عرفنه هواي اشياء بالمنشور السابق
هسا شلون نطهر نفسنا؟ (نزكّيها)✨
* لازم نسعى حتى نعرف الفضائل(الحسنات) والرذائل(الذنوب).. باعوا هوه احنه مثلا من نشوف مقطع تمثيلي او مسلسلة وتعجبنه كلش.. مو نروح نبحث عن الممثلين ونتعرف عليهم وشوكت تاريخ الإنتاج ووو . او من سمعنا اكو مرض اسمه كورونا؟ شسوينه؟ رحنه قرينه بحثنه عنه وين وشوكت وشكد الإصابات والعلاج وراح اشترى كمامات وتعقيم وو.. يعني احنه ندقق بحياتنه ونعرف كلشي حديث.. لذلك مثل ما نهتم بأمورنه الدنيوية لها لدرجة لازم نهتم لامور الاخرة هم بهالدرجة.. لازم مثل ما يدور كمامات ومعقات للدنيا مالته لازم يروح يدور اعمال جيدة وحسنات لآخرتة الملخص هنا لازم يعرف شكد محصولة الدنيوي وشكد محصولة بالآخرة ويشتغل عليهم😁
* ثاني طريقة ممكن نسويها انو نعوّد نفسنا على محاسن الاخلاق.. شنو محاسن؟ من اسمها مبينة.. تحسّن الانسان وتضيفلة اشياء ممكن تجذب الناس اله.. احنه نكول الجمال مو جمال الشكل انما جمال الخلق.. هنا المقصد😉
يعني مثلا اني اعرف انو حلو واحد يكون صادق وبشوش الوجه، حسن الخُلق، طيّب النفس.. بس شتفيدنا المعرفة بس؟ احنه نريد التزام وتطبيق!.. زين هاي صعبة نلتزم بيها؟ راح اكلكم اذا الشخص معوّد نفسه على انو يتجنب المحرمات ويلتزم بالواجبات راح تصير سهلة عنده الاتزام بالمحاسن.. وبعد انتوا بكيفكم😁💜
الامام علي كال(( انما هي نفسي اروضها بالتقوى لتأتي آمنة يوم الخوف الأكبر، وتثبت على جوانب المزلق))
* زين، هنا شغلتنا كلش مهمة وكلش تأثر.. وهي مصاحبة الناس.. اكو ناس زينة وخيّرة ممكن تاخذ بأيدكم لطريق السير الى الله😍 واكو مو خوش ناس ياخذوكم لمدري وين المهم وصلتلكم الفكرة😅.. لذلك من تشوفون شخص صالح ممكن تتعلمون منه لتبخلون على نفسكم.. مو الا تكونون صداقة قوية وياه يكفي ان تكونون بجانبة تتزودون منه.. واذا شفتوا شخص او صديق بحياتكم ممكن يأثر على طُهر أرواحكم حاولوا تبتعدون قدر الإمكان لان الامام علي كال ( احذر مجالسة قرين السوء، فانه يهلك مقارنه، ويردي مُصاحبه).. وبعد بكيفكم😉
#الطبيب_الروحي
نكمل..
* باعوا هوه شلون النفس الأمارة تخلينه نسوي ذنوب؟ شنو التكنيك مالتها؟😅 اذا متعرفون منو هاي المحروسة اقروا البوست السابق😁.. هاي النفس تستغل ساعة الغفلة عند الإنسان! شنو ساعة الغفلة؟ الإنسان يغفل ويتناسى نفسة فيسمح لهذيج المتتسمى تجي توكعه بذنوب..
لهذا السبب لازم الإنسان يكون بيقظة تامة وميغفل على نفسة، اكو رواية عن الامام علي انه قال( ويل لمن غلبت عليه الغفلة، فنسي الرحلة ولم يستعد) !!! تره هواي تاذي هاي الرواية💔
زين شلون ما اخلي نفسي اغفل؟ بس تحسون نفسكم على مشارف ارتكاب ذنب رأسا تذكروا مصيركم! شنو مصيركم الموت!! وهذا الذنب ماراح يشفعلكم! وتذكروا الآخرة والحساب.. وبكل مرّة تتذكرون راح تنغرس هاي التذكرة ببالكم وتصير مُلازمة الكم🌿
* واكيييد الطلب من الله الاعانة واللجوء اله هواي راح يأثر.. بدعاء الامام زين العابدين احد المناجاة يقول (الهي اليك اشكو نفسا بالسوء أمّارة، والى الخطيئة مبادرة، وبمعاصيك مولعة... كثيرة العلل طويلة الامل.. الخ).. وحاشى الله يرد احد طرق بابة🌱
#الطبيب_الروحي
زين دورات اكو اشياء نتحير بيها او نتخبّط او دورات تختلط الأمور.. شنسوي؟
نكدر نرجع للمصادر الاساسية بتهذيب النفس.. يعني منو؟ القرآن !
امير المؤمنين يصف القرآن كال( جعله الله ريا لعطش العلماء، وربيعا لقلوب الفقهاء).. وايضا نلجأ لسنة النبي وسيرته وبعدين اهل البيت وطهرهم.. منهم نستمد التعاليم المضبوطة..🌸
وايضا انو نخلي ببالنه مالازم نسوي شي يخالف الشريعة.. هواي ناس تسوي اشياء كلش غلط عبالهم هالاشياء توصلهم لتربية النفس وتهذيبها.. يعني اكو ناس تعذب او ترهق انفسها وتحير شتسوي بنفسها بأعتقادهم هالشي يربي النفس😳 اصلا هوه مخالف للشريعة . تره الله ميرضى لعبدة يكون ذليل مهين!!💚
يمكن تشوفوهن طوال وتتعاجزن تقروهن بس صدكوني متاخذ منكم وقت لان الأسلوب كتبتة بطريقة مختلفة ماراح تملّون وانتم تقروا.. وانطوني رأيكم اذا دتستفادون لو لا؟
@Twinkle_313
