دمار

الحلقه ..2

..
..

#بعد_ساعتين ..

..

الخوت : لما شافو الدكتور طلع من غرفة العمليات مشوله يجرو .. شن يادكتور طمنا

الدكتور : وهوا يشوفلهم .. وحدو الله ولا اعتراض ع حكمه البقاء لله ف خوكم💔

الحاج : لما سمع الكلمه اللي نزلت عليه كيما الصاعقه قعد يرعش ورجليه معادش حملوه وهوا ف كلمه وحده .. لا إله إلا الله لا إله إلا الله ونزلو دموعه من غير إرادته

ياسين : حط ايديه ع راسه وهوا مصدوم ودموعه ينزلو

عُبيده : شد الدكتور من سوريته ويفنص فيه ودفه ع الحيط .. شن تقول انت كيف مات خويا ااه كييف خويا ماماتش

الدكتور : وهوا يحاول يفك ايدين عبيده منه .. مقدر زعلكم وصدمتكم بس هذي الدنيا واحني حاولنا ننقدوه ودرنا اللي علينا بس مشيئة ربي

مفتاح : وهو يمسح ف دموعه ويجبد ف خوه من الدكتور .. خلاص ياعُبيده ادعيله بالرحمه شني يعني الدكتور قتله بلعاني

عُبيده : لما سمع خوه قال ادعيله بالرحمه استوعب فعلا ان الطاهر مات وقعدو دموعه ينزلو ويبكي بالصوت وحضن مفتاح .. لاإله إلا الله الطاهر مات يامفتاح مات

مفتاح : وهوا حاضن خوه ويبكي معاه ادعيله ياعبيده ربي يرحمه ويغفرله ويصبرنا

عُبيده : ياريتها جت فيا ياريت انا اللي وقفت قدام ياسين ياريت وقعد اهز من لبكاء

مفتاح : وحد الله هذا عمره

عُبيده : لااله الا الله لا اله الا الله يرحمك ياخوي

وانقلب المستشفى لعزاء و اجرأَت وحزن ف وسط كل قلوب العيله و صدمه لكل من يعرف الطاهر الطاهر كان اسم ع مسمى انسان نظيف و طاهر من داخل ومن براء حقاني وطيب وهذي دنيتنا تاخد كان الباهي وكانهم اقولي لامكان لنا بينكم 💔

                 ... روايات هبوو ...

ف حوش العيله ...
..
..

سناء : ف الكوجينه اطيب ف لغداء

محمد : السلام عليكم وخش للكوجينه جبد كرسي قعمز عليه وحط شنطته ع الارض

سناء تلفتتله : وعليكم السلام وعقدة حواجبها هالعاده امتي بتنحيها بس تخش بصباطك وتحط ف شنطتك ع الارض ماهو حطهم ف دارك و غير حوايجك وبعدين تعال

محمد نفخ : واااك هالاسطوانه كل يوم ماتعبتيش منها

سناء : تحشم ع وجهك يا معفن و اني وراك وراك لين تبطل هالعاده

محمد : باهي به مازال الغداء😑

سناء : مازال شويه نديرلك دحي وهريسه

محمد : ياريت جيعااان جيت نجري باش ناكل

سناء : تحوس ف الكوجينه وادير ف سندويتش لخوها .. شن درة ف الامتحان