كرونيك:💕ما_ذنبي_ حبيبي💕

الحلقة 21

الحلقة 21

البارح ليلة استثنائية بكل المقاييس كل شي صار فيها بطريقة فوق المثالية كأنها منامة مزيانة مهبولة أبن من الواقع... فرحتو ما تتوصفش و حس معاها احساس عمرو ماذاقو في حياتو الكل و عمرو ما وصلتو ليه حتى مرا... مش على خاطر متوحشها و عندو مديدة شاهي قربها فقط اما زادة على خاطرها تبدلت... المرات القلال اللي مسها فيهم كانت جامدة بدنها سخانتو عادية ما تتفاعلش مع بوساتو و مشلقة انها تتقزز من لمساتو... و الليلة اش بش نحكيلكم على الليلة هههههه... كأنها بركان و اتطرشق و غطى الاخضر و اليابس... تفاعلت معاه بجنون و ما خلاتهوش يبعد تحبو يبقى قريبلها اكثر وقت ممكن بش تعوض حرمانها منو في النهارات اللي فاتو و بش تعبرلو على حبها ليه... و هو وين تلقاه بالفرحة جننها هبلها وصلها للذروة و فهم علاش مرة قتلو خليها تو تجي بطبيعتها... 

-صباح الخير يا أحلى عروسة في الدنيا... 

-صباح النور... 

-ما احلاه الصباح كي نقوم و نراك هكا روجة و خدودك منورة و تخزرلي في ها الخزرة البنينة تقولش نشد نڨرمشك أصل... ذبلت عويناتها و جاوبتو بصوت واطي فيه نبرة متاع اغراء بالضبط كيف الصوت اللي سمعها تغني بيه... 

-احشم عاد...

-و انا مازلت نحشم بربي؟ عندي شكاير متاع كلام يلزمني نقولهولك الكل سي نون بش نطرشق... راك كنت بش تهبلني يا طفلة عندي ليك برشااا مشاعر كنت كاتمهم.. 

حطت راسها على صدرو و باستو منو و دورت يدها على رقبتو تلعب بخصلات شعرو و هو يدو تطبطب بالسياسة على ظهرها... 

-ربي يخليك ليا حبوبي... 

-بو زينك يا هم كل ما تقلي كلمة هكا بدني يقشعر... زيدني زيدني نسالك برشاااااا دلال... 

بقاو متكين شوية كل مرة واحد يعطي كلمة و يزيد اخرى كأنهم كانو ملجمين و تنحى لجامهم و مش بش يكفيهم الدهر بطولو بش يفرغو قلوبهم و يعبرو على مشاعرهم... ضربت في مخو حكاية بعّدها من فوق صدرو بالسياسة بش ينجم يخزرلها: 

-اميرتي عندك باسبور؟ 

-لا علاش؟! 

-الخدمة عاملين رحلة لتركيا الشهر الجاي خمسة أيام نحب نهزك و نمشيو... مش مشكل الباسبور تو نحضروه في اقرب فرصة والله جات في وقتها... 

-خمسة ايام؟ و بقداش؟ باز برشا فلوس... 

-عادي الخلاص بالتقسيط على ستة شهور يعني ما تتحسش برشا... 

-لا عزيزي ما ثماش علاش تغصر روحك اش بيها طبرقة عروسة على حالها تهز العقل و فيها بلايص مش نورمال تو نحوسو فيها و نبردو قلوبنا...