كرونيك:💕ما_ذنبي_ حبيبي💕

الحلقة 20

الحلقة 20

الوقت قداش يجري الأيام خالطة في جرة بعضها بزربة جايبة معاها حكايات جدد بين آمال و خيبات، صد و رد، مد و جزر، حب و نفور .. توا جمعتين على الليلة هذيكا اللي زادت تشعبت فيها العلاقة بيناتهم ووصلت لباب مسدود... ولاو كيف الذكير من بعيد يناديو لبعضهم و مش طايقين فراق و كي يقربو يتنافرو و كل واحد يدز الاخر و يعمل اللي يقدر عليه بش يحافظ على مسافة الامان... النظرات كذابة تعكس حاجة و القلوب عندها راي آخر... 

من الليلة المحنونة هذيكا و هي التبسيمة في وجهو لا... تضحك لخواتها في التليفون و الا كيف جاء مهدي بات ليلة ضحكاتهم واصلة لآخر الدنيا و معاه هو تعابيرها جامدة قاسية و باردة لأقصى درجة... تغلي من داخل تفور و من برا ما مبينة شي كيف البركان اللي يظهر هادي و حد ما يعرف انو من داخلو بكلو حمم تتغالى و نهار اللي يفيض ما عاد يشدو حد اللي في قلبو الكل يجي على برا...  

هو كرامتو ما سمحتلوش يرجع يتوددلها بعد النبزة اللي كلاها اخر مرة... صان قدرو بيدو و فهم روحو و هذا هو ابراهيم ما يطلبش الحاجة مرتين... عمل اللي عليه و كمل مزيتو للاخر و كي ارتاحت يديها رجع يخدم و كي يكمل يركش مع اصحابو في القهوة و يروحلها كان في الليل... الجمعة اللي فاتت مشى طل على دارهم بات ليلة السبت و جاء الأحد الصباح... ليلى ما قصرتش كيف العادة حاولت تعبيلو راسو و تحرشو على أميرة أما المرة هاذي الكلام داخل من اليمين خارج من اليسار... المدة اللي عاشرها فيها برغم قصرها خلاتو يعرف انها ما تشبهش جملة للمرا اللفعة اللي توصفلو فيها أمو... عينيه تحلت وولى يوزن في الكلام ماعادش ياخذها مسلّمة و يصدق كل حرف تقولو ليلى يمكن لأنو اللي يحب ما يراش العيب في حبيبو و ما يمدش وذنو للناس... 

و لأنو الحب الصادق يملك القلب من غير ما يدق بابو و ما يستعرفش باختلافات و لا يرى العداوة و لا المسافات اميرة زادة وقعت تحت سحر ابراهيم... هاك العينين الخضر و القشرة القمحية و زيد عليهم تاتو الأنفينيتي سلبولها عقلها خلاوها كل ما تغمض عينيها يجي خيالو قدامها... هبلها بزينو و برجوليتو و طبيعتو الحنينة اللي اختبرتها في وقت عجزها... و بدات هاك الأحكام المسبقة تطيح و تتفوّر وحدة وراء أختها... ابراهيم المتغطرس المغشاش اللي ماعندوش شفقة و لا رحمة اختفى من راسها و شد بلاصتو برهوم الحنين صاحب الخزرة الحلوة و مولى التاتو اللي يعشّق... بينها بين روحها تحشم بش تقول يعجبها بدنو دونك ولات ترمزلو بهاك الأنفينيتي الصغرونة اللي ماعادش تنجم تصبر عليها و على اغراءها... 

"ما كل ما يتمناه المرء يدركه"... هاذي هي حكمة اميرة في الحياة و المبدأ اللي عايشة بيه و لا حبت تبدلو... حتى حبها ليه ما بدلهاش ما خلاهاش تفهم انو ثمة فرحة مش مشروطة تجي بكمالها ما وراهاش دموع و لا وجيعة قلب... حالة الشيروفوبيا اللي عندها ما داواهاش الحب أو بالأحرى هي ما عطاتوش فرصة يداويها...