إعتزل ما يؤذيك 💛( روايات ليبية ) مكتملة

البارت 3 💛

رواية إعتزل ما يؤذيك 💛
البارت 3 💛
.
.
ماجد : و بتقوللها على يلي في بالي بالك
حسام :أكيدة لا
ماجد : بس هكي أنت بتغش البنت
حسام : لا غش ولا شيء زيها زي هلي مش حتعرف
ماجد : بس هي حتقعد معاك 24 ساعة مش زي هلك ، مهما كنت منافق و شخصيتك يلي تبين فيها عكسك بس خاف ربي فيها بنت الناس
حسام : توا انت جاي تنصح فيا و جو ماهو انت زيي
ماجد : زييك ؟؟ اتشوف فيا ماشي نخطب ولا ندور ؟
حسام : حتى انت داس على هلك
ماجد : من قالك !
حسام : توا بتقنعني أنك قايلهم ؟
ماجد  : انت حر بتقتنع ولالا بس أنا نبهتك سيورها حتعرف ياصاحبي
حسام : يامن حي لعند هضك اليوم ( وقف خدا المفاتيح و فونه ) هي ماتوصي على شيء ؟
ماجد : زيد فكر ماتغلطش
حسام : هي سلام ( وطلع لسيارته و اتجه لمحل الحلويات عشان يلي وصاته عليه امه ،و حتى ماجد ركب سيارته و روح لحوشهم و هو يفكر في مصير صاحبه المنافق )
.
.
عند ليا و جهاد :
جهاد : تبي بيتزا ولا شاورما
ليا : الاثنين ✌
جهاد : هههههه انا الغالط يلي نسأل
ليا : مدخلنيش نبي بيتزا و شاورما و ببسي دايت
جهاد : دايت ! واكلة ادسم حاجتين و اتقولي دايت ؟حرام عليك و الله تنطقي كلمة دايت بعد بيتزا و الشاورما
ليا : لو بتقعد تتكلم هكي المطعم يسكر و انت مزال منزلتش
جهاد : راس مسكر ( ونزل للمطعم طلب بيتزا و شاورما كيف ماتبي ليا و رد للسيارة  قعمز وقعد يحك في يديه عشان من الصقع  جمدن )
ليا : نسيت الببسي !
جهاد : معندهمش
ليا : معندهمش ولا انت مبيتش اتجيبه ؟
جهاد : و رأس امي معندهمش
ليا : خلي رأس امك على جنب هو ديما صداع من حلوفتك هذي
جهاد : كولي كولي قبل ما يبرد وانتي لوك لوك
ليا: بناكل هكي في السيارة ؟ مش شايلني لبحر لملاهي لأي مكان ناكل فيه ؟
جهاد : نعم نعم ؟ تي البحر احتمال تلقيه مجمد في الصقع اهوا و أي ملاهي ان شاء الله يلي تحكي عليهن؟ راك كبرتي
ليا: توا انت اللوك لوك مش انا كول كول ( قعدوا يتدهوروا بالسيارة و ياكلو )
.
.
