إعتزل ما يؤذيك 💛( روايات ليبية ) مكتملة

البارت 6

اعتزل ما يؤذيك 💛
البارت 6
.
.
عماد : لالا بنمشي للصحراء عندي شغل يومين
الأم : هيي توااا خطرلهم
عماد : شغلي ميعرفش وقت
الام : مربوحة طريقك بيضاء
عماد : هي في امان الله
الكل : في امان الله
الاب وقف : حتى انا وقت عليا هضك هو تعالي يا مفيدة شوي ( ناضت مفيدة و مشتله  )
مفيدة : نعم يا حاج !
الاب : بعدين كلمي الناس و قوليلهم موافقين
مفيدة بيأس : ان شاء الله
الاب : هي في امان الله
الام : في امان الله ( و خشت )
ليا : ماما جهاد ناض؟
الام : اي من امبكري قال عنده شغل
ليا : قبل نبيه يشيلني للكلية على الأقل ناخد اجازة
الام : بعد يروح قوليله ، هي تعالي خلي انكتوا المطبخ
ليا : كنه وجك تغير بعد ناداك بابا
الام : يبيني نكلم الناس و نعطوهم الموافقة
ليا : اها عادي مدوريش خلاص انا رضيت بالأمر الواقع
الأم : ربي يهنيك و يطلع ولد حلال
ليا : ان شاء الله ، هي تعالي انكتوا المطبخ
الام : هي ( ومشت هي و بنتها يضموا في المطبخ و يهدرزن خشت عليهن رباب و في يدها ولدها يزن )
رباب : صباح الخير
ليا ، الام : صباح النور
رباب : حولي يا عمتي تو نكمله انا و ليا
الام : اهو قاعدة ما عندي ما اندير
رباب : اهو يزوني مستاحشك
الام : هههههه باهي هاتيه هي ( مسكت يزن و البنات يضمن )
.
.
عند هل حسام :
حسام : صباح الخير
الام : صباح النور على وليدي
حسام : مشاء الله رايقة اليوم
الام : اكيدة بعد تريحت عليك
حسام : شن ردوا عليك ؟
الام : لالا مزال بكري على الأقل ياخدوا يومين ثلاثة
حسام : اوك راهو  كان وافقوا قوليلهم منبيش بيان لا شيء عرس طول
الام : ليش اول كنه منديرولهاش بيان ؟
حسام : مش مهم تو انديروا عرس كبير يغطي على البيان شن رأيك ؟
الام : حتى هذي فكرة
حسام : تمام انا طالع تبي شيء !
الام : سلامتك وين ماشي
حسام : مش  امطول طالع وجاي
الام : شن خاطرك انديرلك في الغداء ؟
حسام : اي شيء
الام: خلاص تو انديرلك رز امبوخ انت تحبه
حسام : هههه ياريت هي سلام( وطلع )
الام : في حفظ الله
سهام : صباح الخير
الام: مساء النور نويمة اليوم
سهام : هههه مش غير هي الساعة كم توا
الام : قريب 1
سهام : واو طولت واجد منذر و مؤيد وين ؟
الام : راقدين قاعدين في دار وسام
سهام : و وسام وين ؟
الام : طالع من الصبح
سهام : اها مالا نمشي انوضهم
الام : و انا بنحط الغداء على النار
سهام : خليه تو انا نطيب ارتاحي
الام : شن فيه من تعب هو رز امبوخ
سهام : خليه و الله انا انديره
الام : على راحتك
سهام : خلي انوض الاولاد و انجي انحطه على النار  ( ومشت لدار وسام )
الام : يالله و انا بنطلع للسور بنشوف غريساتي
سهام : منذر ، مؤيد نوضوا الساعة واحد بوكم قريب يجي
منذر : خلينا شوية بس
مؤيد دوبك فاتح عيونه : الفجر رقدنا راه
سهام :مشاء الله مشاء الله للفجر شن اديروا ؟؟
منذر : لعبنا نحن و خالي بلايستيشن   
سهام : مشاء الله عندكم ربع ساعة بس متنوضوش فيها مرة ثانية انجي بروحي و انتم نخليكم مع بوكم
مؤيد ، منذر : ها نضنا
سهام : ايوا هي اغسلوا و جوهكم و صلوا و تعالوا افطروا
.
.
في حوش هل ليا : ليا متمددة على الفراش امتاع دار المعيشة : اخ با ضهري انكسر اليوم
رباب : هههههه تتعبي بسرعة انتي راه
الام : مش متعودة
ليا : يييي بتقلبوها عليا توا !
