كرونيك:💕ما_ذنبي_ حبيبي💕

الحلقة 10

الحلقة 10

تعدات عليه جمعة رزينة طويلة تفدد ما فيها شي يفرح و الا يخرّج من الستراس حتى شوية بالعكس عداها تخمام و مرض و حرقان أعصاب و تأنيب ضمير تلاقات عليه الكل هواء يهز و هواء يجيب...

نهار الأحد في المغرب بعد ما صارح جيهان وصلها للبلاصة اللي مستانس يهبطها فيها كل مرة، في الحومة اللي وراء دارها... حبس الكرهبة و ما خلاهاش تهبط يستنى منها في كلمة السماح بش يبرّي ذمتو قدام رب أما بخلت بيها عليه برغم طلبها منها برشا مرات... معذورة عطاها برشا أمل و خلاها في نص الطريق و بعد ما وعدها يكمل معاها للاخر... الله غالب ما ثماش مكتوب... طريق كامل و هي ساكتة ما نطقت حتى حرف و ختمتها بخزرة بكلها لوم و عتاب رماتهالو وقت ما هبطت وصلتلو بيها عمق جرحها و صدمتها فيه... لفّت وجهو للجهة الاخرى ما نجمش يستحمل يراها هكاكا من جرتو هو... حتى كان ما حبهاش عمرو ما تمنى يجرحها و الا خمم يقصها معاها الكلو من جرة اميرة و بالنسبة ليه هذا ذنب اخر ينزاد للقايمة الطويلة العريضة متاع الحاجات اللي بش يحاسبها عليهم... 

 نهار الاثنين فاق بالسيف الشمس قوية على عكس البارح و هو باقي متزيلف تقولش محاوط بالثلج... لبس و مشى يخدم على الخواء ما نجم ياكل حتى شي ما جاء نص نهار ما كان يحس في روحو ماعادش ينجم ياقف على ساقيه ما ذابيه يروح يتكى و يعطيها نومة... برهوم مش من النوع الممراض ديما جوو باهي و محافظ على صحتو اما اذا جاء نهار و مرض بدنو يتهد فرد ضربة و حتى الماكلة لا ينجم يعديها و لا يستطعمها...

وجهو أصفر ملخلخ و خشمو أحمر و مجرّح على الأجناب من كثر المسحان... وين يدور يهز معاه كدس بابيي و ڨراجمو لتو منفوخة و تدق فيه ما براتش كل يوم يتعدى يزيد يتعب أكثر و المشكلة دوايات الڨريب ما ينجمش يستعملهم خاطر عندو حساسية قوية لمكوناتهم يلزمو يبقى هكاكا حتى يبرى وحدو... همّ الڨريب و لا هم الحساسية اللي اذا تحيرت عليه يحبلها مدة طويلة بش تعتقو و طبّة و شكاير دوايات و موّال كامل... 

صبر و تقوّى على روحو حتى للساعتين و مشى كلم عرفو بش يشوف شكون يعوضو و خذا كونجي لاخر الجمعة... خدّم الكرهبة و بقى يخمم يروح لأمو تتلهى بيه كيف قبل و الا يشد دارو و يقيم بروحو وحدو خير... حار و حار دليلو خايف كان يروح ما يخليهوش بوه يبقى في الدار لوطا و يفرض عليه يشد جنب مرتو و هو يحب يربح راحة بالو و يصفي مخو بعيد على وجه أميرة و همها و المشاكل اللي جاية من راسها على هذاكا فضّل انو يركش في دارو في طبرقة أما اللي صار هو العكس... لا ارتاح نفسيا و لا حتى جسديا من جهة الڨريب ماشي و يستفحل بيه أكثر و أكثر و من جهة أخرى احساسو بالذنب على اللي عملو في جيهان... و اللي أتعس من هذا الكل الهلواس الجديد اللي فرض روحو عليه و كل ما يحاول يتجاهلو و يمحيه من مخو يزيد يسيطر عليه أكثر و يرمي عروقو و يفرض وجودو حتى ولى يخمم فيه تقريبا في كل لحظة ينسى شوية و يرجع لنفس المعبوكة... و سبب الحكاية مجرد حلمة و الا المعنى الأصح كابوس تهيّألو فيه انو أميرة قابلت طلال من وراه و جابتو للدار في غيابو... المنامة المسودة هاذي تعبتو برشا برشا برشااااا فوق ما يتصور العقل فاق منها يلقى روحو ينهج النفس بش يتقطع عليه و يحرك في راسو على اليمين و على اليسار بزربة كأنو يحب يقوللها لا ما تعملش فيا هكا... بدنو يقلي بالسخانة تقولش راقد على الجمر وجهو أحمر مغصور شاعل شعلان و بدنو ينكت بالعرق كأنو كان يجري في مسافة طويلة و حتى قلبو يدق بزربة على غير المعتاد... استعوذ من الشيطان و شرب شربة ماء و مشى برّد وجهو اما ما نساش ها المنامة المشومة... كل ما يغفل شوية تجي بين عينيه و يلقى روحو يخمم في الحكاية و يربط في الخيوط ببعضها... يتذكر نهار لقاها واقفة معاه في الظلام و نهار جاء خطبو فيها و من بعد فازة الحجرة اللي كسرلهم بيها البلار و الكلام اللي قالهولو... العملة هذيكا ما تجي كان من واحد عاشق ذايب بالحب خاطر واحد بعقلو مستحيل يتهور و يرمي حجرة على دار و يحط روحو في الريسك على خاطر مرا...