*. حملة تصفية
شنو يعني حملة تصفية؟
كُلنا عدنه ملابس منلبسها
وعدنه كتب قريناها واستفادينه منها وباقية برفوف المكتبة مجرد ديكور
البنات دائمًا تتوفر عدهم ساعات وأكسسوارات ميلبسوها
فكرة حلوة لو بهالفترة نفتح الكنتور ونطلع هدايا منّه
ونخصص صندوق اسمة صندوق الهدايا
نستثمره شوكت
من تصير جمعة عائلية
اعياد
مناسبات اهل البيت
مرات بدون مناسبة مجرد عدنه اشخاص بحياتنا ممتنين لوجودهم ويانه اصحاب مواقف نهديلهم بلا سبب
أكو جلادات حلوة بالمكتبة مال كتب تگدرون تغلفون الكتاب وتلصقون قصاصة عليه وتكتبون عبارة لطيفة وتهدوها
حتلو الكتاب تعبان ومأشر بيه
گليلها هالكتاب عزيز عليّه مالتي من ممتلكاتي ولأن أنت عزيزة حبيت اهديلچ شي من ممتلكاتي
وحبيت اغلفه الچ واكتبلچ هالقصاصة لأن تستاهلين
شوفي هالكلمة شلون تأثر بيها وتقربها الچ
حتى الملابس هم اكو اكياس حلوة تگدرين تغسلين القطعة المترديها وتكويها وتعطريها
وتحطيها بعلاگة ووياها فد قول وتخلينهن بكارتونه وتدزيها لفد مؤسسة
عائلة متعففة
والأكسسوارات هم اني اشتري اكياس صغيّرة من المكتبة
١٠٠ بألف دينار للأكسسوارات
وأخليهن بصندوق خاص.
خو انت مخسرتي فلوس ولا تعبتي نفسچ مجرد نيتچ لوجه الله وكلمة حلوة كفيلة بجذب قلوب الناس
هسه هذا وحدة من الشغلات النگدر نسويها خلال هالفترة
نملك بداخلنا نيّة العطاء
ونبحث بين امكانيّاتنا وممتلكاتنا شنو الـ شي النگدر النعطيه؟
يجوز أنتِ عطائچ كلامچ الحلو الدافي بين احبابچ
يحوز عطائچ سعة صدرچ وخدمتچ للعائلة
أحيانًا عطائچ صبرچ ع سوء خلق
أحيانًا عطائچ وقتچ المخصصته بالتعلم
فلوسچ التصرفيها لله
العطاء ما مقيّد بقيّد
كل شي ننوي بيه نفع الآخرين ومساعدتهم هوَّ عطاء.