الام : ما قلت الا الصادقة ، حي تليفوني يرن  امشي جيبيه يابنت ( ناضت ليا جابت الفون لأمها )
ليا : ليلى هذي
الام : ان شاء الله خير ، الو
ليلى : الو ماما
الام : نعم
ليلى : جهاد في الحوش ؟
الام : لالا عنده عمل
ليلى : عماد
الام : اليوم مشى للصحراء بعد ما طلعتي ليش شن في ؟
ليلى : الدكتور اعتذر مش جاي قلت نروح ما عندي ليش امراجية الباص لعند 3
الام : كلمي جهاد كان فاضي يجيك
ليلى : لالا خلاص تو نراجي الباص ، هي سلام
الام : مع السلامة ( وسكرت )
ليا : كنها شن تبي ؟
الام : ..( وحكتلها )
ليا : بعدك اليوم صقع بكل ، كلمي جهاد قوليله كان قريب يتكي عليها
الام : اي صح ( خدت فونها و رنت على ولدها )
جهاد : ايوا
الام : انت قريب
جهاد : لالا شوي و بنطلع من الشركة ليش ؟
الام : تكي على اختك جيبها من الكلية قالت الدكتور اعتذر مش جاي و اليوم صقع
جهاد : تمام حاضر
الام : حضرلك وجه محمد ان شاء الله
جهاد : ان شاء الله ( وسكر )
ليا : انضر وين وصل توا بابا
الام : حله يوصل مزال
ليا : يوصل 5 هكي
رباب : ليش ماشي هو !
الام : بيشوف خوته و و وبيعزم الناس ( ليا ناضت )
ليا : بنمشي اندوش على ماجو و نحطوا نتغدوا ( وطلعت )
رباب : عمتي شن غيره عمي قبل كان يخاف شيء يزعج بناته
الام : و الله علمي علمك يا بنتي يلي جاه جاه على ليا رباب : ان شاء الله خير يارب
الام : ان شاء الله ، هاتي البطانية امتاع ولدك خلي نغطيه
رباب مدتلها البطانية : تفضلي
الام : بعدين في العشية بنكلم العرب بنعطيهم الموافقة رباب : بالسرعة هذي ؟
الام : عمك هكي يبي
رباب : ان شاء الله يطلع ولد حلال و يخاف ربي فيها و تتريح معاه
الام : ان شاء الله ربي يسمع منك ان شاء الله ( نص ساعة و جو ليلى و جهاد )
... : السلام عليكم
الام ، رباب : و عليكم السلام
جهاد : جعاان بكل
الام : غير دبشك و صلي وتعال تغدى
جهاد : تمم
ليلى جت للدفاية طول : شن الغداء ؟
رباب بضحكة : الثقيل حبيب قلبك هههههه
ليلى: وووكك كسكسي
الأم : هضا الموجود
ليلى : الحمد الله يلي دسيت نصي الشاورما
الام : كولوا من برا و تعالي اشكيلي بطني رأسي تندروا عليه لحم شن ولا كيف مذبوح
ليلى : مش اول مرة ناكلها انا الشاورما
الام : انا وقضتك و انتي حرة
ليا : شن في ؟
ليلى : عشان الغداء كسكسي
ليا : ديري نص
ليلى ناضت : الحمد الله درت حسابي ، بنمشي نبدل و نصلي ( وطلعت )
ليا : نسقي لجهاد ؟
الام : هو الأول قال جعان
ليا : تمام ( سقت ليا الغداء و جباته و تغدوا )
.
.
في حوش هل حسام :
وسام بصوت عالي : بنرقد منبيش ازعاج
الام : نقص صوتك اختك و صغارها روحوا من بيديرلك الازعاج ؟
وسام : انتي هههههه
الام : جيل احرف ( و مشت قيلت حتى هي )
في العشية ::
ام ليا : رباب مديلي التليفون جنبك
رباب مداته ليها : تفضلي
الام : خلي نرنوا على الناس ( ورنت على ام حسام نادية و كان جنبها حسام كيف جاي من حوشه )
نادية : غريبة
حسام : من !
نادية : اسكت، ( وردت ) الو السلام عليكم
مفيدة : وعليكم السلام كيف حالك و حال بنيتك و وليداتك
نادية : الحمد الله كلنا بخير كيف حالكم انتم و حال كنتك
مفيدة : بخير تنشد عليك الايام الطيبة ، بنقولك ان البنت موافقة و ان شاء الله ربي يقدم يلي فيه خير
نادية : الله يبشرك بالخير و ان شاء الله ربي يهنيهم واكيد حنديرولكم زيارة
مفيدة : ان شاء الله ، مرحبتين بيكم في أي وقت ، هي مع السلامة
نادية : مع السلامة وسكرت ، وافقت البنت
حسام : بالسرعة هذي ؟
نادية : حتى انا استغربت ، لكن اكيدة طيارة متبيش تفلته من يدها
حسام : اي اكيد ( اكيد تبي تقهر حبيبها يلي سيبها بيا زي مايديرن كل البنات )
نادية : تو نمشولهم شي يوم نتفقوا بعدها تمشي انت و عمك مسعود لبوها ( معنداش إلا عم واحد و معنداش خوال )
حسام : ان شاء الله يصير خير ، في قهوة ؟
نادية : في هي تو انوض انطيبلك
حسام : ياريت و الله حسه رأسي مصدع
نادية : تو نمشي انطيبها ليك ( و ناضت بطيبله القهوة و هو يفكر ليش وافقوا بسرعة !)
حسام يفكر ( ايوا مفيش الا الحل هضا ، وخدا فونه و رن على )
حسام : الو السلام عليكم
عماد : و عليكم السلام
حسام : قتلك .....
عماد بعصبية : كيييف ...
.
.
#يتبع
تتوقعوا شن قال حسام لعماد !
.
.
#رواية_اعتزل_ما_يؤذيك #روايات #رواية #كتاباتي #قلمي #ليبيا #روايات_ليبية #ليبيا_فقط #rwayat_br0o