اعتزل ما يؤذيك💛
البارت 4 💛
.
ليا : السلام عليكم
حسام :و عليكم السلام ( مدتله القهوة و قعمزت على الصالون يلي مقابله )
عماد :بنمشي انشوف بوي وين ( وطلع )
حسام : انا حسام طيار الحمد الله بحوشي لاصق في هلي
ليا : انا ليا خريجة ادارة اعمال و توا معيدة في الجامعة و انسوق
حسام : كويس كويس عندك شروط ؟
ليا : منوقفش على العمل و انسوق
حسام : تمام ، و انا شروطي لبس مستور اول شيء
ليا : الحمد الله من قبل لبسي مستور
حسام : كويس
ليا في بالها : هضا ماسكها كويس كويس مخديتش منه لا حق ولا باطل ( على خشة عماد و ليا طلعت ركبت لدارها طول بدون ما حد يشوفها )
حسام : ناديلي العيلة و ان شاء الله هذي مش آخر جيه ( يلمح لعماد انه اخته عجباته )
عماد بفرحة : تمام تشرفونا في اي وقت ( و خش ) ليلى ليلى
ليلى : نعم
عماد : قوليلهم هيا
ليلى : تمام ( و خشت ليلى ) قاللكم هيا ( وقفت نادية و سهام بيلبسن عباياتهن )
الام : آنستونا و شرفتونا
نادية : الله يآنسك و بيكم زاد الشرف ، ونراجوا في ردكم
الام : ان شاء الله على خير ( سلمن و طلعن لحسام و إستلماته امه بالأسئلة )
نادية : عجباتك !
حسام : نوعا ما
نادية : مشاء الله واضح عاقلة و كويسة
سهام : و بشغلها و سيارتها
حسام : اي قالت لكن ليش الشغل المرأة مليهاش غير الحوش
نادية : وقلتلها ان حتوقفها !
حسام : مزال محكيناش كلمتين خش خوها ( كذاب حشاكم )
سهام : كنتهم تهبل اتقول بنتهم
نادية : كان عندها اخت ناخدوها لوسام
سهام : مزال بالكبير هني على اهوا قبل ( و استمر حديثهم لين وصلوا في الحوش )
نادية : بسم الله الحوش اتقول مخليا فيه جنون مش بشر شن دايرين انتم ؟؟؟ ( طبعا الحوش كان كله مقلوب الجلسة و المخاد و الفرشات كله خارب و المطبخ معبي اماعين )
وسام : كسدنا و لعبنا
سهام شافت لأمها : بتخطبيله قلتي !!
نادية : زلة لسان كانت ، وهي توا زي الفالحين انبدل و انجي نلقى الجلسة و المخاد مرتبات هييي ( ومشت لدارها )
وسام شاف لسهام : بتخطبلي من ؟
سهام : منعرفش أسألها ( وحتى هي مشت تبدل )
منذر لخاله : هيااا لم معانا حتى انت
وسام ضربه بالمخدة : تي ضم وانت ساكت
.
.
في حوش هل ليا :
معمزات البنات ومن ضمنهن ليا و رباب و الام في دار المعيشة
الام : مشاء الله عليها امه
لمياء : حتى اخته كويسة باين عليها لكن الاهم العريس ( وشافوا ل ليا )
ليا : متشوفوليش مخديتش منه لاحق ولا باطل و هو ماسك كويس كويس
ليلى : شكله حلو ! ( امها ضربتها على ظهرها )
الام : تحشمي شن دخلك بشكله انتي ؟؟
ليلى تمسد على الضربة : احييه ضربه من الاعماق و هو سؤال بريئ ( و البنات يضحكن )
ليا : مجتنيش النية نركز فيه
الام : المهم انتي فكري ( وقاعدة مكملتش كلامها و يخش عماد و بوه )
الاثنين : السلام عليكم
... : وعليكم السلام
عماد : هي نوضن و يقعدن امي و ليا ( ناضن البنات و قعمزوا الاب و عماد )
عماد يشوف لأمه : من قبل سألنا عليه و توا زدنا و كويس الولد ماعليه شيء و نحن موافقين فوتي يومين و عطيهم يومين و ردي عليهم ( وقفت ليا )
ليا : غير ردوا بالكم تنسوا تعطوني موعد العرس ( وركبت و هي مقهورة كيف يقرر خوها بدالها و كيف بوها معارضش )
الام : كيف يا حاج البنت معطتش رأيها
الاب : خليناها على راحتها لين تمادت ساد ما تدلعت و نحن نعرفوا مصلحتها ( هزت الام رأسها يمين و يسار موضحة ان مش عاجبها الوضع بس ما باليد حيلة )
.
