I Found My Prince Charming(Season 2)

Ep-23

Unicode Version

ပတ်ဝန်းကျင်တစ်ခုလုံးအားမေ့လျော့သွားစေသည်အထိ တိမ်းညွတ်ဖွယ်ကောင်းသည့်အဂ္ဂ၏အကြည့်တွင်ဇေယျတုမှာ သတိလက်လွတ်နစ်မြောနေလေရာ အဂ္ဂ၏မေးခွန်းကိုပင် ပြန်ဖြေရန်အချိန်အနည်းငယ်ကြာသွားလေသည်။ အဂ္ဂကလည်း ဇေယျတုပြန်ဖြေလာသည့်အဖြေကိုစိတ်ရှည်စွာ စောင့်ဆိုင်းနေလေ၏။

ယခုတွင်တော့နှစ်ဦးသားဟာကိုယ်ချင်းခပ်ခွါခွါဖြစ်သွားပြီမို့ ဇေယျတုအဖို့အနည်းငယ်အသက်ရှူချောင်သွားပေပြီ။ သို့သော်အဂ္ဂထံမှလက်ဆောင်ဆိုသည့်အရာအတွက် ဘာကိုမှစဥ်းစား၍မရပေ။

"တကယ်ကမပေးလည်းဖြစ်ပါတယ် အဲ့လိုကြီးဘာလိုချင်လဲလို့ဆိုပြန်ရင်လည်း မပြောတတ်ဘူး"

"အင်း...ငါစဥ်းစားနေတာ..မင်းတကယ်လိုချင်တဲ့ဟာလည်းဖြစ်ပြီး မင်းအတွက်တကယ်အသုံးတည့်တာမျိုးဖြစ်စေချင်တာ"

ဇေယျတုလည်းအဂ္ဂ၏စကားကိုခေါင်းညိတ်ရုံသာတုံ့ပြန်သည်။ အဂ္ဂကတော့အသေအချာတွေးတောနေဟန် တူသည်။ ထို့နောက်အဂ္ဂကဇေယျတုထံသို့လက်ကမ်းပေး၍ စကိတ်စီးခြင်းကိုပြန်စရန်ဆိုလာသည်။ ထို့ကြောင့်ဇေယျတုလည်း အဂ္ဂ၏လက်ကိုလှမ်းကိုင်ထားလိုက်ပြီးနှစ်ဦးသား ဘေးချင်းယှဥ်လျက်စီးလာခဲ့ကြသည်။

ထို့နောက်တွင်တော့ အချိန်ကလည်းပြည့်ပြီမို့အခန်းထဲတွင်ဖိနပ်အပ်ကာပြန်ထွက်ရန်ပြင်ကြရသည်။ အဂ္ဂကဇေယျတု၏Skate bootကို ချွတ်ပေးနေရင်းမှရုတ်တရက်ဇေယျတုအားမော့ကြည့်၍ မေးလာသည်။

"မင်း Harry Kim ကိုသိတယ်မလား"

အဂ္ဂပြောသောလူ၏နာမည်ကိုတီးတိုးရေရွတ်ရင်း ဇေယျတုလည်း ထိုလူကိုသိမသိစဥ်းစားကြည့်နေသည်။

"Harry Kim...Kim.. ဟို ကိုရီးယားကStreet Dancerလား Miracle Dance Festivalမှာbattleပြိုင်ပြီး နာမည်ကြီးလာခဲ့တယ်ဆိုတဲ့.."

"အင်း ဟုတ်တယ်"

စိတ်လှုပ်ရှားမှုကြောင့်ပြူးကျယ်လာသောဇေယျတု၏ မျက်ဝန်းအစုံဟာတောက်ပလျက်ရှိသည်။ အဂ္ဂကလည်း ခေါင်းကိုညိတ်ပြရင်းပြန်ဖြေလေသောအခါဇေယျတုက ပါးစပ်အဟောင်းသားဖြစ်နေဆဲပင်။ဇေယျတုဟာ သူသဘောကျသည့်အကနှင့်ပတ်သက်သည့်တစ်စုံတစ်ရာကို ပြောလျှင်ဤကဲ့သို့သောအမူအရာဖြစ်သွားတတ်မှန်း အဂ္ဂမသိခဲ့ပေ။ ယခုကိုယ်တွေ့ကြုံလိုက်ရသောအခါ ထိုပုံစံဟာ အစစ်အမှန်ပျော်ရွှင်နေသောပုံရိပ်ဖြစ်ကြောင်း အဂ္ဂသဘောပေါက်လိုက်သည်။