"أنا منار أحمد، أكتب لأن الحروف عندي مش مجرد كلمات، بل أرواح بتتحرك، ونداءات بتفتّش عن قلوب تصدّق، وعقول تتأمّل. بين الواقع والخيال، بين الألم والأمل، صنعت عالمي اللي كله قصص من لحم ودم، بتحكي عنك، وعنّي، وعن ناس زيّنا... بتتوجع، بتحلم، وبتتغيّر.

في رواية مازلتُ لكِ، هتعيشوا قصة حب عنيدة ما استسلمتش رغم كل الجراح، وفضلت تقاوم عشان تثبت إن الوفاء مش ضعف، وإن اللي اتربط بالقلب عمره ما ينفكّ بسهولة.

في الصحبة الصالحة، كتبت عن الصحبة اللي مش بس بتشاركك الضحك، لأ، دي اللي تسحبك للنور وانت غرقان، وتفكرك بربنا لما تنسى. قصة فيها دموع، بس كمان فيها يد بتمدّ وتنقذ.

وفي مقدّر في السماء، هتلاقوا حكاية زواج مفروض، اتحوّل لبداية هداية... ازاي واحدة بطيبة قلبها وإيمانها تغيّر حياة زوجها وتكون سبب في رجوعه لطريق الحق.

أما من ضياع الخيانة إلى ضوء الوفاء، فهي قصة ناس اتكسرت بسبب خيانة، لكن ربنا بعث لهم ضوء جديد... علّمهم إن الوفاء لسه موجود، حتى بعد الخراب، وإن القلوب ممكن تتصلّح لو لقيت حد يستاهل.

في سكريبت اتنين مخطوبين، هتسمعوا صوت داخلي بيحكي، يناقش، يتألم، ويحاول يلاقي إجابة... عن الحب، عن القرار، عن كل اللي ممكن يتقال وما اتقالش.

أما في تتجوزي فارس؟، فده مش مجرد سؤال، دي قصة عن اختيار صعب... لما يتقدملك شخص شكله مش مناسب، بس ربنا كاتب له دور عظيم في حياتك.

وفي رواية المعرض - صراع مع الطموح، هتشوفوا جانب تاني... طموح، منافسة، وجوانب خفية من قلوب بتحاول توصل لحلمها من غير ما تخسر نفسها في الطريق.

وأخيرًا، خيوط النور... مشروع بدأ بخيوط بسيطة من الأمل، حكاية بتتكشف شوية شوية، عن ناس بتحاول تلاقي طريقها وسط العتمة، وبتتمسك بالنور مهما كان ضعيف.

كل قصة كتبتها، هي جزء مني... منار اللي بتكتب مش عشان بس تحكي، لكن عشان تسيب أثر، وتفتح باب، ولو بسيط، للتغيير. لو بتدوّر على وجع حقيقي، ورسائل خفيفة بس بتوصل للعمق، فأهلًا بيك في عالمي، وخلّيك دايمًا من قرّائي."