[188 BoyGroup] Summer Limited Series

『 Winner Takes All 』

Winner Takes All

[ Zhao Jin Xin x Li Shuo ]

တရုတ် • စူကျိုး • ရှေးဟောင်းမြို့တော်

°•°•°•°•°•°•°•°•°•°•°

🏯🌹🏯🌹🏯

အမေရိကားသို့ ငယ်ငယ်လေးကတည်းက ပြောင်းရွှေ့နေထိုင်ခဲ့ရသည့်ဖြစ်အင်က လီရှော့ကို အချိန်အတော်ကြာလောက် မိမိ၏ မူလယဥ်ကျေးမှုသရုပ်မှန်အား ရှုပ်ထွေးသွားစေခဲ့သည် ၊ အထူးသဖြင့် သူ၏ဆယ်ကျော်သက်အရွယ်တွင်ပေါ့။ သူ၏အရှေ့တိုင်းမျိုးရိုးဗီဇက သူ့အားဂုဏ်ယူရစေသလို သူ့ထံ၌ တိမ်မြှုပ်နေသလိုလည်း ခံစားနေရ၏။ ထို့ကြောင့်ပင် လီရှော့က သူလစ်လပ်နေခဲ့သည့် ရိုးရာယဥ်ကျေးမှုများကို အချိန်ပေါင်းများစွာယူပြီး အပတ်တကုတ်လေ့လာတော့သည်။ လွန်ခဲ့သောနှစ်ထောင်ပေါင်းများစွာက ဗဟုသုတများကို လေ့လာရခြင်း၏ အကျိုးကျေးဇူးက သူ့အား ရွယ်တူအပေါင်းအသင်းများထက်ပို၍ အသိဥာဏ်ကြွယ်ဝလာစေကာ ရင့်ကျက်တည်ငြိမ်လာစေပြီး လူကောင်းတစ်ယောက်အဖြစ် ကြီးပြင်းလာစေခဲ့သည်။

သို့ဖြစ်ရာ လီရှော့က ရိုးရာယဥ်ကျေးမှုနှင့် ပတ်သတ်လျှင် အထူးတလှယ်နှစ်သက်မှုမျိုးရှိပြီး အထူးသဖြင့် ဗုဒ္ဓဘာသာသက်ဝင်ယုံကြည်ခြင်းနှင့် တရုတ်ရိုးရာမင်္ဂလာပွဲအခမ်းအနားတက်ရောက်ခြင်းတို့ကို သဘောကျနှစ်ခြိုက်လေ၏။ သူအဖို့ အနုပညာလက်ရာများ စုဆောင်းခြင်းနှင့် အိမ်တွင်းအလှဆင်ခြင်းတို့ပြုလုပ်လျှင်လည်း ၎င်းတို့၏အရိပ်အငွေ့များက ထင်ဟပ်နေတတ်သည်။

ယခုတစ်ခေါက်တွင် သူနှင့်ကျောက်ကျင်ရှင်းက ရှန်ဟိုင်းသို့ အလုပ်ကိစ္စနှင့် ခရီးထွက်လာရခြင်းဖြစ်သည်။ အလုပ်ခရီးစဥ်ကား တိုတောင်းလှသည့်အတွက်ပင် သူ့မှာ အားလပ်ရက်လေးတစ်ရက်ကိုသာ ဖယ်ထုတ်နိုင်ပြီး ထိုရက်တွင် စူကျိုးသို့သွား၍ ရှေးဟောင်းရေမြို့တော်ကိုကြည့်ရန် စီစဥ်ထားလေ၏။