في حوش هل ليا :
امها :انضر امتى بيجوا
رباب : اكيد العشية
ليلى : تخايلي عزوزتها تطلع شريرة
امها : تفائلي خير يابنت و الله اختك مش ناقصها
رباب : ان شاء الله يكونوا على قد نيتها و الله تستاهل كل خير ليا
الام : ان شاء الله ربي يسمع منك
ليلى : حتى هو بيجي معاهم ؟
الام : اي اكيدة
رباب : هي أنا نستأذنكم توا يزن رقد و ان شاء الله بكرا من الصبح تلقوني عندكم
الأم : سلمها بنيتي جعنك ماتغيبي ان شاء الله
رباب : ولو مش بجميلي ليا خيتي ( وطبت ولدها ) هي تصبحوا على خير
الام ، ليلى : وانتي من اهل الخير
ليلى : و الله حرام فيه ولدك وحدة زيها
الام : ربي يهديه ان شاء الله
ليلى : حاولي تحكي معاه يخف عليها
الام : هي مشكتش نحن شن دخلنا ؟؟؟
ليلى : و الله توجع لا اب كويس ولا مرت اب كويسة ولا راجل كويس
الام : مرات ولدها يكون كويس
ليلى : ان شاء الله ربي يعوضها ، صوتهم روحوا ليا و جهاد
الام : بسلامته جهاد ديما بهرجته ( دوشته )
ليا ،جهاد : السلام عليكم
الام ، ليلى : وعليكم السلام
الام : لا مشاء الله غيرتلها جوها
جهاد : اصلا شن يغير مزاج المرأة غير الأكل ؟
الام : مشاء الله خبرة وليدي
ليا ،ليلى :ههههههههههه ( وركبن كل وحدة لدارها و هو جاء قعمز جنب امه )
جهاد : عليك تزليط حسستيني نكلم في 100 وحدة و هن رأس مالهن يمكن 50 بس
الأم : لا حرام ظلمتك 50 بس ! تو تو تو حرام ( و حولت حذاءها امتاع الحوش اكرمكم الله و عزقاته عليه ) هذي اخر تربيتي فيك تلعب ببنات الناس هكي ربيتك أنا ؟ كبرت و علمت و قريت عشان تلعب ببنات الناس يلي تعبوا هلهن في تربيتهم ؟
جهاد : يييي علينا بصارة و الله بصارة تو معقولة جهودة وليدك هكي يدير ؟
الام : منستغربش شيء في وقت توا
جهاد : وين الوالد مشفتاش اليوم ؟
الام : ماشي لعمك مختار ( صاحب بوه ) دايرين عشاء في حوازته
جهاد : اهااا مالا انا بنمشي نرقد عندي نوضة بكري
الام : انوضك ؟
جهاد : لالا متعبيش روحك تو اندير منبه هي تصبحي على خير
الام : وانت من اهل الخير وليدي
.
.
عند رباب :
( مقعمزة على الصالون بروحها لأن عماد و ولده راقدين  و تفكر في يلي صار قبل سنة ونص )
قبل سنة ونص :
بوها : بتاخديه يعني بتاخديه
رباب : بس أنا منبيشي حرام عليك ادير فيا هكي راني بنتك وحيدتك
مرت بوها بحقد: ولأنك بنته الوحيدة يبي يفرح بيك
رباب : و الله كل منك انتي الله لا تربحك شن درتلك
بوها عطاها كف :  هكي تتكلمي معاها يا قليلة الأدب اهيا في حسبة امك و حتاخديه حتاخديه فاهمة وتو نوريك على تسكير الرأس أنا ( كرها من يدها و عزقها في دارها و سكر عليها الباب )
مرت بوها بتمثيل  : حرام عليك تسكر عليها
بوها بإنفعال : فوتيني انتي الثانية مش ناقصك ( نطت من صوته و مشت لدارها تخطط كيف بتفتك من رباب يلي تعتبر فيها عظم واقفلها في البلعوم  )
.
.
تعالوا نحكيلكم على معاناة رباب :
رباب البنت االوحيدة معندهاش لا اخ ولا اخت و امها توفت قبل 5 سنوات و بوها فورا تجوز بنت عمه يلي نفس عمره و في هال5 سنوات رباب شافت الظلم و جميع انواع التعذيب منها ، كملت الصيدلة بمجهود مكثف منها .بعدها جاء عماد تقدملها .
.
.
جاء عماد و تقدملها و هي كانت رافضة بس لما شافت امه و لمياء ارتاحت و توقعت يكون طيب وتجوزت و قعدت تعاني من جديد في حمل أثقل بس هله كانوا مهونين عليها و حنينين فيها .
.
تم الليل و كل واحد يفكر في شيء مختلف
ليا : زعمك يطلع كويس ولا لا
حسام : مستحيل انقوللها و نخرب صورتي قدام هلي
ليلى : تو ليا تتجوز و انا نقعد بروحي
جهاد : كلام امي صح و معاها حق
رباب : يارب عوضني في مازن يارب
.
.
