إعتزل ما يؤذيك 💛( روايات ليبية ) مكتملة

البارت 1 💛

اعتزل ما يؤذيك 💛 ح 1
.
واقفة على الروشن يلي يطل على الكلية بالكامل و مربعة يديها و تشوف للمطر بس عقلها يفكر بعيد لين طق الباب :
نور : ليا الدوام كمل ليه نص ساعة راه ليش مروحتيش ( ليا اكتفت بنظرة لصديقتها يلي من المفترض تعرف بيها ان ليا قاعدة تمر بأصعب ايام حياتها ، اما نور فهمت ان صاحبتها مضايقة سكرت الباب و جتها ) ، شن في ؟
ليا : نفس الموضوع كل مرة ، الزواج يحسسوا فيا كأن عالة عليهم
نور : باهي فهميهم انك مش مفكرة حاليا
ليا : قلت و طبعا كان ردهم اني على علاقة مع واحد و نراجي فيه
.
نردوا قبل يوم :
.
ليا مقعمزة في الدار و توتي في المحاضرة خشت عليها اختها الصغيرة ليلى
ليلى : اوي اعتزل مايؤذيك ماي فاذر يريد رؤيتك
ليا شافتلها بتفنيصة : اسمي ليا للمرة المليون مش اعتزل ما يؤذيك ، و كنه كلامك شيء شرق و شيء غرب ؟ تكلمي كويس
ليلى : ييي علينا فهمنا انك استاذة و بدال ما تعطيني محاضرة بابا و عماد يبوكك لوطة و الهيئة يبوك في نفس الموضوع
(ليا تفست بعمق و نزلت لقتهم يراجوا فيها في دار المعيشة )
ليا : السلام عليكم
بوها، خوها : و عليكم السلام
بوها : طبعا اكيد عارفة ليش نادينا عليك !
عماد : و هالمرة منبوش رفض لأنه طيار وحالته المادية فوق الريح
ليا : ليش متبوش تفهموا ان الزواج اخر همي اههه قولولي ؟؟ انا عالة عليكم ؟؟؟
عماد وقف بعصبية : مالا تراجي في واااحد معين ولا كيف و انتي لا عاجبك مهندس ولا طيار ؟؟؟
بوها حتى هو أول مرة يتكلم بهالأسلوب : خليناك على راحتك واجد ، بعد بكرة وتي روحك بيجي هو و هله بعدين ساهل ( طلعت ليا بدون اي زيادة كلام و وكلت أمرها لربي و وتت حاجاتها و رقدت )
.
.
خلي نعرفكم على عيلتي 💛
أنا ليا م1994 متخرجة من إدارة الأعمال بإمتياز و توا قعدت معيدة و نقري شخصيتي حتعرفوها من خلال الرواية 💛
لمياء : اختي الكبيرة م 1993 متزوجة و عندها بنوتين توأم ( روفان ، ربى ) عمرهن 7 شهور 💛
أختي ليلى : م 2000 آخر العنقود تقرأ ثانية كلية في اللغات ، دلوعة الحوش بس طيبة و أي شيء يمشي عليها عكسي
عماد :م 1991 خوي الكبير عماد متجوز و عنده ولد يشتغل في شركة للنفط ، متسلط و يحب يحكم و تفكيره زي أيام الجاهلية و يسكن فوقنا .
رباب ( مرته) :متخرجة من الصيدلة و لأن راجلها عماد مقدرتش تشتغل ، طيبة و تحبنا معمرهاش فتنت بينا و لا شفنا منها حاجة يعني من النوعية النادرة من الكناين .
يزن : ولدها عمره سنة 💛
جهاد : م1996 متخرج من هندسة برمجيات و يشتغل في شركة اتصالات ، شخصيته عكس عماد متفاهم و يحب يهدرز معانا .
أمي : مفيدة ، مدرسة لغة عربية ، تحب صغارها الأربعة و مترضاش فيهم شيء بس مرة مرة تنفصل عليهم و على ليا بذات .الأب : ناصر ، أستاذ جامعي في قسم الكيمياء ، شخصيته مش عصبي واجد و عادي يناقش صغاره في اي موضوع ..
ليا : و هذي عيلتي الكتكوتة ، يلا خلي نردوا للرواية 💛
.
نردوا للحاضر :
نور بضحكة  : باهي مرات فيه خيرة هالطيار و نقعد نسافر على حسابك هههههه
ليا بنظرة على جنب: مصائب قوم عند قوم فوائد
نور : غريبيييية قلتي جملة غير اعتزل ما يؤذيك يلي سكنتي بيها
ليا : اطلعي اطلعي قريب يسكروا علينا الكلية و مزال نبي نتكي  نعبي بنزينة
نور : خلاص مالا اطلعي و فكري في الموضوع مرات يطلع كويس هالطيار
ليا بعصبية : كويس لروحه انا منبيش كنكم متبوش تفهموا الهم
نور :  و الله لو مش صاحبتي و عارفتك راه قلت تبي حد معين
ليا : و نبي عدي روحي راك زدتي صدعتيني
نور : قولي للكابتن يجيبلك دواء هههههه ( ليا فنصت فيها و طلعت بسيارتها بس لقت الشيل مسكر ، فروحت على الحوش طول جت بتخشش سيارتها لقت عماد واقف  يراجي فيها )
عماد : مشاء الله مشاء الله كان زدتي شوية تأخير !!
