الآن، وبعيدًا عن كلشي ..
دقيقتين خلي ناخذ من وقتنه للتأمل !
لشوكت يبقى الناس نيام؟! لشوكت نبقه بهالغفلة ؟!
مناوين نصحى منها؟
من نجي نلعن قتلة الزهراء ، وبالتالي أحنه هم قتلة..
شلون؟!
أني أكللكم / لأن همه كسروا ضلعها
وأحنه كسرها ضلعها
هم شلون؟!
أحنه من نذنب و نتهاون بالحجاب والعفة هنا أحنه دنكسر ضلعها ونأذيها. الزهراء انكسر ضلعها علمودنه
وأحنه دنجازيها بالموديل والتطور الي ماخذي من الغرب..
زين بس تعالوا شوي نتأمل ..
الكل متفق أكو منقذ آخر الزمان، وهو المهدي المنتظر -عجل الله فرجه-
من راح يظهر الإمام ويباوعلج أنتِ أو أنتَ
ويكلك لماذا آذيتموني ؟!
ويدير وجهه وياخذ شيعته ويروح ..
المتبرجة الي عافها الإمام وراح بس ركزي شوي
المكياج راح يجي يكلج أني ادخلج الجنة أو أخلي يشفعلج؟!
الي يسمعون أغاني ويعوفهم الإمام ..
الأغاني راح تجي تكللكم أني ادخلكم الجنة وأشفعلكم؟!
الي عدهم علاقات محرمة
حبيبج راح يجي يكلج يله أني أشفعلج ؟!
الشاب الي انتهه عمرهه باللهو والعلاقات وغيرها وغيرها
هي الي راح تشفعلكم؟
بذاك الوكت منو راح يشفعلنا؟!
الذنوب الي سويناها حته نتونس بيها؟!
بينما الفتاة الفاطمية والشاب أيضًا ..
راح تجي الزهراء تشفعلهم ، راح تكول ذولي ما أذوني ، نصروني ، حاربوا ع الي ضدي والخ..
هم تعالوا تخيلوا من الزهراء تزفكم للجنة ع الصراط المستقيم..
ذاك الوكت شكد راح نحمد الله ع دينه ومحبتنه لآل البيت
والسير ع طريقهم ؟
شايفين من شخص عزيز عليكم أو استاذ أو صديق ويمدحك كدام أهلك أو شخص ثاني ، شايف شلون راح تفرح ؟!
كيف إذا الزهراء مدحت بينه؟!
كيف إذا الحسين مدح بينه ؟!
كيف إذا المهدي كان ممتأذي من عدنه ويمدح بينه؟
شكدها راح تكون فرحتنه؟
لشوكت البعض يكول نكبر ونتوب؟
وع ساعة يصير حادث ويموت
ذاك الوكت شيكول لله ؟!
جنت اريد اتونس ؟
يفيد بعد شي ؟!
يوم الي يصيح بي " ربِ أرجعون"
مو مدرسة هاي وإذا ترسب تكدر تعيد مرتين وتروح خارجي ومسائي وعدة طرق علمود تنجح ..
من تموت خلص بعد ماكو رجعة علمود نسوي أعمال صالحة..
البنية من تباوع ولد خلي تتذكر عين أبا الفضل العباس من طفت بالسهم علمودنه ،
من تسمع أغاني خلي تتذكر صوت عبدلله الرضيع وصوت بكاءه وهم علمودنه ، يطيها كلبها ترجع تسمع أغاني؟!
خلي تتذكر السيدة زينب من احتركت الخيام ..
وراحت مسبية للشام ، ووكفت بالسوك ، وعبايتها ما تحركت من مكانها..
رأس الحسين ورأس أبا الفضل ، وركبة عبدلله الرضيع
وحرك الخيام ... كل هذا علمودنه
وشوفوا أحنه شلون دنجازيهم...أكو الي يكول أني شمسوي اصلي وأصوم والحمدلله
الدين مو فقط بالصلاة والصوم ..
بس الواحد منه خلي يقرة الصحيفة السجادية للإمام السجاد عليه السلام ، وهو إمام بعظمته وشوفوا كلماته ..
خلي يقرة باقي المناجاة للأئمة ويشوف ..
أحنه الي نكول شمسوين، وأهل البيت بعظمتهم
مناجاتهم كلها طلب عفوا ومغفرة ومسامحة من الله ..
الي يكول أني أحب الله وهو واقع بغرام الدنيا
ترة الإمام علي يقول " حب الدنيا وحب الله لايجتمعان في قلب واحد"
الدنيا دار الفناء ، والآخرة دار للبقاء
هواي تمر عليه هاي الجملة، بس أكو واحد متمعن بيها زين؟
خلي نحضر أرضيتنه للآخرة بادينه وبأعمالنه
أكو رواية قريتها الي هي " تحت أجنحة البرزخ"
رغم أنو هو شاب مؤمن ويخاف الله جدًا
لكن كان مدة عقابة ٣٨ سنة ، لأن عنده بعض الصغائر!
بالرواية يذكر أنه كان من يعطش ويريد مي ، يجيبوله ماء حار يغلي ويكلوله هاي انت حضرته لنفس بالدنيا
يكللهم أني هيج أحضر لنفسي؟!
يكلوله أي هذا عملك الفلاني..
أو من يجوع ويجبوله زقوم من نار كذلك يكلوله أنت حضرته بالدنيا من أعمالك ..
حته أكو آيات قرآنية تدل ع هالشي ..
ومن يأخذوا علمود يصعد جبل عالي لا نهاية له من حمم البركان والنار ويكلوله هذا تكبرك بالدنيا ، ولازم انت تصعده..
ولولا مخافته لله ومناجاته أمر من الله وشفعله من هذا الجبل.
وغيرها وغيرها من الأمثال..
حبوا الحياة عيشوها ، وعيشوها بداخلكم
خلوها لله وفي الله وإلى الله ..
لتتخيليون السعادة بالأمور الحرام
الي يدور السعادة يلكيها بالقرب من الله وآل بيته
يلكيها بالألتزام بالصلاة - لأن هي الصلاة كفيلة بأنها تنهى عن الفحشاء والمنكر -
طبعًا الصلاة الها مبحث آخر
بس ثبتوا هاي ببالكم كقاعدة:
"الصلاة إذا قبلت قبل ما سواها ، واذا ردت ردَ ما سواها"
الي يدور عن السعادة يلكيها برضا الوالدين
بالألتزام بأوامر الله ، بالأمر المعروف والنهي عنه
الحديث القدسي يكول مضمونه أنه " ياعبدي أفعل لي مااريد أفعل لكَ ماتريد"
من تحبون الله قولا وفعلا مو بس قولا
راح تعيشون حياة غير ..
من راح تطيعوا وتعبدوا وتحبوا
وتخلوا يرضا عنكم ، انتو الي راح تحسون بالطمأنينة ..
وبالنهاية قول الله
" إنا هديناه السبيل إما شاكرًا وإما كفورا"
