كرونيك:💕ما_ذنبي_ حبيبي💕

الحلقة 16

الحلقة 16 

نورمالمون يرجع يخدم نهار الاثنين اما ما عندوش حل اخر يلزم يغيب و يبعث شهادة طبية الجمعتين هذوما... يعرف روحو دوب يرجع بش ياكل السطاكة من عند العرف حتى يشبع اما ما عندوش حل اخر... ما ينجمش يخليها وحدها و ما ينجمش زادة يهزها للبلاد يعرف أمو مستحيل تليّن قلبها و تسخف عليها... بعد ما فطرو رجعها لبيت النوم و تلهى يلم في البلار و ينظم في الدنيا و وحل في التسييق زادة... السروال مصفون و المريول رابطو على جنب و هو يصول و يجول حفيان كل مرة يضرب ضربة في بلاصة... اللي ما عملوش عمرو الكل عملو اليوم حرة الحراير ما تجي شي قدام برهوم و حذاقة برهوم... اخر حاجة عملها علق المنڨالة فوق باب الصالة و عدّلها و تفاجأ كي لقاها السبعة و ربع النهار تعدى جري ما حسش بيه جملة... أكهو وقيّت عشاء تو و هو شاهي صحفة لبلابي تشوي بالحرورة و عليها كعيبات زيتون و معاها صحيّن طرشي يعمل ستة و ستين كيف... مشى لأميرة بش يسألها تحب كيفو و الا شاهية حاجة أخرى... 

-اميرة نجيبلك... 

سكت لسانو تعقد كيف راها في الحالة هاذي ساندة ظهرها للحيط مربعة ساقيها و تبكي من غير صوت كل عين تسقي في أختها و تليفونها مطيش على القاعة قدامها... مشالها يجري طلعها قعّدها على الفرش و هبط على ساقيه قدامها: 

-اش ثمة علاش تبكي تو؟ 

-تليفوني كان ينوقز و ما نجمتش حتى نهز على خويا... وليت عاجزة حتى على ابسط الحوايج...

مسحلها دموعها و جبدها لحضنو عنقها بالسياسة بش ما يبطلهاش على يدها... هاذي ثاني مرة يعنقها بالطريقة هاذي تعنيقة حنينة دافية هكا و كيف العادة حسها تتململ تحب تجبد روحها منو... زاد كبس عليها اكثر...

 حضنو صغير عرضو بعرض أكتافو اما حستو واسع كأنو بلاد كبيرة ضاعت فيها و ما عرفتش أولها من آخرها و لا حتى كيفاش تخرج منها... حضنو اليوم ما طمنهاش بالعكس زاد شغشبها و حيّرلها في راسها برشا أسئلة... كيفاش الواحد يرتاح بين يدين العدو؟ كيفاش يلقى الأمان عند انسان من المفروض انو هو الخطر بعينو؟ بعد حضن امها و بوها الله يرحمهم ما ذاقت كان حضن رضا اللي كل ما يدور عليها يديه كأنو يخنق فيها و يلف على رقبتها في حبل المشنقة... و تو ابراهيم... ابراهيم وحدو حكاية طويلة... المتناقضات الكل تلمو في راجل واحد مغشاش لأبعد الحدود و في نفس الوقت حنين لأبعد الحدود زادة... غامض برشا و غموضو يرعبها حتى و لو ما تظهرلوش... يخليها ترعش كيف البنية الصغيرة على هذاكا ماذا بيها ما يقربهاش جملة و يحترم حدود العلاقة اللي بموجبها خذاو بعضهم... 

-ما اتعبش روحك اميرة ما عندك وين هاربة المرة هاذي مش بش نسيبك ما تعمليش فيلم كيف المرة اللي فاتت و تقلي نحب حربوشة... بلاصتك هنا حتى تهدى و تسكت من بكاك...