دمار

الحلقه..1

#دمار 🌪
      .. 70%حقيقيه ..

     .. #الحلقه1 ..

..
..

طرابلس .. 12:45م

ف وسط المستشفي هلبا ناس هلبا حركه اللي خاش و اللي طالع و اللي يعاين واللي يستنى ف الدكتور امتي يطلعلهم من غرفة العمليات ويطمنهم زي عائلة الحاج بلقاسم اللي كلللهم واقفين قدام غرفة العمليات وايديهم ع قلبهم ويدعو لربي ينوض خوهم ع خير .. الخوت وبوهم والعيله الكل لعمام ولخوال و صغارهم وصحابهم وكل من يعرفهم واقفين يستنو ..

الدكتور : طلع من غرفة العمليات وهوا ينزل ف الكمامه من فمه وماشي شورهم

الخوت : اول ماشافو الدكتور طلع مشوله يجرو .. شن يادكتور طمنا

الدكتور : .......

..
..

... قبل ساعتين .. وسط العاصمه ..
..

الحاج بلقاسم : نزل من سيارته ببدلته الرسميه ورافع راسه فوق و بثقه مشى بخطوات تابته شور محلاته كل شوي يوقف ع محل من محلاته الذهب اللي كانو اربع محلات جنب بعض و قعدين فيهم اولاده استفقدهم كلهم وصبح عليهم لين وصل ف اخر محل ...

الحاج بلقاسم : وهوا خاش للمحل .. السلام عليكم

ولده الكبيره اسمه الطاهر : رفع راسه وابتسم .. عليكم السلام بوي وناض باس ع راس ويد بوه شن حالك

الحاج : طبطب ع ظهر ولده الله يرضى عليك .. الحمدلله والشكر

الطاهر : جبد الكرسي اللي كان مقعمز عليه من وراء الطاوله .. اقعد يا بوي

الحاج : وهوا يقعمز ع الكرسي اللي جنب الباب لالا يا ولدي انا هذا مكاني يااارب وقعمز .. ماشاءالله اليوم حتي من خوك ياسين فاتح بكري شكله مش ساهر امبارح و داير مشكله زي العاده

الطاهر : والله ياحاج امبارح عطيته كلمتين ع راسه قتله تجي بمشكله مره تانيه مادخلناش فيك دبر راسك

الحاج هز راسه : مره مره اقرصه وعطيه ع راسه مازال طايش ويبي من اتبعه وينصحه وشباب توا معادش يسمعو ف كلام و نصايح بواتهم ع الاقل انتم شباب تفهمو ع بعضكم

الطاهر : حتي اني قاعد نتبع فيه وحاط العين عليه وقتله نقص من الدوران و الصحبه الزايده اللي مافيش منها فايده الدنيا معادش اطمن اليوم صاحبك وغدوا حابسك

الحاج : ايه والله صدقت يا ولدي الدنيا والوضع قدماله ماشي للاسواء وكل يوم الواحد يسمع ف شي جديد خطف وقتل .. ربي يفرجها ان شاءالله ويحفظكم

الطاهر : ان شاءالله يارب

الحاج : و كان طاح وحصل ماتسيبوش بعض ف النهايه ماليكم غير بعضكم

الطاهر : اكيد ياحاج خوتي هذيم بوهم التاني اني بعد طول عمرك ياارب ..

قعدو يهدرزو الحاج و ولده فجاءه يسمعو ف صوت عالي و دوشه وسلاح برا