الحلقة 17
تعداو نهارين على الحالة هذيكا يفيقو الصباح يفطرو يهزها للسونتر تعمل ماساج و يروحو يشريو في يديهم الفطور و العشاء فرد المرة و يشدو الدار... عامل معاها الواجب و اللازم قايم بيها بالڨدا و مش مخليها تستحق شي...
اليوم قامو بكري برشا على حس الحوّات يدور في الحومة خرج جاب من عندو كعبات نظفهم و شواهم فطروهم و بعد نص النهار هزهم النوم الزوز هو في الصالة و هي في بيت النوم... مسكين رجع عليه التعب غطس فاق على صوتها هي تقيّم فيه:
-ابراهيم ياخي دخلت في غيبوبة؟! فيق عندي سوايع نستنى فيك
-علاش قداش الوقت ؟
-الخمسة و نص
-بجاه ربي؟! ماعادش وقت جملة... راك جعت انت؟
-اي والله ع الاخر
-علاش ما قيمتنيش من قبيلة
-خليتك ترتاح باين تاعب و شخيرك عامل مسدّ... المهم قوم طيبلنا ماعادش فيا بالجوع
-اش نطيب بربي تو نخرج نشري كالعادة
-لا بربي يزينا... معدتي تهرات من ماكلة الشوارع مانيش مستانسة بيها والله تقلقت ع الاخر طيبلنا انت امان
-باهي يا للا اش شاهية؟!
-روز ازعر بش نموت عليه اصل
-اللطف ما تموتش برك تو نحضرو و تاكل صوابعك وراه
-كونش ناكل صوابعك انت انا صوابعي لتو مربّطين كيف ما ترى... هيا قوم برك تو نجي نقلك كيفاش يحضر
-لا اقعد ارتاح و خليني نوريك ابداعاتي مانيش شقنوص راهو نعرف العلة و بنت العلة و الغولة وين مخبية ولادها
-باهي يا حاذق تو نستنى و نحكم وحدي..
حللها التلفزة توسع بيها بالها و تعدى غسل وجهو و برد اطرافو و شد الكوجينة عمل طلة على ڨوڨل و بدا يمرمط و دوب حضر عبى صحن و زوز كيسان ڨازوز و نادالها بش يوكلها...
-هيا يا مدام اقعد منا و ذوق البنة
-وااااو
-عجبك؟!
-شنية عجبني؟ ابدااااع في الخيوبية... اخيب روز ذقتو في حياتي... تنجم تترشح لجائزة اتعس طباخ في العالم و تربح عن جدارة... ياخي ما عندناش ملح؟ -اي والله نسيت جملة
أنت تقرأ
كرونيك:💕ما_ذنبي_ حبيبي💕
Romance#منقوولة قصة روعة أحداثها مشوقة فيها حب قوة عنف....💛💛 عنوانها: ما_ذنبي_حبيبي فيها 25 حلقة برك تونسية🇹🇳🇹🇳...حب❤...عنف💔 ...قسوة😿