.
اما ليا كانت تكلم في نور :
ليا : يانور انقولك قرروا و وافقوا كأن انا مش موجوده
نور : و كيف بديري ؟ بترضي عادي ؟
ليا : سمعت بوي قال نحن نعرفوا مصلحتها ( و طق طق باب دارها )
لمياء : نخش
ليا : خشي ، نور تو شوية و نكلمك
نور: تمام ( وسكرت )
لمياء : شن صار !
ليا : ... ( وحكتلها )
لمياء: شن غيره بوي مكانش هكي
ليا : الله لا تسامح عماد بجاه هاليوم
لمياء : متدعيش عليه خوك و اكيد الراجل كويس هضا عليش وافق عليه
ليا : ولو طلع مش كويس؟؟ شن اندير بعدها ؟ و الله تحسابوني بنتحمل و ربي نطلق و مانعدل على واحد
لمياء : ليش الفال الشين
ليا : باهي بنريح رأسي توا
لمياء : ارقدي ارقدي ( و طلعت مشت ل ليلى و رباب )
ليلى : شن قالتلك ؟
لمياء : وافقوا بدون ما ياخدوا موافقتها ( رباب حست بشعور ليا لأن في يوم من الأيام كانت في مكانها ، ناضت استأذنت من البنات و مشتلها لقت باب الدار مفتوح و هي راقدة و اتشوف للسقف )
رباب : نخش !
ليا شافتلها : اكيد
رباب : ليا في يوم من الأيام كنت نحس بنفس شعورك هك بس انتي افضل مني بوااااجد ، انتي معاك ام تحضنك تخفف عليك ، عندك اختين يغيرلك جوك و ينصحنك عندك اخ يطبطب عليك و يدير في جهده عشان يغيرلك جوك بس أنا ( مكملتش كلامها و قاطعتها ليا )
ليا : لا جيتي من هل لا راجل ، معاك حق عماد هو الكبير بوي عطاه الصلاحية انه يتغطرس هكي بس خايفة يطلع مش كويس
رباب : مش كويس غيريه ديري جهدك بعدين عيلتك اكيد حيوقفوا جنبك و يساندوك
ليا : ان شاء الله خير
رباب : هي نوضي انديروا نسكافيه و هما جايبين بقلاوة انضوقوا بكلاوة النسيب
ليا : ههههه هيااا ( مشت ليا مع رباب )
لمياء بصدمة: مش توا كنتي بترقدي
رباب : انا نوضتها بنديروا نسكافيه مع بقلاوة النسيب
لمياء : ههههه احسبوني
ليلى : حتى انااا
ليا : باهي و انتن تفرحن تلقن واحد نايض بيدير حاجة ( ومشن )
ليلى : خطرها
لمياء: شن ؟
ليلى : انضر عمامي و خوالي بيجوا ولا لا
لمياء :أكيد بيعزمهم بوك
ليلى : امبكري امي كلمت خالتي قالتلها
لمياء : هي جية عادية مش بيان مفروض ماقلتلهاش
ليلى : يلاا ، شدي سكتي بناتك و هن شيء ميسكتنش لمياء : هاتي خسارة ما انك خالتهن
جهاد خاش يجري : اميييييييي ......
.
( أكيد بتستغربوا كيف مجبتش سيرة العمام و الخوال و حتعرفوا السبب في البارت الجاي 💛)
.
#يتبع
تتوقعوا ليا كيف حتكون حياتها مع حسام هل بتحاول تغيره ولا تلجأ للطلاق؟
و الرواية حتكون قصيرة في عدد البارتات عكس الروايات الاولى 💛
رواية_اعتزل_ما_يؤذيك #روايات_ليبية #كتاباتي
#ليبيا #كتابة #روايات_عربية #rwayat_br0o
أنت تقرأ
إعتزل ما يؤذيك 💛( روايات ليبية ) مكتملة
Mystère / Thrillerإعتزل ما يؤذيك 💛 . . جملة قالها عمر بن الخطاب رضي الله عنه، و كان ليها أثر كبير على مر السنين منهم من خداها بعين الإعتبار و منهم من قراها كأي جملة عادية ، روايتنا تحكي على الجملة هذي و كيف لقبت بيها بطلة الرواية ( لَيَا ) و شن المواقف يلي استخدم...
