايه ؟
- أنكم لما بتسالوا سؤال عمره ما يكون مباشر ، لازم تلفوا وتحوروا ومن الشرق والغرب للشمال للجنوب لغايه ما إللى قدامكم بيفرر منكم ..ليه بجد ؟
- لاننا لو سألنا سؤال مباشر الاجابه مش هتكون صريحه لكن لما نفرر إللى قدامنا ونسأل السؤال فى الاخر وهو مفرفر اجابته هتكون صريحه لانه تعب ومش قادر وعاوز يخلص ومفيهوش حيل للمهاتيه والكلام ..
- يا بنات الايه .. خطه فى منتهي الفرهده .. طيب ايه السؤال بسرعه وربنا يستر ..
- اتجوزتني ليه ..؟! ومتقولش علشان بتحبني اديني أسباب أخري انك تاخد قرار انك تتجوزني انا بالذات ..!
- ايه السؤال اللي جاي متاخر ٥ سنين دا ؟
- ٦ سنين ..
- مش مهم .. بس مفاجئ يعني فى حاجه ولا ايه ؟
- شوفت بقي انك انت إللى بتاخدني لاسئله جانبيه بعيده عن السؤال الأصلي ونشرق ونغرب وتفرفر مني وانت السبب اهو مش انا ..
- خلاص خلاص ..
- قولي بقي اتجوزتني ليه رغم أن فيا عيوب كتير ، وليه اتجوزت اساسا رغم انت مكنش فى دماغك تتجوز .. ؟!
- امممم انا هبدء الاجابه من الاخر للاول تمام ..
- تمام المايك معاك ..
- انا فعلا مكنش فى دماغك الجواز ودا لاسباب كتير واهمهم انا مكنتش مستقر ..
- ازاي يعني شقتك كانت موجوده وخلصت جامعتك واشتغلت ع طول وبعد سنتين جيبت عربيه ..
- ايه كل انتي كنتي مرقباني ولا ايه ؟
- مش كده .. بصراحه ايوه .. مش موضوعنا كمل ..
- يا لئيمه .. ماشي .. الإستقرار النفسي إللى اقصده ، احس ان انا سوي نفسيا اقدر اعيش مع انسانه سويه نفسيا نقدر نعمل اسره سوية نفسيا، مكنش هينفع اعيش وانا تايهه واتوه إللى معايا وتبقي الدنيا خراب ..
- بس الجواز استقرار .. يعني لما اتجوزت استقريت صح ؟
- لا .. انا لما حسيت اني مستقر نفسيا ومتصالح مع نفسي وفاهم يعني ايه جواز ومسئوليه وألقيت انسانه زى اتجوزت .. الجواز مش مصحه نفسيه علشان تعالج .. اتجوز علشان تستقر ازاى استقر وانا تايهه واللى معايا تايهه وفعلا المشاكل والطلاق إللى بيحصل علشان طرف او الطرفين مش فاهمين بعض او تعبوا او اتفاجئوا او حسوا انهم غير صالحين لفكره الجواز.. فين بقي الاستقرار إللى حصلهم محصلش لأنهم كانوا غير مستقرين قبل الجواز ، ، الجواز مشروع لو اساسه صح والطرفين اصحاء ومستقرين المشروع بيثبت وبيعيش وبيكبر ، لو طرف غير سوي وتايهه يا الطرف التاني بيستحمل ويسكت يا مشروع فاشل ..
- بس مين قالك ان انا زيك .. مستقره نفسيا وكده ..انت اساسا مكنتش بتبصلي .
- علشان كنت عارف انك بتبصيلي
- لا بجد .. كنت قافشني لدرجه دى ..
- ماهو بصراحه كل ما انزل السوبر ماركت الاقيكي ع طول عند الكاشير وفى ايدك كيس شيبسي بالخل ولا مره غيرتيه ..انا افتكرت ان الماركت دا بتاعكم فى الاول ..
- ماهو انا كنت بعرف ميعاد رجوعك من الشغل امتي وكنت بظبطها لعل وعسي تلمحني لكن كنت رخم .. بتاخد حاجتك وتمشي ع طول ..
- لا ميصحش كنت اخد رقم تليفونك بالمره ..
- صدقني كنت مجهزاه فى جيبي فى ورقه ..
- لا والله ..
- فاكره اول مره اتكلمنا؟
- ايوه كان فى خطوبه ابن خالي وكنت هبه بصينيه الجاتوه وانت لحقتني ووقعتني وكده ..
- لا يا حبيببتي اول مره اتكلمنا انا وانتى وبس .. الشات ؟
- شات ايه ..؟
- الفيسبوك.. الاميره الحائره ..
- ياااااه .. ايه دا انت كنت عارف انه انا ؟
- الاميره الحائره بس ومرمر والحب المستحيل و لاف يو يا انا ..
- الله .. الله ..انت كنت عارف بقي واسكت ؟
- اومال ايه ..؟
- وانا إللى كنت فاكره ان انا بختبرك وطلعت بتاع بنات ولما اتجوزتك حسيت اخدت الجائزه الكبري وفزت بك لوحدي ..
- بتختبريني ..؟
- ايوه ..
- اهو وسط اختباراتك ليا انا عرفت عنك حاجات حسيت ان انتى الوحيده من إللى حواليا مناسبه ليا ، لاقيتك متصالحه مع نفسك وفاهمه يعني ايه علاقه ويعني ايه طرف تاني فى حياتك ، الكلام الحلو والهدايا عمرهم ماكانوا اساس الحب لكن الأفعال وإثبات إللى قدامي انه يقدر يثق فيا .. لاقيت معاكي حاجات غطت ع عيوبك .. عيوبك موجوده واتمني تزول بصراحه  لكن مفيش إنسان كامل وزى ما اتقبلتيني بعيوبي انا اتقبلتلك بعيوبك لاننا احنا الاتنين فاهمين يعني ايه جواز يعني ايه استقرار لاننا مستقريين قبل ما نستقر بالجواز ..
وصلت الاجابه ؟
- يعني مقولتليش بحبك .. ؟!
-ماانا بحبك فعلا .. وهو انا لو مش بحبك هستحمل اقعد معاكي دلواقتي واسمع اسألتك إللى جايالي بيها من الاشئ ..
- تحب نتخانق ايه رايك ؟
- لا مش فايق .. فرهدتيني باأسالتك دى ؛ ممكن بكره هيكون صابح الجمعه نسهر ونتخانق للصبح مش هيكون ورايا شغل ..
- طيب  .. اسألك سؤال تاني ؟
-  بقولك تتعشي ، ايه رايك اقوم اعمل سندوتشات سجق وكبده مشطشه ونشغل فيلم وبعدها ننام لاني ورايا شغل الصبح ..
- بجد .. انا موافقه جدا .. وانا هاجي معاك اساعدك فى المطبخ ..
- لا انتى تقعدي هنا برنسيسه انتى ناسيه انتي الاميره الحائره .. تختاري فيلم بقي نتفرج عليه عقبال ما اخلص تمام ..
- اوكيه ..
- عاوزه تيجي ورايا تاكلي دماغي أسئله وجوديه وتقولي ليه الكبده اسمها كبده مسمهاش سجق..
- بتقول حاجه ؟
- عاوزه بيبسي ولا سفن مع السندويشات
- بيبسي ..
- من عنيا
- لا من التلاجه هاهاهاهاها

اعتبره إسكريبت وقولوا رأيكم بصراحه 🤍