ليا بتنرفيز : خير شن موضوع اليوم ؟؟
عماد بإستفزاز : هاتي مفتاح السيارة
ليا : وعليش ان شاء الله ؟
عماد : لما انقول كلمة تتنفد فاهمة ؟؟
ليا : لا مش فاهمة و الحمد الله بابا حي و قاعد يحكم عماد : هي خشي قدامي لبوك هي ( خشت ليا و وراها عماد ، وهي كانت متأكدة أنها حتطلع خاسرة بمأن عماد في الموضوع )
بوهم شافهم خاشيين متعصبين : شن في !
عماد : يرضيك أن بنتك اتسوق و البلاد هكي؟؟ كل مرة خطف و قتل ! و شوف هي امتى مروحة يرضيك يا بوي ؟؟
بوهم : صح معاك حق
ليا : و المعنى. ؟
عماد : وقفي لين تتجوزي و يقعد هو يوصل فيك
ليا : تلف تلف و ترد للموضوع نفسه ، ياهو منبيش منبيش تي شن هي بالسيف ؟؟
بوهم بعصبية : ليااااا احترمي نفسك يلي قدامك بوك و خوك مش اثنين من الطلاب امتاعك تتكلمي معاهم هكي و كلام خوك حيتنفد فاااهمة !
(أما ليا اكتفت بنظرة اختصرت فيها مأساة يلي عايشتها بسبب خوها الجاهل و بوها يلي حسسها انها عالة عليه ، بعدها ركبت لدارها لاقتها ليلى نايضة مفجوعة من نومها بسبب الصوت العالي و شعرها  واقف و كأنه الشمس يلي غابت بسبب المطر )
ليلى : تي شن عالحوش يلي محد يقدر يرقد فيه من كثر الفجايع ؟؟؟
ليا بتنرفيزة : حولي من قدامي مش ناقصتك ( فاتتها ومشت لدارها أما ليلى قعدت واقفة وتتكلم مع روحها )
ليلى : زعمك نفس الموضوع أكيدة ماهو ليا متتنرفزش إلا منه و الباقي ( بتعليق : اعتزل ما يؤذيك ) توا انشوفها هي شن بدير بيها هالجملة ،( بعدها فطنت لروحها انها في الممر و تتكلم بروحها ) يارب احفظلي هالشوية العقل يلي قاعدة فيا ( ومشت لدارها )
.
.
عند عماد في شقته :
رباب : بس هذي اختك و هضا مستقبلها وهي كبيرة مش صغيرة تعرف مصلحتها وين .
عماد : شن قايلك أنا من قبل ؟؟ قلتلك حاجة بيني و بين هلي ردي بالك ثم ردي بالك تدخلي صح ولا لا ؟
رباب : تبيني انشوفك تغلط و نسكت !! راه هضا زواج مش حاجة عادية تخايل يوم بكرا اتجيك مطلقة ومعاها بيبي ذنبها بيقعد في رقبتك را .
عماد : معندناش بنات يتطلقن نحن ولو فكرت هي فالشيء هضا حتى لو شوية حنتبرا منها
رباب : قلبك حجر ،ان شاء الله يطلع انسان كويس و يعوضها على عيشتها يلي عايشتها
عماد : اي و كأنك اتقولي ان شاء الله متغلطش غلطي ولا !!! و كان مش عاجبك حوش بوك و نعرف طريقه ، اه نسيت نسيت مرت بوك يلي كل ماتمشي تقعديلها خدامة ولا بوك يلي يهين فيك
رباب و العبرة خانقتها : اذا كان راجلي يلي هو راجلي يعزر فيا و هكي يهين فيا منستغربش من مرت بو ( وناضت للدار و قعدت تبكي و الدنيا متسكرة في وجهها مش عارفة لمن تحكي )
.
في العشية عند ليا :.
ليا : ايوا نور
نور : كنتي راقدة اكيد
ليا : اي من امبدري ، لقيتك رانة عليا
نور : اي بنقولك بكرا جيبي معاك أسئلة الامتحان عشان نسلموها للقسم
ليا بهزوة  : هه تي اي بكرا و اي أسئلة
نور : شن في !
ليا : ... ( وحكتلها )
نور : عليك قصة خوك هالجاهل ، بس عندي ليك حل
ليا : شن ؟؟
نور : ........
ليا بصدمة : مش من جدك انتي صاااح !!!
.
.
#يتبع
تتوقعوا شن حكاية رباب ؟
و شن حل يلي طرحاته نور ل ليا ؟
نتمنى تكون البداية نالت على إعجابكم 💛
##اعتزل_ما_يؤذيك
#بقلمي
#rwayat_br0o
#أبرار