اليوم الثاني :
ناضت ليا على صوت الفون: الوو
نور : ياخميرة النوووم انا قدام الباب نزلي الأسئلة
ليا : هييي جيتك ( غسلت وجها و لبست بدلة الصلاة و نزلتلها فتحت الباب و خشت نور للسور )
نور : لالا رايقة مشاء الله
ليا : صبح يا فتاح هاك الأسئلة وقت على الكلية  و بعدين نحكوا
نور بضحكة  : خلاص تمم تو ناخد التفاصيل أول بأول
ليا : صاحبتي و نعرفك كتلة فضوول هههههه
نور : هيي سلاام
ليا : سلااام ( سكرت الباب وركبت صلت و نزلت لهلها مقعمزين في دار المعيشة ) صباح الخير
ليلى بوها امها : صباح النور
امها: هاك حليب و شاهي دافيات
ليا خدت من امها : شكرا
ليلى : بنغسل الاماعين وبنركب نقرأ أنا عندي مراجعة بكرا
امها : اقري قبل ما يجو الناس
ليلى : تمام
ليا: امشب اقري تو انا نغسل
ليلى بصدمة ،: مش طبيعية  بلكي عندك حرارة ؟ ( حطت يدها على رأس أختها) لا كويسة مشاء الله
ليا : بتزيدي حرف نغير رأيي ( الجرس قعد يرن )
الاب : صبح من بيكون ( و مشى بيفتح لقاها لمياء شادة بناتها و سكواتهن و حايسة في عمرها )
لمياء : صباح الخير
بوها خدا منها البنات : صباح النور خشي خشي
( خشت سلمت على هلها و خشت هي و امها يديرن في الغداء )
في العشية :
في حوش هل حسام :
وسام : قصدكم بتخلوا هذوم الاثنين ( وأشر على منذر و مؤيد ) معاي ؟
نادية : مالا وين بيقعدوا
حسام : هيااا
وسام : مستعجل الأخ
نادية : خلي خوك في حاله
سهام : هياا أنا واتية
( طلعوا و اتجهوا لحوش هل ليا )
في حوش هل ليا :
الام : حطي الفاسوخ ( وشق ) يا لمياء راهم على جية
لمياء : هي هي ( نزلت ليلى هي و روفان و ربى امبدلتلهن )
الام : هاتي نرقيهن هنا و يزن
رباب : هههه ولدي حيطيرها العين بشطانته
الام : مغير يسلم مفيش حد هو صغير مدارش شيطانة ، اركبي سلم بنتي شوفي ليا
رباب حطتلها يزن جنبها : حاضر هي ( وركبتلها طقطقة باب الدار )
ليا : خشي
رباب : شن العروسة واتية !
ليا : خايفة و متوترة ، تخايلي يطلع مش كويس و يغصبوني عليه ؟
رباب : لالا مستحيل هلك يديروها
ليا : ان شاء الله ، حي صوت تسليم برا
رباب : شكلهم جو هي خلي ننزل توا و انتي اقري المعوذات
ليا : تمام
( نزلت رباب سلمت على نادية و سهام )
نادية : مشاء الله بنيتك حتى هذي
الام : كنتي و بنيتي ( ابتسمتلها رباب )
نادية : مشاء الله ( هدرزوا شوية و لمياء نادت ليا )
ليا : اووف متوترة
رباب : كويسين راه
لمياء : تهبل امه عسل خشي هي ( خشت ليا سلمت و نادية عجبتها )
عماد ينادي : امييي ، امييي
الام : جيييت ، نعم
عماد : قولي لبنتك تلبس حاجة مستورة و تطلع
الام : باهي هي ( خشت نادت ليا و لبست عباية و وشاح و طلعت معاها سفرة القهوة )
عماد : خشي
ليا : ........
.
.
#يتبع
تتوقعوا كيف حتكون المقابلة !!
لو لقيت تفاعل كويس حنزل بكرا البارت 4 💜
.
#رواية_اعتزل_ما_يؤذيك #روايات_ليبية #كتاباتي
#ليبيا #rwayat_br0o